¹ Ao ho tane nareo reo lily iaby ze ameko anareo androany, mba ho velo vaho hihamaro nareo, naho hindeha ka hahazo ty tane ze nifanta Yaveh tamireo razambeinareo. ² Ao ho tiaronao ty lily iaby ze nitariha Yaveh Zagnaharenao anao tamity efapolo tao tagne agnefetre, mba hampitsignane anao, mba hitsapane anao hahaia ze ao amponao, laha hita reo liline riha na tsy hita. ³ Nampitsy anao Re, vaho nampanao anao, naho namoky mana anao, ze tsy hainao naho tsy hay reo razanao. Nataone zay mba hahaianao fa tsy ty mofo avao ro hivelogna ty ndaty; fa kea, ty zaka iaby ze aboake ty vava Yaveh le ivelogna ty ndaty. ⁴ Tsy rovitre naho tsy niala taminao ty akanjonao, naho tsy nivonto ty tombonao tamirey efapolo tao rey. ⁵ Ao riha hihevetre ao amponao, ty fomba fifehea ty ndaty ty anane, le manahake zay ro fifehea Yaveh Zagnaharenao anao. ⁶ Hotananao reo lily Yaveh Zagnaharenao, mba hindehananao amity lalane vaho hagnajanao aze. ⁷ Fa Yaveh Zagnaharenao le minday anao amity tane soa, tanem-baibon-driake, loharano, mily bakamireo baibo naho egne agnivo ty tazoa; ⁸ tanem-barem-bazaha vaho vare hordea, voaloboke, hetaen'aviavy, naho ampongabein-dagnitse; tanen'oliva vaho tantele. ⁹ Tane ze hihinananao hane tsy lany lanie, naho ze hindehananao tsy hisy zaka-maha ore; tane ze misy vy ty vatone, naho bakao amity tazoa ro hihalianao varahy. ¹⁰ Hihina riha naho ho voky, naho hisaotre Yaveh Zagnaharenao riha noho ty tane soa ze le fa nomeane anao. ¹¹ Ambeno mba tsy hagnaligno Yaveh Zagnaharenao riha, naho tsy hanao tsinontsino reo liline, reo fotsipine, naho reo lalane ze handiliako anao androany, ¹² laha tsy zay, laha fa mihina riha naho voky, naho laha fa magnore tragno soa tarehe naho mitoboke ao amizay, le hirehareha ty arofonao. ¹³ Ambeno laha fa mihamaro ty agnombenao vaho ty agnodry aman'ose naho mitombo ty volafoty vaho ty varahinao, ¹⁴ le hirehareha ty arofonao naho halignonao ty Yaveh Zagnaharenao, ze ninday anao niakatre bakao amity tane Egypta, bakao amity tragno fagnandevoza. ¹⁵ Ko magnaligno Aze ty nitarike anao tagne amity tane efetre bey vaho mampatahotre, miarake amity menara misy poizy vaho mengoke naho tane maike ty tsy nisy tano, te nagnakatre rano ho anao bakao amity vatolampy afovato. ¹⁶ Namoky mana anao tagne agnefetre Re ze tsy mba hay reo razambeinao, mba hahafahane mampitsy anao vaho mitsapa anao, mba hagnasoa anao amity farane, ¹⁷ fa riha mete hirehake ao amponao hoe:' Ty hereko vaho ty here ty tagnako ro nahazoako toa harea iaby toa.' ¹⁸ Fa ao hahatiaro Yaveh Zagnaharenao riha, satria Re ro nagnomea anao ty here hahazoanao harea; mba hagnoregnane ty fagnenkeane ze nifantane tamireo razanao, manahake ze androany zao. ¹⁹ Naho laha hagnaligno Yaveh Zagnaharenao riha naho hagnorike zagnahare-hafa, hanompo iereo, naho hihohoke amiereo, le mitsanga vavolombelo aminareo raho androany fa ho mate vatane nareo. ²⁰ Manahake reo firene ze natao Yaveh rava teo agnoloa nareo, le ho hoe zay ro handrava anareo, satria tsy midranjy ty feo Yaveh Zagnaharenareo nareo.