¹ Andro maromaro tafara atoy, zisike ty androm-pihazam-bare, le nangalake anak'ose ty Samsona naho nindeha namangy ty valine. Hoe re tamity vatane hoe:" Hindeha ho agne amity efetragnom-baliko raho." Nefa tsy namale aze nilitre ty raene. ² Hoe ty raene hoe:" Tena nidineke raho fa nalay aze riha, ka nomeako ty namanao re. Soa naho re ty zaine ampela, sa tsy zay? Alao ho solone re." ³ Namale iereo ty Samsona hoe:" Amize andro zay le tsy hanan-tsiny eo amaso reo Filistina raho laha manao ze mampalahelo iereo." ⁴ Le nindeha ty Samsona ka nitsepake amboahaolo telonjato naho namehe iereo kiroeroe, isan-tsolone. Bakeo le nangalake fanilo re ka namehe reo teo agnivo ty solo roe. ⁵ Laha fa nandrehetre ty fanilo re, le nagnenga reo amboahaolo hindeha egne amity vare mitiry reo Filistina, le sambe noroa iereo ty vare nivory vaho ty vare nitiry tegne ambaibo, niarake tamireo tanem-boaloboke vaho reo tanen'Oliva. ⁶ Nagnontane reo Filistina hoe:" Ia ro nanao zao?" Rinehake tamiereo hoe:" Samsona, ty vinanto lahy ty Timnita, ro nanao zao satria nangalake ty valy Samsona ty Timinita naho nagnomea aze ho ahy ty namane." Le nindeha reo Filistina naho nagnoro aze vaho ty raene. ⁷ Naho Samsona nanao tamy iereo hoe:" Laha zao ro ataonareo, le hamale fate anareo raho, naho laha fa vita zay, vaho hijano raho." ⁸ Naho tinampatampane tamity famonoam-bey, ty valahane vaho fe iereo. Naho nizotro re ka nitoboke tao agnate lava-bato tao amity lavake i Etama. ⁹ Naho niakatre reo Filistina ka nivogno ho amity aly tagne Joda naho nananga ty tafike iereo tagne Lehy. ¹⁰ Reo lahilahy Joda nirehake hoe:" Nagnino nareo ro niakatre hanafike anay?" Hoe iereo hoe:" Manafike zahay mba hahafahanay mitsepake i Samsona, naho hanao amine manahake ze nataone taminay." ¹¹ Naho nisy ndaty Joda telo arivo nizotro tao amity lava-bato ty lavake Etama, naho nirehake tamy Samsona iereo hoe:" Feie vao riha tsy mahay fa reo Filistina ro mpandily eo amintika? Ino ze nataonao taminay zao?" Namale iereo ty Samsona hoe:" Ze natao iereo tamiko, le hoe zay avao kea ro nataoko tamiereo." ¹² Hoe iereo tamy Samsona:" Nizotro zahay mba hamehe anao vaho hanolotre anao eo antagna reo Filistina. Naho Samsona nirehake tamiereo hoe:" Mifanta amiko fa tsy nareo ro hamono ahy." ¹³ Hoe iereo tamine hoe:" Aha, hamehe anao amity taly avao zahay naho hanolotre anao eo amiereo. Mampagnategna zahay fa tsy hamono anao." Le namehe aze tamity taly roe vaovao iereo naho ninday aze niakatre bakao amity vato. ¹⁴ Laha fa niavy tagne Lehy re, le nikorakorake reo Filistina laha vaho nifanoje tamine. Niavy tamine tamin-kere ty fagnahy Yaveh. Reo taly teo amity sandrine le manahake ty lamba rongone may, ka nipoke bakegne amity tagnane. ¹⁵ Nahisake valanoranon'ampondra vaovao ty Samsona, ka nangalake zay naho namono arivo lahy tamizay. ¹⁶ Naho Samsona nirehake hoe:" Tamity valanoranon'ampondra ro namonoako arivo lahy, isan-tokone aby." ¹⁷ Laha fa tampetre ty reha Samsona, le natorane ty valanorano, naho nataone hoe Ramata Lehy ty toera. ¹⁸ Narandrano mafe ty Samsona ka nikaike Yaveh naho nirehake hoe:" Nagnomea ty faharesea bey toy tamity mpanomponao riha. Kanefa amizao kea feie vao ho mate ty aran-drano raho ka ho lavo eo antagna reo tsy vita savatse?" ¹⁹ Nanarake ty toera babangoa ty tane Lehy ka nisy rano niakatre. Laha fa nino re, le nihere ty ozane nao velombelo ndraike re. Ka nataone hoe En-Hakore ty toera, naho zay le agne Lehy zisikezao. ²⁰ Nitsara ty Israely zisike ty roapolo tao ty Samsona tamity andro reo Filistina.