¹ Atovy amy hazo akasia gny alitara, dimy hakaho gny halavany dra dimy hakiho gny sakany.Ho efa-zoro gny alitara dra telo hakiho gny haabony. ² Asio tandroky maragnisy tahaky gny tandrokagn'omby gny zorony efasy.Hatambasy ho raiky amy alitara reo tandroky, dra petraho takela-barahy reo. ³ Magnamboara fitova ho agny alitara :dra valanin-daveno, dra koa fandraofa, koveta lahibe, sotro vaky, dra vilagny fandesa afo. Varahina avo koa gny hanovanao reo fitova iaby reo. ⁴ Magnamboara makarakara ho agny alitara, harato varahina.Magnamboara mason-drozo varahina ho an'ereo zoro efasy gny makarakara. ⁵ Atovy eo ambanigny rindrigny alitara gny makarakara, laha teo antegnategnany hatrany ambany. ⁶ Manova bao ho agny alitara, vita amy hazo akasia, dra rakofy amy varahina reo. ⁷ Sy maisy atao agnatyny mason-drozo gny bao, dra gny bao ho eo amy lafiny ro amy alita, ba hilaza anazy. ⁸ Atovy poakaty gny alitara, amy hazo fisaky.Atovy arajy ze naseho anao tao antendrombohisy zay. ⁹ Manova kiaza ho agny tabernakely. Eo amy lafiny asimonigny kiaza dra hisy fefy lamba, fefy lamba rongony fosy madiniky voateno mirefy zato hakiho. ¹⁰ Asio andry ropolo reo fefy lamba, miaraky amy faladia varahina ropolo. Hisy farango avo koa apetaky eo amin'ereo andry, dra koa fihatona volafosy. ¹¹ Ho tahaky anizay koa amy lafiny avarasy, hisy fefy lamba mirefy zato hakiho misy andry ropolo, faladia varahy ropolo, farango apetraky eo amin'ereo andry, dra fihatogna volafosy. ¹² Amy lafiny andrefa amy kiaza dra hisy lamba mirefy dimapolo hakiho gny halavany. Dra manova andry folo, dra faladia folo. ¹³ Atovy dimapolo hakiho avo koa gny halavany gny kiaza agny amy lafiny asignana. ¹⁴ Gny fefy lamba amy lafiny raiky amy fidira dra sy maisy atao dimy ambiny folo hakiho gny halavany.Sy maisy miaraky amy andry telo vo faladia telo reo. ¹⁵ Eo amy lafiny raikykoa dra hisy fefy lamba mirefy dimy ambiny folo hakiho gny halavany.Sy maisy miaraky amin'ereo andriny telo vo faladiany telo reo. ¹⁶ Lamba mirefy ropolohakiho gny atao vavahadinigny kiaza.Fitova manga, volompasy, dra mena vo rongony fosy mandiniky voateno, asany mpanao peta-kofehy gny hanova gny lamba. Sy maisy miaraky amy andry efasy sy faladia efasy zay. ¹⁷ Gny andriny kiaza iaby dra sy maisy hasia fihatogna volafosy, farango volafosy, dra faladia varahy. ¹⁸ Ho zato hakiho gny halavany kiaza, dimam-polo hakiho gny sakany, dra ho dimy hakiho gnkoa gny haabony miaraky amy fefy lamba rongony fosy madiniky, dra faladia varahina. ¹⁹ Gny fitova iaby ze hampiasa ao amy tabernakely ,.vo gny fihatognan-day aby amy tabernakely vo gny kiaza dra sy maisy atao amy varahina. ²⁰ Ao ianao handidy gny vahoakan'i Israely ba hinday menaky oliva, malio sady nifihazy ,ho agny ziro ba hirehetan'ereo mandrakariva. ²¹ Ao antragno lay fihaogna, eo ambaliky lamba ze manoloa gny tabernakely ze misy gny fiarany vavolombelo, gny handrehetan'i Arona vo reo zanadahiny ziro eo anatrehan'i Yaveh, manomboky gny hariva mandra-maraindray .Zay fepetra zay dra ho lalana maharisy manera gny taranaky gny vahoakan'Israely.