¹ Dra nitoka gny Israely aby i Mosesy dra nanao tamin'ereo ho: "Ry Israely, tenoy, reo lalana vo didy ze ho lazakako ao asofindrareo anio, ba hahafahandrareo hianasy vo hitandrin'anizay. ² Yaveh Zagnaharisika nanao fifagneke tamisika tao Horeba. ³ Sy nanao anizay fagneke zay tamireo razambesika Yaveh, fa tamisika, dra isika aby velon'eto amizao. ⁴ Nizaka mivata taminadrareo teo amigny tendrombohisy boak'ao agnevonigny afo i Yaveh ⁵ (Nisanga teo agnelagnelandrareo vo Yaveh zaho tamizay fotoa zay, ba hagnambara amindrareo gny zakany; fa natahosy andrareo nohonigny afo, dra sy niakasy tao atendrombohisy handrareo). Dra hoy Yaveh ho: ⁶ 'Zaho gny Yaveh Zagnaharindrareo, ze ninday andrareo hiala tao amigny tany Egypta, hiboaky gny tragno fanandevoza. ⁷ Sy hana zagnahary hafa eo anoloako handrareo. ⁸ Sy hanao sary raha voasokisy hondrareo handrareo na endrin-draha ze egny amigny lagnisy agnabo, na ze amigny ty tany ty, na ze agnaty rano agny. ⁹ Ka miakohoky amin'ireo hanao na manopo anazy ireo, fa izaho, Yaveh Zagnahariko, dra Zagnahary saro-piaro. Mamaly gny faharasian'ireo razambe zaho amigny famezako ireo zaza madiniky, hatramigny taranaky fahatelo vo fahaefasy an'izy malaiky anahy, ¹⁰ Dra haneho sy fivadia-pagneke koa amin'ireo olo agnarivony, amin'ireo izay tia anahy vo mitadry ireo didiko. ¹¹ Sy ho hapiasanao amigny sy antony gny agnaran'i Yaveh Zagnahariko, fa i Yaveh dra hadray anazy ho ory amigny fapiasa fahatany gny agnarany. ¹² Tandremo gny andro sabata ba hagnamasinan'anazy, arak'izay nandidian'i Yaveh Zagnaharinao anao, ¹³ fa enina andro gny hesanao vo hanovanao gny raharahanao aby; ¹⁴ fa gny andro fahafito koa dra Sabata ho an'i Yaveh Zagnaharinao. Amizay dra sy hiasa hanao__na hanao, na gny zanadahinao, na gny zanakapelanao, na gny panopo lahinao, na gny borikinao, na gny biby teza, na gny vahiny ze agnatinigny vavahadinao. Natao zay ba hisaharanigny panoponao lahy vo gny panoponao vavy manahak'anao. ¹⁵ Dra ho saroanao fa panopo tagny amigny tany Egypta hanao, dra Yaveh Zagnaharinao gny namoaky anao tagny tamigny alalanigny tagna mahery vo fanizira gny sandry. Noho zay gny nandidian'i Yaveh Zagnaharinao anao ba hitandry gny andro Sabata. ¹⁶ Magnaza gny ranao vo gny reninao, araky ze nandidian'i Yaveh Zagnaharinao ho hataonao, dra ho ela velo agny amigny tany ze namen'i Yaveh Zagnaharinao honao hanao, dra hahasambasy anao anie zay. ¹⁷ Ka mamono olo. ¹⁸ Ka mizangazanga. ¹⁹ Ka mangalasy. ²⁰ Ka manao vavolombelo diso amigny piara-belon'aminao. ²¹ Ka misiririsy gny valinigny piara-belon'amindrareo, ka misiririsy gny tragnonigny piara-belon'amindrareo, gny sahany, na gny panopo lahiny na gny panopo vaviny, gny agnombiny na gny borikiny, na ze tokony hatao amigny piara-belon'amindrareo aza.' ²² Reo zaka reo gny nambaran'i Yaveh tamigny feo abo tamigny fengonandrareo gny fa tegnyamigny tendrombohisy abo ao agnevonigny afo, gny raho, dra gny ezi-pito; dra sy nagnisy zaka fagnapiny sasy izy. Nisoratiny tamigny vato pisaky ro zay dra natolony anahy. ²³ Dra nitranga zao, gny fa nahare gny feo boak'ao agnevonigny ezy handrareo, raha bo nirehisy gny tendrombohisy, dra nagnariny anahy handrareo__reo loholondrareo aby vo reo pitariky gny fokondrareo. ²⁴ Hoy handrareo ho: 'Ingo, Yaveh Zagnaharisika fa nahare tamisika gny voninahiny vo gny fahalahibeny, dra fa resika gny feony boak'eo agnevonigny afo; hitasika androany fa gny fa mizaka amigny olo i Yaveh, dra afaky gny ho velo ereo. ²⁵ Fa hagnino isika gny tokony ho maty? Akory handova asika zay afo lahibe zay; fa raha sy miteno gny feon'i Yaveh Zgnaharisika sasy isika, dra ho maty. ²⁶ Fa iza akoasy asika gny eo amigny nofo aby ze fa nandre gny feonigny Zagnahary velo nizaka boak'eo agnevonigny afo dra velo, manahaky ze fa nataosika? ²⁷ Raha gny amindrareo, dra tokony handeha vo hiteno ze zakan'i Yaveh zagnaharisika aby handrareo, hagnery aminay ze zakan'i Yaveh zagnaharisika amindrareo aby, hiteno vo hakato anizay zahay.' ²⁸ Ren'i Yaveh gny zakandrareo raha nizaka taminahy handrareo. Hoy Izy taminahy ho: 'Fa reko gny zakan'ireo vahoaky reo, dra ze nizakany taminao. Soa ze nambaran'ereo. ²⁹ Endrey, raha ba misy fo vatany ereo, dra hagnaza Anahy vo hitandry mandrakariva gny didiko aby, dra hahasoa anereo vo reo taranany mandrakizay zay! ³⁰ Ndeha zakao amin'ereo ho: "Miheregna agny an-daindrareo." ³² Ho tandrema, noho zay, ze nandidian'i Yaveh Zagnaharinao hanao; ba sy hivily ho amigny akavana na ho amigny akavia hanao. ³³ Handeha amigny lalan'aby ze nandidian'i Yaveh Zagnaharinao anao hanao, ba ho velo hanao, dra hahasoa anao zay, dra ba hahalava gny andro iegnanao agny amigny tany ze ho fanagnanao.