² le vahoake foloay vaho lava, reo anadahy Enakita, ze hainao, naho ze le fa nahareizanao ty ndaty nanao hoe:' Ia ro afake hitsanga magnoloa reo anadahy Anaka?' ³ Haio naho amizao fa Yaveh Zagnaharenao ro mialoha lala anao manahake ty afo mandrava; handrava iereo Re, naho handrese iereo eo agnoloanao; ka handroake aze riha naho ho vonoe malaky iereo, arake ze le fa nirehafe Yaveh taminao. ⁴ Ko mirehafa ty ao amponao, laha fa vaoaroake Yaveh Zagnaharenao tsy ho eo agnoloanao iereo hoe:' Noho ty fahitiako ro nindaisa Yaveh ahy ho tompo ty tane toy,' satria noho ty haratiam-pagnahy reo firene reo ro nahavy Yaveh handroake aze tsy ho eo agnoloanao. ⁵ Tsy noho ty fahitianao na ty fahitiam-ponao ro hahavy anao ho tompo ty tane iereo, fa noho ty haratiam-pagnahy reo firene reo ro mahavy ty Zagnaharenao handroake iereo tsy ho eo agnoloanao, naho mba hahafahane mandefe ty fahitia ty rehake ze nifantane tamireo razambeinao, le tamy Abrahama, Isaka naho Jakoba. ⁶ Ka ao ho hainao, fa tsy noho ty fahitianao ro hagnomea Yaveh Zagnaharenao io tane soa ao ho lasanao, fa ndaty mafe loha riha. ⁷ Tiarovo naho ko halignove ty nipaianao ty helo Yaveh Zagnaharenao tagne agnefetre; zisikamity andro nialanao ty tane Egypta ka zisikamity nihavianareo teto amity toera toy, le niraike nandietse Yaveh zisikagne nareo. ⁸ Tagne Horeba avao kea le nipay ty helo Yaveh nareo, naho tena meloke taminareo Yaveh ka fa ho nandrava anareo. ⁹ Laha fa niakatre ho agne ambohitse raho mba handrae reo vato pisake, le reo vato pisake ty fagnenkea ze natao Yaveh niarake taminao, nitoboke tagne ambohitse zisike ty efapolo andro vaho efapolo hale raho; tsy nihina mofo na ninon-drano raho. ¹⁰ Namea Yaveh ahy reo vato pisake roe sinora ty tagnane; voasoratre teo amireo ty zaka iaby arake ty rehake iaby ze natalily Yaveh anareo tagne ambohitse teo agnivo ty afo tamity andro ty havoria. ¹¹ Naho laha fa tampetre ty efapolo andro vaho efapolo hale le namea Yaveh ahy reo vato pisake roe, le reo vato pisake ty fagnenkea. ¹² Hoe Yaveh tamiko ty hoe:' Mitsangana, mizotroa malaky bakeo, fa reo vahoakenao, ze nientenao bakagne Egypta, le fa nanimba ty vatagniereo. Nalaky nivio tamity lily nandiliako aze iereo. Iereo le nagnamboatre saren-jaka anidina ho ahy iereo.' ¹³ Hafa zay, nirehake tamiko Yaveh naho nanao hoe:' Le fa hisako toa vahoake toa; vahoake mafe loha iereo. ¹⁴ Engao arere raho, mba hahafahako mandrava iereo vaho mamafa ty agnarane tsy ho eo ambane ty lagnitse, naho hataoko ho firene mahere vaho bey noho iereo riha.' ¹⁵ Laha zao le nihodike raho naho nizotro egne ambohitse, naho le nirehetre ty vohitse. Tetoy antagnako reo vato pisake roe ty fagnenkea. ¹⁶ Nanente raho, naho ingo, nanonta tamy Yaveh Zagnaharenareo nareo. Namisavisa anak'agnombe ho anareo nareo. Nalaky nivio tamity lala ze nandilia Yaveh anareo nareo. ¹⁷ Nalaeko reo vato pisake roe naho nariako tsy ho antagnako eo reo. Vinakiko teo amasonareo zay. ¹⁸ Nihohoke efapolo andro vaho efapolo hale teo agnoloa Yaveh ndraike raho; tsy nihina mofo raho na ninon-drano, noho ty amireo hadisoanareo iaby ze nataonareo, tamity nagnanovanareo ze raty teo amaso Yaveh, mba hanaira ty helone. ¹⁹ Fa natahotre ty heloke vaho ty fireheta ty tsy fiteava zay tena nahameloke Yaveh taminareo ke fa ho nandrava anareo raho. Fa nindranjy ahy avao kea Yaveh tamize andro zay. ²⁰ Vignitse vatane tamy Arona Yaveh ka fe ho nandrava aze; tamio le nivavake ho ahy Arona avao kea raho. ²¹ Nalaeko ty hadisoanareo, ty anakagnombe ze namboarenareo, ka noroako zay, finofoko, naho tinorotoroko ho tena kele, mandra-pahaviane ho kele manahake ty deboke. Nariako tagne amity renerano ze mily bakagne ambohitse ty debone. ²² Tagne Tabera, tagne Masa, naho tagne Kibrota-hatava ro nipaianareo ty helo Yaveh. ²³ Laha fa nandefa anareo hiala tao Kadesi-Barnea Yaveh naho nanao hoe:' Mindehana miakatre naho alao ho fanagna ty tane ze nameako anareo,' le niraike nandietse ty lily Yaveh Zagnaharenareo nareo, naho tsy nino na nidranjy ty feone. ²⁴ Niraike nandietse Yaveh nareo zisikamity andro nahaiako anareo. ²⁵ Naho nihohoke efapolo andro vaho efapolo hale teo agnoloa Yaveh raho, satria Re nirehake fa handrava anareo. ²⁶ Nivavake tamy Yaveh raho naho nanao ty hoe::" Ry Yaveh Tompo, ko ravae reo vahoakenao na reo mpandovanao ty navotanao tamity habeinao, zay nientenao niakatre bakagne Egypta tamity tagna mahere. ²⁷ Tiarovo Abrahama, Isaka, naho Jakoba mpanomponao; kp manente ty hamafean-doha ty vahoake toy, na ty haratiam-pagnahy, na reo hadisoane, ²⁸ fa tsy ne ty tane ze nindesanao anay hanao ty hoe:" Satria Yaveh tsy afake ninday iereo tane amity tane ze nampagnantegnane iereo, naho satria nalay iereo re, ro nindaisane iereo niakatre mba hamonoa iereo agne agnefetre." ²⁹ Kanefa vahoakenao vaho lovanao reo, ty nientenao niakatre tamity herenao bey vaho tamity asa ty herenao.'