¹ Tafaranigny nahafatesan'i Saoly, dra nihery boak'agny amigny fanafiha an'ireo Amalekita i Davida dra nizano tao Ziklaga nandrisy gny ro andro. ² Tamigny andro fahatelo, dra nisy lelahy raiky nindray tamigny fekazoa rotarota vo loto teo amigny lohany gny avy tagny amin'i Davida iza dra nekohaky tamigny tany dra nagnondriky gny vatany. ³ Hoy i Davida taminazy ho: "Boak'eza hanao?" Namaly izy ho: "Nienga boak'agny amigny tobin'Israely zaho." ⁴ Hoy Davida taminazy ho: "Zakao anahy re gny fisehoanize raha zehoky." Namaly izy ho: "Nienga tamigny aly reo vahoaky. Maro gny lavo maro gny maty. Saoly vo i Jonatana zanadahiny koa dra maty." ⁵ Hoy Davida tamigny tovolahy ho: "Ino gny ahafatarandrareo fa maty i Saoly vo i Jonatana zanany?" ⁶ Namaly gny tovolahy ho: "Kisendrasendra gny naha-teo amigny tendrombihis'i Gilbona anahy, dra ingo Saoly nitehy tamigny lefony, dra reo kalesy vo reo pitikisy anazy dra teo apanamboran'anazy. ⁷ Nihodikody i Saoly dra nahita anahy dra nitoka fatrasy anahy. Dra namaly zaho ho: 'Tihoky zaho.' ⁸ Hoy izy taminahy ho: 'Iza hanao?' Namaly anazy zaho ho: 'Amalekita zaho.' ⁹ Hoy izy taminahy ho: 'Misangana re eto agnilako dra vonoy zaho, fa fahoria lahibe gny mazo anahy, kanefa bo ato aminahy gny ay.' ¹⁰ Noho zay dra nagnato teo aminazy zaho dra namono anazy, akory fataso fa sy ho velo izy tafaranigny nahalavo anazy. Boak'eo dra nalako gny satro-boninahisy ze teo amigny sandriny, dra nandesiko eto aminao reo, ry topoko." ¹¹ Boak'eo dra naniasy reo fekazoany i Davida, dra nanao manahaky anizay koa reo olon'aby nindray taminazy. ¹² Nandala ereo, nitomagny, dra nifaly hany ho an'i Saoly mandapa-hariva, ho an'i Jonatana zanadahiny, ho an'ireo vahoakin'i Yaveh, dra ho anigny akohonan'Israely akory lavo tamigny sabasy ereo. ¹³ Hoy Davida tamigny tovolahy ho: "Boak'eza hanao?" Namaly izy ho: "Zanaky gny vahiny raiky eo amigny tany zaho, Amalekita raiky." ¹⁴ Hoy Davida taminazy ho: "Nagnino hanao gny sy natahosy namono gny pazaka voahosos'i Yaveh tamigny tagnanao avo?" ¹⁵ Nitoka gny raiky tamireo tovolahy i Davida dra nizaka ho: "Mandehana dra vonoy izy." Ko nandeha zay lelahy zay dra namaly anazy, maty gny Amalekita. ¹⁶ Boak'eo dra nizaka tamigny fatinigny Amalekita i Davida ho: "Eo amigny lohanao gny lionao akory gny vavanao avo gny vavolombelo nanohisy anao dra nanao anizahoky ho: 'Namono gny pazaka voahosos'i Yaveh zaho."' ¹⁷ Boak'eo dra nihira ty hira fandala momban'i Saoly vo i Jonatana zanadahiny tihoky i Davida, ¹⁸ Nibaiko gny vahoaky izy ba hapianasy anizay Hirany gny sipiki zay an'ireo zanadahin'i Joda, ze voasorasy ao amigny bokin'i Jasara. ¹⁹ "Gny voninahisao, ry Israely, dra maty, voavono teo amigny toeran'abo! Endrey gny fahavalonigny mahery! ²⁰ Ka zaka ao Gata zay, ka zaka egny amireo lalan'i Askelona, ba sy ho afaky hifaly reo zanakapelanigny Filistina, ba sy hakalaza reo zanakapelanigny sy voafora. ²¹ Ry Tendrohis'i Gilboa, sy hisy ando vo ora anie eo aminao, na saka magnome voa ho fagnatisy, akory teo gny ferovanigny mahery gny voaloto. Gny ferovan'i Saoly dra sy voahososy amigny menaky sasy. ²² Boak'amigny lion'ireo mahery, dra sy nihery gny sipikan'i Jonatana, dra sy nihery foa gny sabas'i Saoly. ²³ Saoly vo i Jonatana dra tia mamindra fo teo amigny fiegnany, dra sy nisahira ereo tamigny fahafatesan'ereo. Malaky noho gny voromahery ereo, natazaky noho gny liona. ²⁴ Handrareo ry zanakapelan'Israely, mitomagnia an'i Saoly, ze napekazo zaky vo firavaky andrareo, dra ze nametaky firavaky volamena teo amigny akazondrareo. ²⁵ Endrey gny fahavalonigny mahery teo agnevonigny aly! Nivono teo amigny toeranao abo i Jonatana. ²⁶ Ory nohonigny aminao zaho, ry Jonatana rahalahiko. Tena malala taminahy hanao. Mahita gny fitiavanao anahy, mihoasy noho gny fitiavan'ireo apela. ²⁷ Endry gny fahalavonigny mahery, vo gny fahalevognan'ireo fitovan'aly!"