¹ Tamity vola fahafito lahafa baka nihere ta ntanane ao iaby ty vahoa Israely, ro nivoria gniereo ho raike ta Jerosalema ao. ² Niala kea nagnamboatse ty alitara ty Zagnahare Israely ty Jesoa anake lahy Jozadaka naho mpisoro rahalahine reo, vahoZerobabela anake lahy Sealtiela, miarakamy rahalahine hagnomey raketse oroa magnorike ty linily amity lily ndre Mosesy ao, iaze lahilahy Nagnaharey. ³ Le napo gniereo tamity fitobohane eo ialitaray, fa nahazo iereo ty tahotse naho ty amity ndaty itaney. Nagnomey raketse oroa ho ahy Yaveh vaho mangaratignana naho tamity hariva iereo. ⁴ Niambe ty hafalea ty fialofa avao kea iereo manahake ty sinoratse vaho nagnomey raketse oroa isan'andro isan'andro manahake ty lily, manahake ty zaka anoe isan'andro iaby. ⁵ Laha izay, le nisy ty raketse oroa andavan'andro naho isam-bola vaho raketse ho ahy hafalea gn'Yaveh reo fa voatingy iaby, miarakamy raketse antsitsapo iaby reo. ⁶ Nanomboke nagnomey raketse oroa ho ahy gn'Yaveh iereo ty andro voalohane tamity vola fahafito, ndra le tsy mboe tsisy fotone aza ty fiangona. Kea le nagnomey gniereo volafoty iaby mpanao vato reo naho mpanao taon-jaka reo, ⁷ vaho namea gniereo hane, zaka inome, naho menake ty vahoa gny Sidona naho Tyro, le ninday hetae sedera tandriake egne baka Libanona agne kea zisikagne Jopa iereo, manahake ty nagnomeza gny Kyrosy, mpanjaka gny Persia lala iereo. ⁸ Vaho tamity vola faharoe tamity tao faharoe tafara ty nandehana gniereo tan-tragno Nagnahare ta Jerosalema ao, ro nanomboke niasa ty Zerobabela, ty Jesoa anake lahy Jozadaka, mpisoro reo sisa, Levita reo, vaho reo ze niavy bakamity fagnadevoa nihere ta Jerosalema. Nitingy Levita ropolo tao miakatse reo iereo hagnaramaso ty asa ty tragno gn'Yaveh. ⁹ Napo Jesoa hagnaramaso ty ndaty manao ty asa fagnoregna ty tragno Nagnahare anane lahilahy reo naho rahalahine reo, ty Kadmiela naho anane reo, vaho foko Joda reo. Niarake tamy gniereo avao kea foko Henadada reo, ty fokone, vaho Levita ragnene reo. Nagnisy fototse ho ahy ty fiangona gn'Yaveh mpamboatse reo. Nahafaha mpisoro reo nitsanga nanao sikene reo miarake amity trompetsa zay, vaho nahafaha gny Levita reo, anake lahy ndre Asafa reo, nirenge ani gn'Yaveh tamity kipantso, manahake ty nandilia ty tagna dre Davida, mpanjaka Israely. ¹¹ Niantsa fidera naho fisaora ho ahy gn'Yaveh iereo tihoe: "Soa re! Maharetse zisikagne ty fagnekea matoky amy Israely." Nikoriakoriake mafe taman-koram-kafalea ho firengea ani gn'Yaveh ty vahoake iaby fa vita ty fototse itoboha ty fiangona. ¹² Feie maro tamy mpisoro reo, Levita, loha ty mpitarike, vaho zokeondaty ze nahisake ty tragno voalohane ro nitagny mafe, lahafa vitapetake tagnoloa ty maso gniereo eo ze fototse ioregna ze tragno zay. Fa maro ty nikorake hafalea taman-kafalea vaho tamity feo mikoriakoriake. ¹³ Voka gnizay, tsy nahay nitingy ty feo falefale naho mitsamboatsamboa tamy feo gnodaty mitagny reo ty vahoake, satria nikoriake mafe taman-kafalea bevata ty ndaty, vaho rey bake lavitse egne vatane ifeoy.