¹ Laha misy manday fagnatitse voa ho ahy Yaveh, le lonike ho koba soa lisa ty fagnatine, vaho hagnily menaky eo amy zane naho hametrake liten-ketae magnitse eo ammy zane re. ² Handay ty fagnatitse eo amy reo mpisoro ana ndre Arona re, le hangalake koba soa lisa feno ty tagna miarake amy ty menake naho liten-ketae magnitse eo amy zane ty mpisoro. Le hagnoro ty fagnatitse eo amy ty alitara ho fagnati-pahatiarova ty mpisoro. Hampiboake hagnitse soa ho ahy Yaveh zane; ho fagnatitse natao tamy ty afo ho Aze. ³ Zay iaby tavela amy reo fagnatitse hohane le ho ahy ndre Arona naho reo anandahine. Masy vantane bak'amy reo fagnntitse ho ahy Yaveh natao tamy ty afo ho ahy Yaveh zane. ⁴ Laha magnomey fagnatitse voa tsy misy lalivay zay niketrehy tamy ty lafaoro iriha, le lonike ho mofo maleme vita tamy ty koba soa lisa miharo menake zane, ne mofo mafy tsy misy lalivay, zay vaohosotse menake. ⁵ Laha niketrehy tamy ty lasitse vy mpisake ty fagnatitse voa, le lonike ho avy amy ty soa lisa tsy misy lalivay zay mihsro menake zane. ⁶ Hozarainao zane vaho hagnilignanao menake eo amine. Zane ro fagnatitse oroa. ⁷ Laha neketrihy tamy ty lasittse ty fagnatitse voa anao, le lonike atao amy ty koba soa lisa naho menake zane. ⁸ Lonike handay fagnatitse voa natao tamy reo raraha reo ho ahy Yaveh iriha, vaho zane le homea eo amy ty mpisoro, zay handay zane eo amy ty alitara. ⁹ Bak'eo le hangalake sasane amy ty fagnatitse amy ty voa ho fagnati-pahatiarova ty mpisoro, vaho hagnoro zane eo amy ty alitara re. Ho fagnatitse natao tamy ty afo zane, vaho hahaavy hagnitse sitrake ho ahy Yaveh. ¹⁰ Zay amby ty fagnatitse hohane le ho ahy ndre Arona naho reo anandahine. Masy le masy bak'amy ty fagnatitse atao amy ty afo ho ahy Yaveh zane. ¹¹ Tsy hisy fagnatitse voa homeinao ho ahy Yaveh le hisy lalivay, satria tsy tokone hagnoro masirasiraa, na tantele, ho fagnatitse natao tamy ty afo ho ahy Yaveh iriha. ¹² Hagnomey reo ho fagnatitse voaloham-bokatse ho ahy Yaveh iriha, feie tsy hampiasa hamoaha hagnitse soa eo amy ty alitara reo. ¹³ Lonike hagnomey tsiro ty kiraikiraike amy ty fagnatitse voa amy ty sira iriha. Lonike tsy ho alignonao vantane amy ty fagnatitse voa ty sira ty fagnekea ty Andragnaharenao. Magnomeza sira amy reo fagnatitsao iaby. ¹⁴ Laha magnomey fagnatitse voa amy ty voaloham-bokatse ho ahy Yaveh iriha, le magnomeza voa vaovao zay natono tamy ty afo naho nipotehy ho mahatajake bak'eo. ¹⁵ Le lonike hagnisy menake naho liten-ketae magnitse ao amy zane iriha. Zane ro fagnatitse voa. ¹⁶ Vaho hagnoro ty sasane ty voa voalisa naho menake vaho liten-ketae magnitse ho fagnati-pahatiarova ty mpisoro,. Zane ro fagnatitse natao tamy ty afo ho ahy Yaveh.