¹ Maro reo niezake nanoratre tantara mikasike reo zaka-niseho te nisy teto amintika, ² arake ze le fa naolora iereo aze tamintika, te le fa vavolombelo nagnatre maso vaho mpanompo ty tsara zisikagne amboalohane. ³ Naho amiko avao kea le hoe mete- laha fa nagnotane soa ty fandeha ty zaka iaby hatramity voalohane- ty hanoratre talily arake ty filaharane ho anao, ry7 Teofilo soa vatane. ⁴ Zay le mba hahaianao ty mare miomba roe zaka ze nampianare anao. ⁵ Tamity andro Heroda, mpanjaka Jodia, le nisy raike tamity mpisoro atao ty hoe Zakaria, bakamity antoko Abia. Ty valine le bakamity anakampela Arona, naho ty agnarane le Elizabeta. ⁶ Sambe mare tagnoloan'Agnahare iereo, naho nino reo lily iaby vaho reo fotsipeke Tompo. ⁷ Fa tsy nanagnanake nefa iereo, satria tsy miterake Elizabeta, naho sambe le fa antetre iaby kea ie roe tamize andro zay. ⁸ Naho zay le mikasike Zakaria tagnoloan'Agnahare, nanao reo asa ty soro arake ty fifampisoloa ty isan-tokone. ⁹ Arake ty fomba fatao iereo ty amity fifilia mpisoro ze tokone hanompo, le voafily ty Kodia kede hilitre hagnoro ty emboke magnitre ao antempoly Tompo re. ¹⁰ Tamity lera nagnoroa ty emboke magnitre le nivavake tegne ambalike ty vahoake iaby. ¹¹ Naho nisy anjele Tompo niseho tamine naho nitsanga tankavana ty alitara nisy emboke magnitre. ¹² Laha fa nahita aze ty Zakaria, le natahotre naho vatane natahotre re. ¹³ Fa hoe ty anjele tamine:" Ko matahotre, ry Zakaria, te fa nidranjigne ty vavakenao. Hisy aja lahy aminao ty Elizabeta valinao. Jaona ro hataonareo agnarane. ¹⁴ Hanam-pifalea vaho haravoa riha, naho maro kea ro ho fale amity haterahane. ¹⁵ Satria ho foloay re eo amaso Tompo. Tsy hino divay ndra zaka nome mahere vatane re, naho ho feno ty Fagnahy Masy zisikagne antron-drenene re. ¹⁶ Maro amity vahoake Israely ro hitolike amy Tompo Zagnahare iereo. ¹⁷ Handeha aloha ty vata Tompo eo amity fagnahy vaho ty here Elia re. Zay ro ataone le ty mba hitoliha ty arofo ty rae amity anaka, mba handehana ty tsy magnenke amity lala ty hamarea ty mare mba hagnoma vahoake te fa vogno hoahy Tompo ro homane hoaze." ¹⁸ Naho Zakaria nirehake tamity anjele ty hoe:" Akore ro hahaizako zay? Fa zaho te fa antetre naho ty valiko kea.' ¹⁹ Naho hoe ty anjele namale vaho nirehake tamine:" Zaho ro Gabriela, ty mitsanga eo agnoloan'Agnahare. Naho voairake raho mba hitalily aminao, handay ze vaovao soa zao aminao. ²⁰ Ka ingo! Ho moa riha, ke tsy afake hirehake, mandram-piavy ty andro hisehoa reo zaka reo. Satria tsy nino ty nirehako riha, te ho lefe amity andro voamare." ²¹ Naho ty vahoake rerake niambe Zakaria. Gaga naho ty fijanognane ela teo an-tempoly iereo. ²² Ta laha fa niakatre re, le tsy afake nirehake tamiereo. Naho hay iereo fa nahita fahitaha re tamity ao an-tempoly. Nanao baiko moa tamiereo re naho nijano ho moa. ²³ Naho laha fa avy ty andro fitampera ty fanompoane, le lasa noly8 tagne antragnone re. 24Tafara reo andro reo, le ni betroke ty Elizabeta naho nietake zisike ty dime vola. Hoe re ty hoe: ²⁵ "Zao ro natao ty Tompo hoahy laha fa nitsinjo ahy Re mba hagnafake ty hegnako eo agnoloa ty ndaty." ²⁶ Teo amity fahaenem-bola, le nirahen'Agnahare ty anjele Gabriela nimbaeo amity tana raike tao Galilia atao ty hoe Nazareta, 27hoagne amina verijine raike te valina lahilahy atao ty hoe Josefa. Te mboe foko Davida re, naho ty agnara ty verijine le Maria. ²⁸ Nimbaeo amine re naho nanao ty hoe:" Arahaba, ry iaze nihasoave vatane! Ty Tompo ho aminao ao." ²⁹ Fa vatane vere hevetre tamity rehane re nagnontane vata ty hoe karaza fanalama hoe ty ino zay. ³⁰ Hoe ty anjele tamine:" Ko matahotre, ry Maria, fa le fa nahita hasoa tamin'Agnahare riha. ³¹ Ingo, ho be troke riha ka hiterake lahilahy. Naho ty agnarane hatao ty hoe' Jesosy.' ³² Ho bey Re naho hatao ty hoe Ana ty agnabo vatane. Ty Tompo Zagnahare hagnomea Aze ty sezan-droandria Davida razambeine. ³³ Naho hanjaka zisikezay amity foko Jakoba re, naho tsy ho tampetre ty fanjakane." ³⁴ Hoe ty Maria tamity anjele:" Akore ro hisehoa zay, fa mboe tsy niara-niroro tamina lahilahy raho?" ³⁵ Ty anjele namale vaho nanao tamine hoe:" Hipoke aminao ty Fagnahy Masy, naho ty here ty agnabo Vatane ro hoavy aminao. Ka ty masy ho lefe le hatao ty hoe Anan'Agnahare. ³⁶ Ingo, Elizabeta longonao le nibetroke lahilahy avao kea ndra le tamity fiterahane aza. Te fa enem-bola ty aze zao, re ty aze atao ty hoe tsy miterake. ³⁷ Satria tsy misy zaka tsy ho azo atao amin'Agnahare." ³⁸ Hoe ty Maria:" Ingo, zaho ro mpanompo vave Tompo. Ao ho lefe amiko zay arake ty hafanao." Naho niala tamine eo ty anjele. ³⁹ Naho tamize andro zay ty Maria le nandeha malaky nimbaeo amity tane ambone, agne amity tana Jodia. ⁴⁰ Nimbaeo amity tragno Zakaria re naho nanalama Elizabeta. ⁴¹ Naho laha naharey ty salama Maria ty Elizabeta, le nibitake ty kolo antrone ao, naho feno ty Fagnahy Masy Elisabeta. ⁴² Nagnadram-peo vaho nirehake mafe re ty hoe:" Nihasoave naho ty ampela iaby riha, naho nihasoave ty natera ty trokenao. ⁴³ Nagnino zay ro miseho amiko fa ty rene Tompo ro avy hamonje ahy? ⁴⁴ Fa ingo, laha fa niavy tantsofiko eo ty salamano, le nanao hafalea ty kolo antroko ato. ⁴⁵ Sambatre re ty nino fa ho lefe reo zaka ze nirehafe Tompo tamine." ⁴⁶ Hoe ty Maria:" Miantsa Tompo ty fagnahiko, ⁴⁷ naho ty fagnahiko nifale amin'Agnahare ao mpamonje ahy. ⁴⁸ Fa nagnete ty fahantra ty mpanompo vavene Re. Naho ingo, manomboke zao ty foko iaby hikaike ahy ty hoe sambatre. ⁴⁹ Satria nanao zaka bey tamiko ty mahefa ty zaka iaby, naho masy ty agnarane. ⁵⁰ Fa mahita hoahy ty foko afara ze matahotre aze ty fandeferane. ⁵¹ Nanoro ty herene tamity sandrine re; naho nanjara reo ze nirehareha tamity dine ty arofo iereo. ⁵² Naongane tamity sezan-droandriane ty anadahy ty mpanjaka naho reo ambane nakarene. ⁵³ Nataone voky zaka-soa reo kere, fa ty mpagnarivo nataone tsy nana ndra ino ino. ⁵⁴ Nagnomea fagnampea Israely mpanompone Re, mba hahatiarovane hanoro fandefera ⁵⁵ (arake ty nirehafene tamireo raentika) tamy Abrahama vaho ty fokone zisikagne." ⁵⁶ Nijano nitoboke tao amy Elizabeta tokone ho telo vola ty Maria naho bakeo nihere tagne antragnone. ⁵⁷ Naho avy ty fotoa hiteraha Elizabeta ty anane naho niterake ajalahy re. ⁵⁸ Naharey ty fandeferam-bey natao Tompo tamine reo mpiara-belo amine vaho reo longone, naho niara-fale tamine iereo. ⁵⁹ Naho tamity andro fahavalo le lasa hanavatre ty kolo iereo. Fa ho natao iereo ty hoe" Zakaria," arake ty agnaran-draene re. ⁶⁰ Fa ty renene kea namale naho nanao ty hoe:" Aha. Jaona ro hikaiha aze." ⁶¹ Naho hoe reo tamine:" Tsy misy amity longonao kaihe amize agnara zay." ⁶² Nanao baiko moa tamity raene iereo ty amity teane hatao agnarane. ⁶³ Nangatake aridoazy fanorata ty raene naho nanoratre ty hoe:" Jaona ro agnarane." Naho le gaga tamizay ie iaby. ⁶⁴ Naho niarake tamizay le nivoha ty vavane naho nafaha ty lelane. Nirehake re naho niantsa an'Agnahare. ⁶⁵ Niavy amireo iaby nagnodidy iereo ty tahotre. Naho niele era ty tana ambone Jodia ty zaka niseho iaby teo. ⁶⁶ Naho reo iaby naharey reo le nahazo rey tangnarofone ao, naho nanao ty hoe:" Ho lasa ino are ty kolo toy?" Fa miomba aze ty tagna Tompo. ⁶⁷ Naho feno ty Fagnahy masy Zakaria rane naho namisavisa, ka nanao ty hoe: ⁶⁸ "Antsae anie ty Tompo, Zagnahare Israely, fa niavy nagnampe vaho nanao ty fagnafaha hoahy ty vahoakene Re. ⁶⁹ Nagnakatre ambone ty trifam-pagnavota hoantika ao antragno Davida mpanompone Re, ⁷⁰ manahake ze nirehafene tamity vava reo mpamisavisa masy tamity andro taloha tagne. ⁷¹ Handay famonjea amity fahavalontika vaho amity tagna reo iaby malay antika re. ⁷² Zay ro hataone le ty mba hanoroa ty fandefera amireo raentika vaho hampahatiarova ty fagnekeam-pilongoa ty Masy, ⁷³ le ty fifanta natalily tamy Abrahama raentika. ⁷⁴ Nifanta ty hahazoantika, laha fa afake tamity tagna ty fahavalontika, manompo Aze tsy amin-tahotre, ⁷⁵ am-pahamasigna vaho ampahamarea eo agnoloane amity androntika iaby. ⁷⁶ Egne, naho riha, ry kolo, le hatao ty hoe mpamisavisa ty Ambone Vatane, fa handeha hialoha ty tarehe Tompo riha naho hamboatre ty lala, mba hagnoma ty ndaty ty amity fiaviane, ⁷⁷ mba hagnomea fahaiam-pamonjea hoahy ty ndaty amity alala ty famotora ty helo iereo. ⁷⁸ Zay ro hiseho le naho ty fandefera masin'Agnaharentika, naho ty amizay ro hiakara ty masoandro bakamity ambone mba hoavy hagnampe antika, ⁷⁹ hagnazava reo ze mitoboke ao agnate ty ieke vaho reo ao agnate ty aloke ty fate. Hataone zay mba hitariha ty tombontika amity lalam-pilamina." ⁸⁰ Naho ty kolo le nitombo naho lasa nahere amity fagnahy, naho tagne agnefetre re mandram-pahavia ty andro hiboahane miharehare amy Israely.