¹ Nindeha tagne Gaza ty Samsona naho nahisake mpivaro-bata tagne, ka niarake niroro tamine re. ² Le nirehafene reo Gazita hoe:" Niavy teto ty Samsona." Linily reo Gazita ty toera, niambe aze teo amity vavahady ty tana zisike ty hale iaby iereo. Nita ty filamina zisike ty hale iaby. Nirehake re hoe:" Engao zahay hiambe zisike marandray, naho bakeo engao zahay hamono aze." ³ Nijano teo ampiroroa ty Samsona zisike sasa-kale. Tamity sasak'ale le nifoha re naho nonjonene ty vavahady vaho ty tolane roe. Nombotane niala tamity tane reo, ty fihiline vaho iaby, natobone teo antsorone zay, naho nientene niakatre tagne ambone ty tazoa reo, teo agnoloa Hebrona. ⁴ Tafarazay, le nitea ampela raike ze nitoboke tagne ambaibo Soreka ty Samsona. Delila ro agnarane. ⁵ Niavy teo amine reo mpandily reo Filistina, naho nirehake tamine hoe:" Fitaho Samsona mba hahisaha ty fatanjane bey, vaho ty fomba handreseanay aze, mba hahafahanay mifehe aze hagnafaha baraka aze. Anovo zay, le ameanay kiraikiraike aby 1.100 sekele volafoty riha." ⁶ Naho hoe ty Delila tamy Samsona hoe:" Mangatake rie, ambarao ahy ty mahavy anao vatane mafe, naho ino ro hahafaha ty ndaty mamehe anao, ka ho voafehe riha? ⁷ Hoe ty Samsona tamine:" Laha fehe iereo amity taly vaovao fito ze tsy mboe namainie raho, le lasa magnisy raho naho hanahake ty lahilahy hafa iaby." ⁸ Naho ninday taly vaovao fito ze tsy mboe namainie ho ahy Delila reo mpandily reo Filistina, naho finehene tamireo Samsona. ⁹ Naho nana lahilahy mihaja mitsy, ty niambe tao amity efetragno agnatene re. Hoe re tamine hoe:" Eo aminao reo Filistina, ry Samsona!" Nefa tinampane manahake ty tali-kofehe mikasike afo reo taly. Ka tsy hay ze tsiko ty hamafene. ¹⁰ Naho hoe Delila tamy Samsona hoe:" Zao ty fomba namitahanao ahy vaho nirehafanao vande amiko. Mangatake rie, ambarao ahy hoe ino ro hahafaha mandrese anao." ¹¹ Hoe re tamine hoe:" Laha fehe iereo amity taly vaovao ze mboe tsy niasa ho amity asa raho, le haleme raho naho hanahake ty lahilahy hafa iaby." ¹² Le nangalake taly vaovao ty Delila naho namehe aze tamireo, vaho nirehake tamine hoe:" Eo aminao reo Filistina, ry Samsona!" Ty lahilahy niambe le tao antragnone agnatene. Nefa tinampa Samsona manahake ty pote-kofehe reo taly teo amity sandrine. ¹³ Hoe ty Delila tamy Samsona hoe:" Zisike amizao riha le mboe namitake ahy naho nirehake vande tamiko. Ambarao ahy hoe nagnino ro mete haharesea anao." Fa hoe ty Samsona tamine hoe:" Laha zairenao ao amity lamba eo amity fanjaitse ty vo ty voloko misake fito, naho bakeo le fantsiho eo amity fanjaitse zay, le hanahake ty lahilahy hafa iaby raho." ¹⁴ Laha niroro re, le zinara Delila tamity fanjaitse ty foto-bolo fito tamity volone naho namantsike zay teo amity fanjaitse re, le hoe re tamine:" Eo aminao reo Filistina, ry Samsona!" Nifoha tamity rorone re naho nombotane teo amity fanjaitse ty lamba vaho ty tsatoke. ¹⁵ Hoe re tamine hoe:" Ino ro hahafahanao mirehake ty hoe:' Teako riha,' laha tsy hizara reo tsikonao amiko riha? Namitake ahy intelo riha naho tsy nirehake tamiko ty nahazoanao ze hamafe bey zao." ¹⁶ Isan'andro le nisere aze mafe tamireo rehan-drampela, naho nisere aze mafe ty mba hagniriane ho mate. ¹⁷ Le nirehafe Samsona tamine ty zaka iaby naho hoe re tamine hoe:" Mboe tsy tinampake tamity hareza vatane ty volon-dohako, satria raho le Nazirita ho an'agnahare zisikagne antron-dreneko. Ka laha harata ty lohako, le hiala amiko ty hereko, naho haleme raho ka hanahake ty lahilahy hafa iaby." ¹⁸ Laha fa hisa Delila fa nirehake ty mare momba ty zaka iaby tamine re, le nandefa vaho nikaike reo mpandily reo Filistina re, nanao hoe:" Miakara ndraike, fa le fa nirehafene tamiko ty zaka iaby." Le nimbaeo amine reo mpandily reo Filistina, ninday ty volafoty tegne antagna iereo. ¹⁹ Nataone azon-droro teo amity fene re. Nikaike lahilahy raike mba hagnaratre reo vo fito teo amity lohane re, naho nanomboke nandrese aze re, satria niala tamine ty herene. ²⁰ Naho hoe re ty hoe:" Eo aminao reo Filistina, ry Samsona!" Nifoha tamity rorone re naho nanao ty hoe:" Hiakatre manahake reo andro hafa raho naho hagnetseke malalake ty vatako." Nefa tsy haine fa le fa niala tamine Yaveh. ²¹ Nitsepake aze reo Filistina naho nagnafake reo masone. Ninday aze nizotro tagne Gaza iereo naho namehe aze tamity sene varahy. Nagnere ty fikosoam-bare tagne am-pigadra re. ²² Fa nihere nitiry ndraike ty volo teo amity lohane tafara ty nagnarata zay. ²³ Niharo nivory reo mpandily reo Filistina mba hanolotre soro bey ho ahy Dagona zagnahare iereo, naho hifale. Hoe iereo hoe:" nandrese Samsona fahavalontika ty zagnaharentika naho nametrake aze teo ampelantagnantika re." ²⁴ Laha fa nahisake aze ty vahoake, le antsa ty zagnahare iereo, satria hoe iereo hoe:" Le fa naharese reo fahavalontika ty zagnaharentika naho nagnomea aze ho antika__ty mpandrava ty tanantika, ty namono ty maro tamintika." ²⁵ Laha fa nankalaza iereo, le hoe iereo hoe:" Kaiho ty Samsona, mba hampihehe antika." Nikaike i Samsona hiakatre ty tragno maieke iereo naho nampihehe iereo. Natao iereo nitsanga teo agnivo reo ambe re. ²⁶ Hoe ty Samsona tamity ajalahy ze nita ty tagnane hoe:" Engao raho mba hikasike reo ambe ze manohy ty tragno bey, mba hahafahako mipiteke amireo. ²⁷ Naho feno lahilahy vaho ampela ty tragno. Tao iaby reo mpandily reo Filistina iaby. Teo amity telo arivo teo ho eo ty lahilahy vaho ampela teo antafon-tragno, ze nanente i Samsona nampihisa iereo. ²⁸ Nikaike Yaveh Samsona, naho nanao hoe:" Tompo Yaveh, tiarovo raho! Mangatake rie hamafeo raho amity ndraike toy avao, ry Zagnahare, mba hahafahako mamale ndraike reo Filistina ty amity nagnafahane reo masoko roe" ²⁹ Nitana Samsona reo ambe roe teo agnivone ty nanoha ty fagnoregnam-bey, naho nianky teo amireo re, ty ambe raike tamity tagnane havana, naho ty raike tamity tagnane havia. ³⁰ Hoe ty Samsona hoe:" Engao raho ho mate miarake amireo Filistina!" Namototre ty herene re ka nitonta teo amireo mpandily vaho teo amireo ndaty iaby ze tao agnate zay ty fagnoregnam-bey. Ka ty mate ze vinonone tamie mate le mihoatre noho reo ze vinonone zisike ty fiaignane. ³¹ Naho nizotro reo rahalahine vaho reo fokon-draene iaby. Nangalake aze iereo, ninday aze nihere naho nandeve aze teo ampagnivoa Zora vaho Estaola tagne amity toeram-pandevegna i Manoa, raene. Nitsara Israely zisike ty roapolo tao ty Samsona.