¹ Laha misy mpaminane na mpagnonofy miseho eo aminareo, ka manao famantara na hatsereha, ² naho laha miseho ty famantara na ty hatsereha, ty rehafene aminareo ka manao hoe:' Andao tika hagnorike zagnahare hafa, ty tsy mboe hainareo, naho andao hotompoentika iereo,' ³ le ko midranjy ty reha ze mpaminane zay, na ze mpagnonofy zay; satria Yaveh Zagnaharenareo le mitsapa anareo laha tea Yaveh Zagnaharenareo amity arofonareo iaby vaho amity fagnahinareo iaby nareo. ⁴ Magnori-dia Yaveh Zagnaharenareo nareo, hagnomea hasy Aze, hiambe reo liline, vaho hagnenke ty rehane, naho hiaro aze vaho hipiteke amine. ⁵ Ho vonoe ze mpaminane na mpagnonofy zay, satria re le nandietse Yaveh Zagnaharenareo, ze ninday anareo niakatre bakao amity tane Egypta, vaho nagnafake anareo tagne amity tane fagnandevoza. Mipay hitao anareo ambaly ty lala ze nandilia Yaveh Zagnaharenareo mba hindehana nareo ze mpaminane zay. Ka afaho tsy ho eo aminareo ty raty. ⁶ Raeso hoe ty rahalahinao, ty ana ty renenareo, na ty anadahinareo, na ty anak'ampela nareo, na ty valy fihinenareo, na ty namanareo ze teanareo manahake ty vatanareo, ro hitao moramora anareo naho hanao ty hoe:' Ao tika hindeha naho hanompo reo zagnahare hafa ze tsy mboe hainareo, na nareo na reo razambeinareo__ ⁷ le reo zagnahare ty ndaty ze magnodidy anareo, agnilanareo, na lavitse anareo, bakamizao tontolo iaby zao.' ⁸ Ko meke na midranjy aze. Tsy tokone hana fandefera amine avao kea ty masonareo, na hiferegnay aze na hagnetake aze. ⁹ Fa kea, tokone ho vonoenareo vatane re, ty tagnanareo ro ho voalohane hamono aze, naho bakeo ty tagna ty vahoake iaby. ¹⁰ Hitora-bato hamono aze nareo, satria re nikaroke hitao anareo hihalavitse Yaveh Zagnaharenareo, ty ninday anareo hiala tao amity tane Egypta, hiala ao amity tane fagnandevoza. ¹¹ Haharey vaho hatahotre ty Israely iaby, ka tsy hanohy hanao ze karan-karatia zay eo aminareo sase. ¹² Laha maharey ndaty mirehake momba ty raike amireo tana nareo, ze namea Yaveh Zagnaharenareo mba hitoboha nareo: ¹³ fa nisy mpirai-belo raty fagnahy ilane niala teo aminareo naho nietrake reo vahoake teo amity tana iereo hoe:' Andao tika hanompo zagnahare hafa ze mboe tsy hainareo.' ¹⁴ Le handineke ty porofo, hanao dineke, naho hikaroke laleke zay nareo.' Laha fa hisanareo fa mare zay naho azo antoke fa natao teo aminareo ty zaka raty manahake zay, le hihetseke nareo. ¹⁵ Azo antoke fa hanafike reo vahoake ao amize tana zay amity lela-meso nareo, hamoteke vatane zay vaho ty ndaty iaby ao amine, miarake amireo biby hare, amity alala ty lela-meso. ¹⁶ Hamory reo enta iaby azo amizay ho eo agnivo ty lala nareo naho horoa ty tana, vaho reo enta azo iaby__ho ahy Yaveh Zagnaharenareo. HO tana taloha zisikezay ty tana, ka tsy hatsanga sase zay. ¹⁷ Tsy tokone hipiteke eo antagna nareo reo zaka ze natoka ho ravae. Zay ro tsy maintsy atao, mba hotampetre amity helone Yaveh, hanoro fandefera aminareo, vaho hiferegnay anareo, naho hanombo isake anareo, arake ty nifantane tamireo razambeinareo. ¹⁸ Hanao zay Re satria nareo midranjy ty feo Yaveh Zagnaharenareo, mba hiambena reo liline iaby ze handiliako anareo androany, vaho mba hagnanoa ze mare eo amaso Yaveh Zagnaharenareo.