¹ Amizao, ry malala, manorasy ty taratasy faharo tihoky ho andrareo zaho ho fapahasiahiva andesy hapirisiha gny saindrareo malio, ² ba hahaserovandrareo reo zaka nizakanigny paminany masy taloha vo gny lilinigny Topo vo gny pamozy asika ze namen'ireo apostolindrareo. ³ Fataro aloha zao, fa gny panirasira dra ho avy amigny andro farany. Ereo dra hagneso vo handeha araky gny filan'ereo manoka. ⁴ Ereo dra hizaka ho: "Eza gny fapanatena gny amigny fiheregnany? Fa hatrizay nolianigny razambe mandry, dra sy niova gny raha aby, eh fa hatramigny fiatombohan'izao totolo izao aza." ⁵ Ereo dra minia magnaligno fa gny lagnisy vo gny tany dra nisy boak'amigny rano vo tamigny alalanigny rano, fotoa ela, ⁶ nohonigny lilin'Agnahary, dra tamigny alalan'ireo raha reo, gny nandrava gny totolo tamizay fotoa zay, tamigny tondradrano. ⁷ Fa amizao gny lagnisy vo gny tany dra natoka ho anigny afo amigny alalan'io lily io avo koa. Ereo dra voatoka ho amigny andronigny fisara vo gny fandringana gny olo rasy fagnahy. ⁸ Aoky sy ho halignondrareo, ry malala, fa gny andro raiky amigny Topo dra manahaky gny arivo tao, dra gny arivo tao manahaky gny andro raiky. ⁹ Gny Topo dra sy ela amigny fagnatateraha reo fapanatenany, araky ze zakanigny ilany ho fahelany. Fa ko, Izy dra maharisy amindrareo. Sy tiany hisy ho levo handrareo, fa ba ho avy amigny fibebaha gny olon'aby. ¹⁰ Na izay aza, ho avy manahaky gny pangalasy gny andronigny Topo: Gny lagnisy dra hazavo miaraky amigny feo fatrasy. Gny raha aby dra ho amigny afo, dra gny tany vo asa ao aminazy dra hotalily. (Fagnamariha: Reo dika-zaka ilany dra mivaky manahaky anizao: "Gny raha aby dra ho manigny afo, dra gny tany vo gny asa ao aminazy dra horoa.") ¹¹ Ko gny ho levo manahaky anizay zao raha aby zao, dra tokony ho olo manao akory handrareo? Tokony hiay amigny fahamasinga vo gny fiegna araky an'Agnahary handrareo. ¹² Tokony haneta vo hagnalaky gny fiavianigny andron'Agnahary handrareo. Amizay andro zay, gny lagnisy aby dra ho levonigny afo, dra gny raha avy dra hiepo amigny hafanam-be. ¹³ Fa araky gny fapanatena, dra mandigny gny lagnisy vaovao vo tany vaovao sika, ze hisy gny fahamarigna. ¹⁴ Noho izay, ry malala, akory magneta anizay raha zay handrareo, manova gny soa boak'amindrareo ba sy hisy pety vo sy hanasigny eo agnatrehany, apiadagna. ¹⁵ Dra erisereto avo koa gny faharetanigny Toposika amigny famozena, manahaky gny nisoratin'i Paoly rahalahiny malalasika tamindrareo, araky gny fahendre ze name anazy. ¹⁶ Paoly dra mizaka anizay raha zay ao amigny taratasiny aby, ze misy sorasy takary. Olo sy misy fahalala vo sy miory gny magnova reo raha reo, manahaky gny hanovany reo sorasy masy hafa avo koa, dra mahavy fahalevogna ho anigny vatany. ¹⁷ Noho izay, ry malala, akory fatandrareo zay raha zay, dra tandremo gny vatandrareo ba sy ho voafandriky gny fitakigny olo rasy fagnahy dra ho levo gny fahamarignandrareo. ¹⁸ Fa mitomboa amigny fahasoava vo gny fahalala gny Toposika vo i Jesosy Kristy Pamozy asika. Ho anazy gny voninahisy amizao dra ho mandrakizay. Amena.