¹ Tamize andro zay Debora vaho Baraka anagn'i Abinoma le niantsa ty hira toy: ² "Laha fa mitarike reo mpitarike ao Israely, laha fa manolo-bata am-pifalea ho amity aly ty vahoake le miantsa Yaveh tika! ³ Midranjigna, nareo mpanjaka! Mifantoha, nareo mpitarike! Izaho, izaho le hiantsa ho ahy Yaveh; hiantsa fifalea ho ahy Yaveh, ty Zagnahare Israely raho. ⁴ Yaveh, laha fa niakatre bakagne Seira riha, laha fa nindeha bakagne Edoma riha, le hihorohoro ty tane, naho nihovitrovitre kea ty lagnitse; naho ty raho nampipoke rano avao kea. ⁵ Nihovitrovitre teo agnoloa ty vata Yaveh ty vohitse; na ty vohitse Sinay aza le nihovitrovitre teo agnoloa ty vata Yaveh, ty Zagnahare Israely. ⁶ Tamity andro i Samgara(anadahign'i Anata), tamity andro i Jaela, niala reo lalam-bey, naho reo ze nindeha avao ro nampiasa reo sakeli-dala miotakotake. ⁷ Tsy ampe ty mpialy tagne Israely, mandra-pandiliako, zaho Debora__ty rene mpandily tao Israely! ⁸ Tamy iereo nifily reo zagnahare vaovao, le nisy aly teo amity vavahady ty tana kanefa tsy nisy ampinga na lefo hisake teo amireo ndaty efetre ale tao Israely. ⁹ Ty arofoko magnenke ty mpandily ty Israely, miarake amireo vahoake ze nanolo-bata ampifalea__isaora ty Yaveh noho iereo! ¹⁰ Dineho zao__nareo ze mitikitse ampondra foty mitoboke eo amity lamba ho solo ty lasele, naho nareo ze mindeha amity lala. ¹¹ Dranjigno ty feo gnireo ze miantsa eo amity tane fanondraha. Agne ro paie iereo ndraike ty hamarea ty asa Yaveh, vaho ty fahitia ty asa reo mpialine tagne Israely. Bakeo le nizotro teo amity vavahady ty tana reo vahoake Yaveh. ¹² Mifihaza, mifohaza, ry Debora! Mifohaza, mifohaza, miantsa antsa! Mitsangana, ry Baraka, ento ty Gadranareo, riha ry anadahign'i Abinoma. ¹³ Bakeo le nizotro teo amireo ndaty manan-kaja reo sisa velo; nizotro nimbaeo amiko niarake tamireo mpialy ty vahoake Yaveh. ¹⁴ Bakagne Efraima iereo, ty fotora iereo le agne Amaleka; nagorike anareo reo vahoake Benjamina. Nizotro bakagne Makira reo mpifehe, naho bakagne Zebolona reo ze minday ty tehe ty manan-kasy. ¹⁵ Niarake tamy Debora reo andriako tao Isakara; naho Isakara niarake tamy Baraka nikoropake nagnorike aze tagne am-baibo ty aze ambane fehene. Tao amireo foko i Robena le nisy fikasa ty arofo foloay. ¹⁶ Nagnino riha ro mitoboke eo agnivo vala, mijano reo mpiarak'agnondry mitioke ty sody ho ahy ty agnondry aman'ose? Laha ty amity foko i Robena le nisy fikasa ty arofo foloay. ¹⁷ Nijano tagne andafe i Jordana ty Gileada; naho Dana, nagnino re ro nivezeveze tegne ambone sambo? Nijano tegne amoron-driake ty Asera naho nitoboke agnila ty seragnan-tsambo. ¹⁸ Zebolona le foko nanao vy vere ty aine zisike ty fifateza, naho Naftaly, avao kea, le teo amity baibon'aly. ¹⁹ Avy reo mpanjaka, nialy iereo; nialy tagne Tanaka teo antsisy ty rano i Megido reo mpanjaka i Kanana. Nefa tsy nangalake volafoty ho ravae iereo. ²⁰ Bakegne amity lagnitse ro nialia gnireo kinta, bakegne amity lala iereo magnera ty lagnitse ro nialia gniereo tamy Sisera. ²¹ Namaoke iereo ty Renerano Kisona, renerano faha-raza, ty renerano Kisona. Mindena avao ry fagnahiko, mimafea! ²² Naho le nikatrokatroke ty kitro ty soavale__milaisa, le ty lailay gnireo maherene. ²³ 'Ozogno Meroza!' hoe ty anjely Yaveh. 'Ozogno le ozogno ty vahoake amine ao!__satria iereo tsy avy mba hagnampe Yaveh__hagnampe Yaveh amity aly handietse reo mpialy mahere.' ²⁴ Voavonje mihoatre noho reo ampela iaby ty Jaela (ty valign'i Hebera Kenita), voavonje mihoatre noho ty ampela iaby ze mitoboke ao antragno re. ²⁵ Rano ro nangatahen-dralehilahy, naho ronono ro nomeane aze; nindaisane dibera teo ampinga natoka ho ahy ty roandria re. ²⁶ Napetrane teo amity tsatokan-day ty tagnane, naho ty tagnane havana tamity fikala ty mpiasa; le nagnisy i Sisera tamity fikala re, tinorotorone ty lohane. Laha nitsatoke ty fihirifane re le pinotepotene ho toro ty karan-dohane. ²⁷ Lavo teo agnivo ty tombone re, nitonta re naho nidaraboke teo. Teo agnivo ty tombone re ro nitsilay. Teo amity toera namonoa aze tamin-kozatre ro nahatonta aze. ²⁸ Nijilo teo andafonete re__nijilo teo amity makarakara ty lafonete ty rene i Sisera naho nikaike mafe tamity heloke ty hoe:' Nagnino ro ela loatre vaho avy ty kalesene? Nagnino ty kitro ty soavaline ty mitarike ty kalesine ro midroreratre?' ²⁹ Namale ty hendre vatane tamity roakemba, naho re vatane avao ro namale aze ty hoe: ³⁰ "Tsy fa nahisake vaho nizara ty ndevo vao iereo? Ampela raike, na ampela roe ho ahy ty isan-dahy; fadrompaha lamba mena ho ahy Sisera, fandrompaha lamba mena misy peta-kofehe, lamba mena roe misy peta-kofehe ho eo ambozognireo nadrompake?' ³¹ Ho rava anie ty fahavalonao iaby, ry Yaveh! Fa reo namanao kea le hanahake ty masoandro lafa fa miboake amity herene." Le niroro zisike ty efapolo tao ty tane.