¹ Laha misy ndaty magnomey soro, zay fagnati-pilongoa amy ty raike amy reo biby bak'amy ty andian'aombe, na lahy na vave, le lonike re hagnomey biby tsy nisy handra eo agnoloa Yaveh. ² Hametrake ty tagnane eo an-doha ty fagnatine re vaho hamono zane eo ambavaravara ty lay fihaogna. Vaho reo anandahy ndre Arona mpisoro hamitsike ty lio zane amy reo lafy ty alitara. ³ Hagnomey soro ty fagnati-pilongoa amy ty afo ho ahy yaveh iaze lehilahy. Ty sabora zay mandrakotse na mifandray amy ty zaka agnaine, ⁴ naho reo voa roa naho ty sabora zay eo amy iareo amy ty alala ty valahane, vaho ty ila ty atine, miarake amy ty voane__le ho afahane zane iaby zane. ⁵ Reo anandahy ndre Arona le hagnoro zane eo ambony ty alitara miarake amy ty fagnatitse oroa zay ambony ketay famirehitse. Hamoake hagnitse moramora ho ahy Yaveh zane; ho fagnatitse oroa natao ho Aze amy ty alala ty afo zane. ⁶ Laha ohatsy bak'amy ty aondre amy ty aose ro soro ty fagnati-pilongoa iaze lehilahy ho ahy Yaveh; na lahy na vavy, le tsy maintse magnomey soro tsy misy handra re. ⁷ Laha magnomey anak'aondre ho ataone soro re, le tsy maintse omeine eo agnoloa Yaveh zane. ⁸ hametrake ty tagnane eo an-doha ty sorone naho hamono zane eo agnoloa ty lay fihaogna re. Vaho hamitsike ty lione amy ty sisy ty alitara reo anandahy ndre Arona. ⁹ Hagnomey ty soro ty fagnati-pilongoa ho fagnatitse natao tamy ty afo ho ahy Yaveh iaze lehilahy. Ty sabora, ty rambo vondrake iaby le hotapahy marinike ty taolan-dombosine, vaho ty sabora zay mandrkotse reo zaka agnaine naho reo sabora iaby zay marinike reo zaka agnaine, ¹⁰ vaho reo voa roa naho ty sabora zao ao apo reo, zay ao ampo ty valahine, vaho ty ila-atine, miarake amy reo voa__le hafahane zane iaby zane. ¹¹ Le hangnoro zane iaby zane eo amy ty alitara ho fagnatitse oroa hatavae ho ahy Yaveh ty mpisoro. ¹² Laha ohatsy ke aoselahy ro fagnatits'iaze lehilahy, le hagnomey zane eo agnoloa Yaveh re. ¹³ Loniuke re hametrake ty tagnane eo an-doha ty aoselahy vaho hamono zane magnoloa ty lay fihaogna. Le hamafy ty lio zane amy ty lafy ty alitara reo anandahy ndre Arona. ¹⁴ Hagnomey ty sorone natao tamy ty afo ho ahy Yaveh iaze lehilahy. Hagnafake ty sabora zay mandrakotse reo faritse agnate re, vaho ty sabora iaby marinike reo faritse agnate. ¹⁵ Hagnafake ty voa roe naho reo sabora zay miarake amy reo reke, zay marinike ty valahy, vaho ty ila-atine miarake amy ty voa. ¹⁶ Hangnoro zane iaby zane eo ambony alitara ho fagnatitse hotave natao tamy ty afo ty mpisoro, soa hamoake hagnitse moramora. Ahy Yave ty sabora iaby. ¹⁷ Ho lalàgna zisikam-parane eo amy ty taranakareo fara mandimby amy zay toera iaby hitobohanreo zane, le lonike tsy hitava sabora na lio nareo."'