¹ Sy olo maro gny tokony ho lasa papianasy ,ry rahalahiko . Fatasika fa handramby fisara fatrasy isika . ² Fa isika iaby dra tafitohy amign'gny fomba maro . Raha misy sy tafitohy amin'ereo tegny ,dra lelahy matosy tateraky izy ,afaky mifehy na dre gny vatany raiky manotolo avô. ³ Gny raha asika lamboridy eo ambavan'ereo sovaly bâ hakatoavin'ereo asika,dra afaky minday gny vatan'ereo raiky manotolo avô koa isika . ⁴ Hatio avô koa fa reo sambo ,dre dra lahibe tokoa aza izy reo dra andesigny sihoky mahery, dra voavilign'gny familia vatâ masaiky agny aby amin'izay tiagn'gny panamory. ⁵ Mitovy amizay koa gny lela dra rasa masaiky amign'gny vata ,kanefa izy dra mihambo-draha maro . Hatio avô koa gny hasaikign'gny afo zay fe magnoro ala be . ⁶ Gny lela avô koa dra afo , totologn'gny rasam-batasika. Zay dra magnisy petipety gny vata raiky manotolo dra magnoro gny lalam-piagna . Arehisign'gny helo gny vatany . ⁷ Fa gny karaza-biby aby ,voro,biby mandaly ,dra zava-boaharin-dranomasy dra folaky sady nofolahign'gny olombelo. ⁸ Fa momban'gny lela ,sy misy olo mahavita mamolaky anizay. Io dra rasy sy hay fehezina ,feno poizy mahafaty. ⁹ Amizao gny hiderasika gny Topo vô gny Ra , dra amizao gny hagnozognasika olo, ze natao nitovy tamin'Agnahary. ¹⁰ Baka amigny vava avô gny niboahan'gny fitahia vô fagnozogna. Ry rahalahiko,sy tokony hisy reo raha reo. ¹¹ Moa gny loharano se mamoaky rano mamy vô mafaisy baka amigny fiboahany ? ¹² Moa gny hazogn'gny aviavy se ,ry rahalahiko, mamoa oliva ? Dre gny voloboky, mamoa aviavy? Gny rano masira koa dra sy afaky hagnome rano mamy . ¹³ Iza gny hendry vô mahay eo agnevondrareo? Angao ze olo zay hapiboaky fiaigna soa amigny asany amigny fanetre-tegnagn'gny fahendrena. ¹⁴ Fa raha mana fialogna rasy andrareo dra ragnirian-daza ao am-pondrareo ,dra ka mihambo na mavandy manohisy gny mary. ¹⁵ Zay dra sy fahendrena ze nizoso bak'agny agn'abo.Fa avy amigny tany ,gny sy ara-pagnahy , gny devoly zay. ¹⁶ Fa agny amin'izay misy fialogna sy fagniria-daza, dra misy fifanjevona vô fanaova gny rasy aby. ¹⁷ Fa gny fahendrena bak'agny agn'abo dra malio aloha , Bak'eo feno fiadana , malemy fagnahy m mihevisy gny hafa ,feno famindram-po vô vokasy soa , sy malemy , dra sotra . ¹⁸ Gny vokasy gny fahamarigna dra voafafy am-piadana eo agnevon'ereo ze mapihava.