¹ Amizao mizaka mazava soa gny fagnahy fa amigny fotoa agny afara agny dra hiala amigny finoa gny olo ilany dra mitandrema soa gny amireo fagnahy pamitaky vo reo fapenaran'ireo demonia ² amigny fihasambelasihinigny pavandy. Fa voamariky amigny vy ma gny feonigny fieriseretan'ereo. ³ Ho raran'ereo gny manambaly vo gny mitakasy reo hany ze nifognin'agnahary ho zara miaraky amigny fisora eo amireo ze mino vo ze mahafatasy gny mary. ⁴ Fa gny raha aby ze niforognin'Agnahary dra soa. Sy misy ho lavy gny raha nitakarisika tami-pisora. ⁵ Fa nihamasiny tamigny zakan'Agnahary vo gny vavaky zay. ⁶ Raha atobindrareo eo anoloan'ireo rahalahy reo raha reo, dra ho panopo soan'i Jesosy Kristy handrareo. Fa niteza tamireo zakanigny finoa vo tamigny fapenara soa ze narahindrareo handrareo. ⁷ Fa lavo gny vandy tataranigny apela atisy. Fa koa, tariho hagnome voninahisy an'Agnahary gny vatandrareo. ⁸ Fa gny vata ho fany dra masaiky avo gny azo apiasa anazy, nefa fapesa amigny raha aby gny toesy araky an'agnahary. Mihazo gny fapanatena ami'ty fiegna amizao tihoky vo gny fiegnako aby. ⁹ Ty hafasy tihoky dra mendri-pitokisa vo mendriky gny fahafenonigny fagneke. ¹⁰ Fa noho izay dra hitolo vo hiasa fatrasy sika. Fa matoky ao amin'Agnahary velo isika, ze pamozy gny olon'aby, indrindra reo ze mino. ¹¹ Talilio vo apenaro reo raha reo. ¹² Aoky sy hisy olo hanao sinosino gny fahatanoranao. Fa koa, aoky ho ohasy ho an'ireo ze mino, amigny fizaka, fitondra-tegna, fitiava, finoa, dra fahadiova. ¹³ Mandra-pahaviko, tohizo gny famakia, gny fagnanara, vo gny fapenara. ¹⁴ Ka atao sinosino gny fagnomeza-pahasoava ze ao aminao, ze name anao tamigny alalanigny faminania, nindray tamigny fametraha-tagnan'ireo loholo. ¹⁵ Arovy reo raha reo. Meteza ho ao amin'ereo, ba hiharihary amigny olon'aby gny fandrosoanao. ¹⁶ Tandremo soa gny vatanao vo gny fapenara. Tohizo reo raha reo. Fa raha manao manahaky anizay, dra ho vozenao gny vatanao vo reo miteno anao.