¹ mosesy naho reo lohologny Israely nandily ty fokonolo vaho nivola tihoe: Tandremo reo lily zay ndiliako anareo niandroany. ² Lafa hitsake any jordana nareo draike andro agne agne amy ty tane zay mey Yaveh Andragnahare nao riha, le tsy maintsy hampipoke vato bey maromaro riha vaho holokoanao amy ty sokay. ³ Tsy maintsy soratenao ao amy reo ty tene iaby amy ty lalagna toy lafa mitroatse riha, mba hilitse ao amy aze tane zay mey Yaveh anao riha, le tane tondrandrono naho tantele, arake ty fanampandignise yaveh, aze Andragnahare reo razambegnareo. ⁴ Lafa mahatsake Jordane nareo, le aoregno vato andiliako anareo androany, ao ambohitse Ebala, vaho laloro soma reo. ⁵ Ao ro hagnoregna nareo alitare hoahy Yaveh Andragnaharenao, alitara vita amy ty vato; nefa ka ampiasae ao ty fiasa vy hiasa reo vato. ⁶ Vato tsy voapeke ro tsy maintsy hagnamboaranareo ty alitara Yaveh Zagnaharenao; tsy maintsy hanao fagnatetre oroa ho ahy Yaveh Zagnaharenao eo amio riha, ⁷ naho hanao soro fagnate-pilongoa riha ka hihina ao. Hifalefale eo agnoloa Yaveh Zagnaharenao riha. ⁸ Ho soratenao feno eo amireo vato reo ty rehake iaby amity lily toy." ⁹ Mosesy vaho reo mpisoro, naho reo Levita, nirehake tamireo Israely iaby, nanao ty hoe:" Mitsigna, naho mitsanogna, ry Israely: Androany le fa lasa vahoake Yaveh Zagnaharenao riha. ¹⁰ Laha zao le tsy maintsy mieke ty feo Yaveh Zagnaharenao riha, naho mieke reo liline vaho ty lala ze handiliako anao androany." ¹¹ Tamio andro io avao le nandily ty ndaty i Mosesy naho nirehake ty hoe: ¹² "Toa foko toa ro tsy mainsty hitsanga eo ambohitse Gerizima mba hitso-drano ty ndaty iaby tafitsake agne Jordana nareo: Simeona, Levy, Joda, Isakara, Josefa, naho Benjamina. ¹³ Toa foko toa ro tsy maintsy hitsanga eo amity vohitse Ebala mba hanogno ozo: Roben, Gada, Asera, Zebolona, Dana, naho Naftaly. ¹⁴ Hamale reo Levita naho hirehake amireo lahilahy Israely iaby amity feo ambone ty hoe: ¹⁵ 'Ho voaozo anie ty lahilahy ze manao saren-jaka voasokitre na saren-jaka agnidy, te zaka-raty amy Yaveh, ty asa ty tagna ty mpanao asa tagna, vaho ze mananga zay mangingike.' Naho ty vahoake iaby hamale naho hirehake ty hoe:' Amena.' ¹⁶ 'Ho voaozo anie ty lahilahy manao tsinontsino ty raene na ty renene.' Naho ty vahoake iaby hirehake ty hoe:' Amena.' ¹⁷ 'Ho voaozo anie ty lahilahy ze mamindra ty efen-tane ty mpiraike mony amine.' Naho ty vahoake iaby hirehake ty hoe:' Amena.' ¹⁸ 'Ho voaozo anie ty lahilahy ze magnary lala ty goa.' Naho ty vahoake iaby hirehake ty hoe:' Amena.' ¹⁹ 'Ho voaozo anie ty lahilahy ze mampiasa here mba hahazoane ty rarene ze tokone ho ahy ty mbahiny, ty bode, na ty mpive-bata.' Naho ty vahoake iaby hirehake ty hoe:' Amena.' ²⁰ 'Ho voaozo anie ty lahilahy ze miara-miroro amity valy ty raene, satria nangalatre ty zon-draene re.' Naho ty vahoake iaby hirehake ty hoe:' Amena.' ²¹ Ho voaozo anie ty lahilahy ze miara-miroro amize mete ho karazam-bibinala.' Naho ty vahoake iaby hirehake ty hoe:' Amena.' ²² 'Ho voaozo anie ty lahilahy miara-miroro amity anabavene, ty anabaven-draene, na ty anak'ampelan-drenene.' Naho ty vahoake iaby hirehake ty hoe:' Amena.' ²³ 'Ho voaozo anie ty lahilahy ze miara-miroro amity rafozam-bavene.' Naho ty vahoake iaby hirehake ty hoe:' Amena.' ²⁴ 'Ho voaozo anie ty lahilahy ze mamono ambalike ty mpiray mony amine. ' Naho ty vahoake iaby hirehake ty hoe:' Amena. ²⁵ 'Ho voaozo anie ty lahilahy ze manao vandevande mba hamonoa ty ndaty tsy nagnino.' Naho ty vahoake iaby hirehake ty hoe:' Amena.' ²⁶ 'Ho voaozo anie ty lahilahy ze tsy magnamafe ty reha ty lily toy, fa hagnenke iereo re.' Naho ty vahoake iaby hirehake ty hoe:' Amena.'