¹ Nareo ro vahoake Yaveh Zagnaharenareo. Ko midineke ty vatanareo, na mamere ty faritre ty tarehenareo ho ahy ty mate. ² Fa nareo le firene ze voatoka ho ahy Yaveh Zagnaharenareo, naho Yaveh nifily anareo ho vahoake ho fanagnane arere, mihoatre reo vahoake iaby ze eo ambone ty tane. ³ ko mihina zaka-rati-raty na ino ino. ⁴ Toa ro biby azonareo hohane: ty agnombe, agnondry, naho ty ose, ⁵ ty serfa, ty gazela, ty kapreola, ty osen'ala, ty pygarga, vaho ty antilopa, naho ty ropikapra. ⁶ Azonareo hohane ty biby iaby ze mivaky kitro, zay le, ze mana kitro mizara roe, naho ze mandineke. ⁷ Na le zay aza, ko mihina reo biby ilane ze mandineke na ze mana kitro mizara reo nareo: ty rameva, ty bitro, naho ty hyrake; satria mandineke reo nefa tsy mivaky kitro, maloto aminareo reo. ⁸ Ty lambo kea le maloto aminareo satria mivaky kitro re nefa tsy mandineke; maloto aminareo re. Ko mihina henan-dambo, naho ko mikasike ty toko reo. ⁹ Amireo zaka ze ao agnate rano le azonareo hane: iaby ze vombone vaho ty kirane; ¹⁰ nefa iaby ze tsy misy vombone vaho kirane le ko hanenareo; maloto aminareo reo. ¹¹ Reo voro malio iaby le azonareo hane. ¹² Nefa toa ro biby tsy azonareo hane: ty voromahere, ty voltora, tygypa, ¹³ ty tsimalaho mena vaho ty tsimalaho mainte, laha atao voromahere iaby. ¹⁴ Ko mihina ty karan-koake iaby, ¹⁵ vaho ty ostritsa, vaho ty tararaka, ty vorondriake, ze karazan-tararake iaby, ¹⁶ ty voron-dolo kele, ty voron-dolo bey, ty voron-dolo foty, ¹⁷ ty sama, ty voltora kele, ty vano. ¹⁸ ko mihina ty vanobey, vaho ty karaza vano iaby, ty takidara, naho ty ramanavy. ¹⁹ Ty zaka managn'elatre, vaho milaly iaby le maloto aminareo; tsy tokona hohane reo. ²⁰ Azonareo hane reo zaka milaly malio iaby. ²¹ Ko mihina zaka ze mate ho aze, azonareo amea ty vahiny ze ao amity tana nao; mba hahafahane mihina zay; na azonareo avily amity vahiny zay. Fa nareo le firene ze voatoka ho ahy Yaveh Zagnaharenareo. Ko mampandeve anan'ose amity rononon'drenene. ²² Aloavo ty ampahafolo ty vokatre ty voanao iaby, ze miakatre bakao amity baibo isan-tao isan-tao. ²³ Mihinana eo agnoloa Yaveh Zagnaharenareo, ao amity toera ze hofilie ho fitoboha ty masy, ty ampahafolo ty varenao, ty divainao vaovao, vaho ty menanao, naho ty voaloham-pitera ty agnombenao vaho ty agnondry aman'ose; mba hahafahanao mianatre hanompo ela Yaveh Zagnaharenao. ²⁴ Laha lava loatre aminareo ty lia naho tsy zakanareo zay, satria lavitre loatre anao ty toera ze hofilie Yaveh Zagnaharenao ho fitoboha ty masy, le, laha fa mitahy anao Yaveh ty Zagnahare, ²⁵ hagnova ty fagnatetre ho lova riha, hamehe ty vola egne antagnanao, naho hindeha agne amity toera ze finily Yaveh Zagnaharenao. ²⁶ Ao ro handanianao ty vola amy iaby ze irienao: amity agnombe, na amity agnondry, na amity divay, na amity zaka-finome mahere, na amy iaby ze irienao; le agne riha ro hihina eo agnoloa Yaveh Zagnaharenao, naho hifale riha, riha vaho ty fokonao. ²⁷ Ty Levita ze ao agnate reo vavahadinao__ko mahafoe aze, fa tsy mana anjara na lova aminao re. ²⁸ Amity fara ty isake telo tao le hanolotre ty ampahafolo ty vokanao iaby amize tao zay riha, naho hitahiry zay ao agnate ty vavahadinao riha; ²⁹ naho ty Levita, satria re tsy mana anjara na lova aminao, vaho ty vahiny, vaho ty bode, naho ty mpivem-bata ze ao agnate ty vavahadinao, le hoavy vaho hihina naho ho entsake. Anovo zay mba hahafaha Yaveh Zagnaharenao mitahy anao amity asa ty tagnanao iaby ze ataonao.