¹ Paoly, apostolin'i Kristy Jesosy araky gny sitrapon'Agnahary, ho an'ireo olo manin'Agnahary agny Efesosy, ze matoky ao amin'i Kristy Jesosy. ² [Fagnamariha: Misy fandika ilany manglaky gny ho: "Ao Efesosy" Fe seky mety ao amigny taratasin'i Paoly tamigny volohany zay.] Ho amindrareo gny fahasoava vo gny fedagna boak'amin'Agnahary raisika vo i Jesosy Kristy Topo. ³ Dera anie gny Zagnahary vo Rain'i Jesosy Kristy Toposika, ze nitahy asika tao amin'i Kristy tamigny fitahiapagnahy aby boak'agny an-dagnisy ao amin'i Kristy. ⁴ Zagnahary nifily asika tao aminazy hatramigny fiatombohan'izao totolo izao, ba ho masy vo sy mana-signy eo agnatrehany isika. ⁵ Zagnahary dra nisafidy asika meloha ho amigny fanangana ho zanaky tamigny alalan'i Jesosy Kristy, araky gny sitrapony. ⁶ Gny fanangana asika dra minday amigny fidera gny fahasoavany be voninahisy ze nameny asika maimaipoana tao amigny raiky ze tiany. ⁷ Ao amin'i Jesosy Kristy dra mahazo fagnavota amigny liony vo gny famela-keloky isika, araky gny hare-pahasoavany. ⁸ Narosany tamisika tamigny fahendrena vo fahalala aby zay fahasoava zay. ⁹ Nataon'Agnahary fatasy tamisika gny raha mivony sitrapony, araky ze tiany, vo ze nasehony tao amin'i Kristy, ¹⁰ nindray tamigny fandahara raiky amigny fahafenoanigny fotoa, hamoria gny raha aby, eto atany vo gny agny an-dagnisy, ho loha raiky, na Kristy aza, ¹¹ Ao amin'i Kristy dra voatendry ho pandova isika. Nifiliny meloha araky fandaharanigny mapiasa gny raha aby araky gny tazonigny sitrapony isika. ¹² Zagnahary nanendry asika ho pandova ba hosika gny mana fahatokisa volohany ao amin'i Kristy, ba ho fidera gny voninahiny isika. ¹³ Tao ain'i Kristy, handrareo koa, gny fa nahare gny zakanigny fahamarigna, dra gny filazasaranigny famozena handrareo, dra nino anazy handrareo dra voatoboky tamigny fagnahy masy napanatenany, ¹⁴ ze atoky ho anigny lovasika madra-pahazoasika tateraky anizay, ho fidera gny voninahiny. ¹⁵ Noho izay atony zay, hatramigny naharezako gny finoandrareo gny Topo Jesosy dra gny fitiavandrareo reo olo-masin'aby, ¹⁶ dra sy nisahasy gny nisaotra an'Agnahary zaho noho gny amindrareo dra saroako am-bavaky handrareo ¹⁷ Mivavaky zaho ba gny Zagnaharin'i Jesosy Kristy Toposika, gny Ranigny voninahisy, hagnome andrareo gny fagnahinigny fahendrena vo fagnambara amigny fahalala anazy. ¹⁸ Mivavaky zaho ba hagnazava gny masonigny fondrareo, ba hahafatarandrareo gny toky ze nitokavany andrareo vo gny herinigny voninahisy gny lovany eo amireo olo-masin'Agnahary aby. ¹⁹ Ao amigny fivavako dra mangataky zaho ba hahafatarandrareo gny fihoaranigny halahibenigny heriny ao amisika ze mino, araky gny lolonigny heriny lahibe. ²⁰ Zay hery zay avo koa gny napesan'Agnahary tao amin'i Kristy gny fa nasangany tamigny maty Izy dra natobiny teo atagnany akavana tagny andagnisy. ²¹ Kristy dra natobiny ho amboninigny lalana vo gny fahefa vo gny hery vo fisara, dra gny agnaran'aby ze misy. Hanapaky Kristy, sy ho amizao vani-potoa zao avo, fa ho amigny vani-potoa ho avy koa. ²² Napetran'Agnahary ho ao ambaninigny tombok'i Kristy avokoa gny raha aby dra natolony ho lohanigny raha aby ao amigny fengona izy. ²³ Gny fengona gny vatany, gny fahafenonigny mameno gny raha aby amigny endriny aby.