¹ Tsy nahisake roro ty mpanjaka tamy hale igne. Nandily ty mpanompo ze mba hinday ty boky fagnajaria tantara tamity fotoa nindaisany, vaho nivakie mafe tamy mpanjaka zay. ² Vitapiteke tao fa nivola ty mikasike andre bigtana naho Taresy ty Mordekay, roe tao tamy reo manan-kasy ty mpanjaka ze niambe ty lala filira, ze nidineke ty hanao raty ty mpanjaka Ahasoerosy. ³ Le nagnotane ty mpanjaka tihoe: "Ino moa ro fa mba nanoe mba nagnomea kasy na nagnekea andre Moedekay tamity nanovane izay?" Vaho reo ajiahy lahy ty mpanjaka ze nanompo aze nivola tihoe: ''Tsy nisy nanoe taminy." ⁴ Hoe ty mpanjaka tihoe: "Ia ro an-kianja ao? Sendra niavy tan-kianja ambalike ty tragno ty mpanjaka ty Hamana mba hivola amine ty amity hagnatognane andre Mordekay amity hetae fagnatogna eo ze fa natsangane ho aze. ⁵ Nivola tamine reo mpanompo ty mpanjaka tihoe: "Hamana ro mitsanga an-kianja eo." Le hoe ty mpanjaka tihoe: "Engaho reke hilitse." ⁶ Lahafa nilitse Hamana le hoe ty mpanjaka tamine tihoe: " Ino ro tokone atao amity lahilahy ze tea ty mpanjaka hamean-kasy?" Le hoe Hamana nivola ampiane ao tihoe: " Ia "moa ro hamea ty mpanjaka hasy ankoatse ahy? ⁷ Hoe Hamana tamy mpanjaka tihoe: "Ho ahy ty lahilahy ze tea ty mpanjaka amen-kasy, ⁸ ao hindese ty siky lava fiankina, siky ze fa fanao ty mpanjaka, vaho ty sovaly ze fa nitikira ty mpanjaka, vaho amity lohane eo ty satron-kasy. ⁹ Vaho ao ty siky naho ty sovaly hamea ty raike amy reo manan-kasy sahazan-kaja vatane. Ao iereo haniky ty lahilahy tea ty mpanjaka hamean-kasy, vaho ao iereo hitarike aze hitete ty lala ty tana amy sovaly. Kea ao iereo hitalily tihoe: 'izao ro nanoe tamy iaze tea ty mpanjaka hamean-kasy!"" ¹⁰ Vaho hoe ty mpanjaka tamy Hamana tihoe: "Malaky, alao ty siky naho ty sovaly, arake ze fa nivolagnenao, vaho anovo ho ahy ndre Mordekay iaze Jiosy ze mitoboke am-bavahady ty mpanjaka eo zay. Ko misy atao poke reo ze nivolagnenao." Vaho Hamana nangalake iaze siky naho i sovaly. Le nampiakanjoene ty Mordekay vaho nindesene nitete ty lala ty tana iaby tamy iaze sovaly reke. Nagnambara tagnoloane eo reke tihoe: "Izao ro nanoe tamity lahilahy ze tea ty mpanjaka hamean-kasy!"' ¹² Nihere tam-bavahady ty mpamjaka i Mordekay, fa Hamana kea nagnalaky ty sovaline ho agne an-tragnone, nalahelo, nirako-doha. ¹³ Tinalily Hamana tamy ndre Zaresy valine naho reo ragnene iaby ty zaka-iaby niseho tamine. Vaho ty ndaty hendre iaby naho Zaresy valine nivola tamine tihoe: "Laha Mordekay, ze nanomboke nanonta anao tagnilane eo, ro jiosy, le tsy hahatsatse aze mihintsy riha, fa le ho tonta agnoloane eo vatane riha." Laha mboe nivola tamine iereo, le niavy reo manan-kasy ty mpanjaka.Le ninday malaky andre Hamana tagne amity fagnasa ze fa nomane ndre Estera iereo.