¹ Dra Yaveh nizaka tamin'i Mosesy dra ho izy ho: ² ''Amy andro volohany voloana volohany tao vaovao dra sy maisy hasanganao gny tabernakely, gny fihaogna. ³ Apetraho ao aminizay gny fiarany vovolombelo, dra ao harovanao amy lamba gny fiara. ⁴ Andeso eo amy latabasy dra alaharo reo raha ze tokony ho amizay. Dra andeso gny fanova-ziro dra apetraho reo ziro. ⁵ Apetraho manoloa gny fiarany vavolombelo gny alitara volamena ze misy gny litin-kazo magnisy, dra apetraho gny lamba eo amy fidirany gny tabernakely. ⁶ Apetraho eo anoloany filira magnao amy tabernakely , gny fihaogna, gny alitarany gny fagnatisy dora. ⁷ apetraho eo agnelagnelany fihaogna vo gny alitara gny koveta lahibe dra asio rano ao agnatiny. ⁸ Asangano magnodidy anizy gny hiaza, dra ahatogny eo amy filirany kiaza gny lamba. ⁹ Ka alao gny dililo fagnosora dra hosory gny tabernakely vo gny raha aby ao agnatiny. Atokano ho anahy zay vo gny fanaky aby, ka dra ho masy zay. ¹⁰ Hosory gny alitarany gny fagnatisy dora vo fanakizay aby. Atokano ho anahy gny alitara dra tena ho masy ho anahy anizay. ¹¹ Hosory gny kovetabe varahina vo falalianizay dra atokono ho anahy. ¹² Ho andesinao i Arona vo reo zandahiny ho eo amy filirany gny fihaogna dra sasao amy rano izy reo. ¹³ Ho tafinao amin'ereo ankazony ze natoka ho anahy i arona, hosory izy dra atokano ba hanompo ho mpisoroko. ¹⁴ Ho andesinao zanadahiny dra ampiakazoy akazo lava izy reo. ¹⁵ Hosory tahaky nagnosora anao gny rany izy reo ba hanompo anahy ho mpisoro. Gny fanosora anazy reo dra hahavy anazy reo ho fisorogna maharisy hatramin'ereo taranany fara mandimby. '' ¹⁶ Zao gny raha nataon'i Mosesy ; narahiny avo koa ze fa nandidian'i Yaveh anazy.Nataony anizay raha aby zay. ¹⁷ Dra voasanga tamy andro volohany volana volohany tamy taona faharo gny tabernakely. ¹⁸ Nanangana gny tabernakely i Mosesy , nametraky gny faladiany zay tamy toerany, nanangana gny rafisinizay, nampikamba gny barany, dra nananga reo andry vo reo sangasangan'izay. ¹⁹ Naeliny manerana gny tabernakely gny fandrakofa dra napetrany manera anizay gny lay, araky gny fa nadidin'i Yaveh anazy. ²⁰ Nalany gny didiny fanekena dra napetrany tao agnatiny fiara reo. Nametraky teo amy fiara avo koa izy, dra nametraky gny sarom-pagnavota teo aminizay. ²¹ Nananga lamba ho anizay izy ba hiaro gny fiarany vavolombelo, araky gny nandidian'i Yaveh anazy. ²² Napetrany tao agnatiny gny fihaogna gny latabasy, dra teo amy avarasy gny tabernakely, ambalikiny lamba. ²³ Nalahany teo agnabony latabasy teo anoloan'i Yaveh gny mofo, araky gny fa nandidian'i Yaveh anazy. ²⁴ napetrany tao agnatiny gny fihaogna gny fanova-jiro, tandrifiny latabasy, teo amy lafiny asimony tabernakely. ²⁵ Nampirehisy gny jiro teo anatrehan'i Yaveh izy, araky gny fa nandidin'i Yaveh anazy. ²⁶ Napetrany tao amy gny fihaogna manoloa gny lamba gny alitara volamena misy litin-kazo magnisy. ²⁷ Nagnoro litin-kazo magnisy teo aminizay izy, araky fa nandidian'i Yaveh anazy. ²⁸ Nahatony tao amy filira teo amy tabernakely gny lamba. ²⁹ Napetrany teo amy filirany gny tabernakely, gny fihapgna, gny alitarany gny fagnatisy dora. Nanolosy fagnatisy dora vo vary ho fagnatisy teo aminizay izy , araky gny fa nandidian'i Yaveh anazy. ³⁰ Napetrany teo agnelagnelany gny fihaogna vo gny alitara gny kovetabe, dra nasiany rano tao agnatiizay ba hisasany. ³¹ Mosesy , Arona vo reo zanadahiny nanasa gny tagnany vo gny tambon'ereo ta amy kovetabe ³² na ombia na ombia handehanan'ereo ao amy gny fihaogna, dra na ombia na ombia hiakaran'ereo eo amy alitara. Nanasa gny vatany izy reo, araky gny fa nandidian'i Yaveh an'i Mosesy . ³³ Nananga gny kiaza nagnodidy gny tabernakely vo gny alitara i Mosesy. Nananga gny lamba teo amy filirany kiaza izy. Zay gny fomba nahavitan'i Mosesy gny asa. ³⁴ Dra gny raho nandrakosy gny fihaogna, dra gny voninahisin'i Yaveh naheniky gny tabernakely. ³⁵ Sy sfaky nisofoko tao aminigny gny fihaogna i Mosesy satria raho fa nitoesy tao aminizay, satria gny vopninahisin'i Yaveh nagneniky gny tabernakely. ³⁶ Na ombia na ombia gny niakarany raho laha tao ao amy tabernakely,gny vahoakan'Israely dra niala tamy lian'ereo. ³⁷ Fa raha sy niakasy laha tao amy tabernakely gny raho, dra sy nandeha gny vahoaky. Nizano teo izy reo hatraminigny andro ze nisandratany. ³⁸ Fa gny rahon'i Yaveh dra teo agnaboniny tabernakely gny andro, dra gny afony teo aminizay nony gny hariva, teo amasony vahoakan'Israely aby nandrisy gny lian'ereo.