1 I Petera le nagnente namanta amireo mpikamba tao amity fipaia-hevetre naho nanao ty hoe:" Ry rahalahy, zaho le fa nivelo teo agnoloan'Agnahare tamity eretreretre soa iaby zisike androany." 2 Ty mpisorom-bey Ananiasy le nandily reo ze nitsanga tagnilane eo mba hamofoha ty vavane. 3 Bakeo Paoly nirehake aze hoe:" Zagnahare le namofoke anao, riha ry rindry voalalotre foty. Riha vao le mitoboke hitsara ahy amity lily, nefa mandily ahy mba ho fofohe, tsy arake ty lily? 4 Reo ze nitsanga teo le nanao ty hoe:" Zao vao ro fomba handratianareo ty mpisorom-bey Nagnahare?" 5 Paoly nanao ty hoe:" Tsy nahay raho, ry rahalahy, hoe re ty bey ty mpisorombey. Te le fa voasoratre hoe: tsy tokone hirehake raty ty mpanday ty vahoakenao riha." 6 Laha fa hita Paoly fa ty ilane tamity fipaian-kevetre le Sadoseo naho ty hafa Fariseo, le nirehake mafe tao amity fipaian-kevetre re hoe:" Ry rahalahy, Zaho le Fariseo, anadahy reo Fariseo. Zay ro ie satria raho magnantegna soa ty fitsangana ty mate ty hitsara ahy." 7 Laha fa nirehake zay re, le nanomboke nisy fandiera tamy reo Fariseo vaho reo Sadoseso, naho ty vahoake le nizara. 8 Fa reo Sadoseo le nirehake fa tsy misy ty fitsangana amity mate, tsy misy reo anjele, naho tsy misy reo fagnahy, nefa reo Fariseo le nagnenke ie iaby reo. Laha zao le nisy tabataba mafe niseho, naho ty ilane tamireo mpanora-dily reo Fariseo le nitsanga naho niay hevetre, nirehake hoe:" Zahay le tsy mahita zaka diso amio lahilahy io. Akore laha ty fagnahy ndra ty anjele ro nirehake tamine?" 10 Laha nisy fifandiera mafe teo, ty kapitene mpitarike le natahotre tsy ne hifanariha iereo ty Paoly, laha zao re le nandily reo miaramila mba hizotro vaho hangalake aze ankere agne amireo mpikamba ao amity fipaian-kevetre, naho handay aze agne an-dapa. 11 Ty hale magnorike ty Tompo le nitsanga tagnilane eo naho nanao ty hoe:"Ko matahotre, fa hoe ty nitsangana nao vavolombelo miomba ahy tagne Jerosalema, ro tsy maintsy hitsangana nao vavolombelo agne Roma avao kea." 12 Laha fa maray ty andro, te nisy Jiosy ilane le namoro hevtre naho nagnozo ty vata iereo miarake amity havelo mba tsy hihina na hino ndra ino ino mandram-pamonoa iereo Paoly. 13 Mihoatre ty efapolo ndaty iereo ty namoro hevetre eo. 14 Iereo le nandeha tagne amireo mpisorombey vaho reo olobey ka nanao ty hoe:" Zahay le fa nanao fagnomeam-bey tamity vatanay, mba tsy hihina ndra ino ino mandram-pamonoa nay Paoly. 15 Henanezao, laha zao, engao ty fipaian-kevetre hirehake amity kapitene mpitarike mba handay aze hizotro aminareo eto, naho nareo hoe ty hoe hanam-pakevetre amity zaka-misy miomba aze mare kea. Fa ho anay, zahay le vogno ty hamono aze aloha ty hiaviane eto." 16 Nefa ty anadahy ty anabave Paoly le naharey fa teo ampandignasa ty hamonoa aze iereo, laha zao re le nandeha naho nilitre ty lampa ka nirehake tamy Paoly. 17 Paoly le nikaike ty raike tamireo kapitene ka nanao ty hoe:" Ento agne amity kapitene mpitarike ty ajalahy toy, fa mana zaka horehafe amine re." 18 Laha zao ty kapitene le nandrae ty ajalahy naho nanday aze tagne amity kapitene mpitarike ka nanao ty hoe:" Paoly ty gadra ro nikaike ahy hoagne amine, naho nangatake ahy mba handay ty ajalahy toy ho aminao eto. Mana zaka ho rehafe aminao re." 19 Ty kapitene mpitarike le nangalake aze tamity tagna hoagne amity toera mitoka naho nagnontane aze ty hoe:" Ino zane ty tokone ho rehafenao amiko zane?" 20 Ty ajalahy nanao ty hoe:" Reo Jiosy le fa nagnenke ty hangatake aminao mba handay Paoly hombaeo amity fipaian-kevetre hamaray, hoe ty hoe iereo le handeha hagnontane ty miomba aze mare kea. 21 Nefa ko magnenke iereo, satria nisy ndaty mihoatre ty efapolo te le fa vogno ty hamono aze. Nikaike ozo hoahy ty vatane iereo, mba tsy hihina ndra hino mandram-pamonoa iereo aze. Fa ndra le zao aza le fa vogno iereo, mandigne fagnenkea bakaminao." 22 Ka nenga ty kapitene mpifehe handeha ty ajalahy, tafara ty nanoroane aze ty hoe:" Ko mirehake ndra aminia ia ty hoe nirehake reo zaka reo tamiko riha." 23 Bakeo re le nikaike ho amine eo ty roe tamireo kapitene ka nanao ty hoe:" Alao ty miaramila roanjato ze vogno ty handeha agne Kaisaria, vaho mpitiki-tsoavale fitompolo avao kea, naho mpanday lefo roanjato. Handeha riha amity lera fahatelo ty hale." 24 Re avao kea le nandily iereo mba hagnomea biby ze afake hitikira Paoly, naho mba handay aze soa aman-tsara agne amy Feliksa ty governora. 25 Bakeo le nanoratre taratasy hoe zao re: 26 "Klaodio Lisia hoahy Feliksa governora soa vatane, arahaba. 27 I lahilahy io le tsinepa reo Jiosy naho fa ho vinono iereo, laha fa niavy tamiereo eo niarake tamity miaramila raho le nagnavotre aze, satria nahay raho fa re le ndatim-perene Romana. 28 Zaho le te hahay ty antone nitana iereo aze, laha zao le nienteko nizotro tao amity fipaian-kevetre iereo re. 29 Nahay raho fa voata tamity aly hevetre mikasike ty lily iereo arere re, nefa tsy nisy fitana nandietre aze te soa amity mate ndra hagadra. 30 Bakeo le nampahaie ahy fa nisy hevetre handiera ty ampela, laha zao le nandefa aze teo naho eo tagne aminao raho, naho nagnafatre reo mpita aze avao kea mba handay ty helo iereo aze eo agnoloanareo. Veloma." 31 Ka laha zao reo miaramila le nagneke reo baiko iereo. Nalae iereo ty Paoly naho nientene tamity hale tagne Antipatria. 32 Ty hamaray, ty hamaroa reo miaramila le nienga reo mpitiki-tsoavale mba handeha hiarake amie fa iereo le nihere tagne an-dapa. 33 Laha fa niavy tagne Kaisaria reo mpitiki-tsoavale ka nanolotre ty taratasy hoahy governora, le nanolotre Paoly tamine avao kea. 34 Laha fa namaky ty taratasy ty governora, le nagnontane ty faritane ze nahavia Paoly re. Laha fa haine fa bakagne Kilikia re, 35 le nanao ty hoe:" Zaho le haharey vatane anao laha fa avy eto reo mpita anao." Le nampitanene tao amireo bey ty fanjaka Heroda re.