¹ Laha fa avy agne amity tane ze hamea Yaveh Zagnaharenao ho lovanao riha, naho laha fa lasanao vaho hitobohanao zay, ² tsy maintsy alaenao ty ilane amity voaloham-bokatre iaby eo amity tane ze nindaisa anao teo amity tane ze namea Yaveh Zagnaharenao. Tsy maintsy hataonao ao agnate haro zay naho hindeha agne amity toera ze finily Yaveh Zagnaharenao ho fitoboha masy riha. ³ Tsy maintsy mindeha agne amity mpisoro ze hanompo amireo andro reo riha, naho hirehake amine hoe:' Magnenke Yaveh Zagnaharenao raho amizao fa zaho le bakamity tane ze nifanta Yaveh tamireo razantika mba hamea antika.' ⁴ Tsy maintsy halae ty mpisoro eo antagnanao ty haro naho hatobone magnoloa ty alitara Yaveh Zagnaharenao. ⁵ Tsy maintsy mirehake eo agnoloa Yaveh Zagnaharenao riha ty hoe:' Syrianina hiringirine ty razambeiko. Nindeha nizotro tagne Egypta re naho nijano tagne, naho tsy ampe agnisa reo vahoake. Tagne ro nahavy aze ho bey, nahere, naho firene bey mpitoboke. ⁶ Raty entam-bata vaho nampijale antika reo Egyptiana. Nampanoene ty asa reo ndevo tika. ⁷ Nitaray tamy Yaveh, Ty Zagnahare reo razantika tika, naho reine ty feontika naho hisane ty jalentika, ty asantika, naho ty fahoreantika. ⁸ Niente Yaveh niakatre bakagne Egypta tamity tagna mahere tika, tamity famotora sandry, vaho tamity horohoro bey, tamity famantara, naho tamity figaga; ⁹ naho re ninday antika tamity toera toy vaho nagnomea antika ty tane toy, le tane ze feno ronono vaho tantele. ¹⁰ Ingo amizao, minday ty lohavoy ty tane ze nameanao, Yaveh ahy raho.' Tsy maintsy hapetrako eo ambane magnoloa Yaveh Zagnaharenao zay naho manova fanompoam-pilongoa eo agnoloane; ¹¹ naho riha le tsy maintsy mifalefale amize zaka-soa iaby natao Yaveh Zagnaharenao taminao, tamity fokonao__riha, vaho ty Levita, naho reo mpivahiny aminao eo. ¹² Laha fa baka magnomea ty ampahafolo ty vokanao iaby tamity tao fahatelo riha, ze, tao ty ampaha-folo karea, le tsy maintsy hameanao ho ahy ty Levita zay, ho ahy ty vahiny, ho ahy ty bode, vaho ho ahy ty mpivem-bata, mba hahafaha iereo mihina ao agnate ty vavahady ty tana nao ka ho voky. ¹³ Tsy maintsy mirehake eo agnoloa Yaveh Zagnaharenao riha hoe:' Nienteko niakatre ty tragnoko reo zaka ze ahy Yaveh, naho nameako ty Levita, ty mpivahiny, ty tsy manan-drae, vaho ty mpivem-bata, arake ty lilinao iaby ze nameanao ahy. Tsy nisy linikako reo lilinao, na nihalignoeko reo. ¹⁴ Tsy nihina tamizay raho zisike ty fandalako, na nataoko tegne avao tamity andro ty lotoko, na nameako ho fahan-kane hagnaja ty mate. Nidranhy ty feo Yaveh Zagnahareko raho; nenkeko iaby ze nandilianao ahy mba hataoko. ¹⁵ Magnetea ambane bakegne amity toera masy ze hitobohanao, bakegne andagnitse, naho tahio reo Israely vahoakenao, vaho ty tane ze nameanao anay, arake ze nifantanao tamireo razanay, le tane feno ronono vaho tantele.' ¹⁶ Androany Yaveh Zagnaharenao le mandily anao mba hagnenke reo lala vaho lily reo; laha zao le hiambe iereo riha naho hagnorike zay amity arofonao aiby vaho ty fagnahinao iaby. ¹⁷ Nanao fagnambara riha androany fa Yaveh Zagnaharenao, ka hindeha amity lalane riha naho hiambe reo fotsipene, reo liline, vaho reo lalane, naho hidranjy ty feone riha. ¹⁸ Androany Yaveh le manao fagnambara fa riha le vahoake ze Aze arere, arake ze nampagnantegnaene anao, naho riha le natao hiambe reo liline iaby, ¹⁹ naho hataone ho ambone noho reo firene hafa iaby ze nataone riha, naho riha le hahazo tsiriry, laza, naho hasy. Ho vahoake voatoka ho ahy Yaveh Zagnaharenao riha, arake ze nirehafene."