¹ "Ry rahalahy vaho ry Rae, dranjigno ty fiarovako ze hataoko aminareo amizao." ² Laha fa naharey Paoly nirehake tamity rehake Hebreo reo vahoake, le ninjare nitsy iereo. Hoe re ty hoe: ³ "Jiosy raho, terake tagne Tarsosy agne Kilikia, fa tineza teto amity tana toy teo amity tombo Gamaliela. Nampianare arake ty fomba mafe ty lily reo razantika raho. Vatane mafana arofo hoan'Agnahare raho, manahake anareo iaby amize andro zao. ⁴ Naneseke lalao hoamity fate raho, namehe vaho nanolotre iereo hatao antragno-maieke ndra lahy ndra vave, ⁵ naho ty mpisorom-bey vaho reo olobey iaby afake mitsanga vavolombelo. Nahazo taratasy bakagne amiereo raho hoahy reo rahalahy agne Damaskosy, naho nandeha nimbaeo nanday iereo nimpoly mboe mifehe hombaeo Jerosalema mba hanazea iereo. ⁶ Zao ro niseho laha fa nandeha naho niharine agne Damaskosy raho, naho tamity misy vovogna eo le nisy hazavam-bey bakagne an-dagnitse nanomboke namiratre nagnodidy ahy. ⁷ Lavo tamity tane raho naho naharey feo nanao tamiko ty hoe:' Saoly, Saoly, nagnino riha ro maneseke Ahy?' ⁸ Namale raho hoe:' Ia moa riha, Tompoko?' Nirehake tamiko Re hoe:' Zaho ro Jesosy Nazareta, ty sesehenao.' ⁹ Reo ze niarake tamiko le nahita ty hazava, fa iereo le tsy nahay ty feo ty nirehake tamiko. ¹⁰ Hoe raho ty hoe:' Ino ro tokone hataoko, Tompoko?' Ty Tompo nanao tamiko ty hoe:' Mitsangana naho milira agne Damaskosy; agne ro hagnambara anao ty zaka-iaby ze tokone hataonao.' ¹¹ Tsy nahita naho ty hasoa ze hazava zay raho, naho nitana reo ze niarake tamiko, ka le niavy tagne Damaskosy raho. ¹² Nifanoje tamity lahilahy raike atao ty hoe Ananiasy tagne raho, lahilahy matahotre an'Agnahare nagnorike ty lily naho soa laza teo amireo Jiosy iaby ze nitoboke tao. ¹³ Namonje ahy re, nitsanga tamiko eo, naho nanao ty hoe:' Ry rahalahy Saoly, mihihira.' Tamize lera zay vatane le nahita aze raho. ¹⁴ Naho nirehake re ty hoe:' Ty Zagnahare reo razantika le nifily anao mba hahay ty sitrampone, mba hahita ty raike Mare, naho haharey ty feo akare ty vavane. ¹⁵ Fa ho vavolombelo ho aze amity ndaty iaby miomba ze hitanao vaho reinao riha. Naho magnino riha ro miambe? Mitsangana, ao hatao batisa, naho liovo reo hadisoanao, mikaiha amity agnarane." ¹⁷ Laha fa baka nihere tagne Jerosalema raho, naho laha mboe nivavake tao an-tempoly, le nahazo dineke raho. ¹⁸ Nahita Aze nirehake tamiko ty hoe:' Malaky miala agne Jerosalema tsiela, satria iereo tsy hagnenke ty fisianao vavolombelo miomba Ahy.' ¹⁹ Hoe raho:' Tompo, iereo vatane le mahay fa zaho nampigadra vaho namofoke reo ze nino Anao tao amity synagoga iaby. ²⁰ Laha fa napoke ty lio Stefana vavolombelo, zaho kea le mba nitsanga teo vaho niharine, naho niambe ty siky reo ze namono aze raho.' ²¹ Fa nirehake tamiko Re ty hoe:' Mandehana, satria halefako lavitre reo Jentilisa riha."' ²² Nidranjy aze iereo zisike ty nirehafane zay. Le nikorake mafe iereo naho nanao ty hoe:" Vono hiala eto amity tane ty lahilahy hoe io, satria tsy soa ty ho velo re." ²³ Laha nitabataba iereo, nanorake ty akanjone, naho nanorake deboke tamity tioke, ²⁴ ty bey ty kapitene le nandily Paoly ba ho ente agne amity lampa. Re nandily fa tokone hagnontanea miarake amity fofoke re, ka mba re vatane le hahay hoe akore iereo ro nikorake nandietre aze hoe zay. ²⁵ Laha fa namehe aze tamity kofehe holitre iereo, le hoe ty Paoly tamity kapitene ze nitsanga teo:" Ara-dala hoanareo vao ty magnaravasy lahilhay Romana vaho tsy mboe nitsarae kea? ²⁶ Laha fa naharey zay ty kapitene, le nimbaeo amity bey ty kapitene re ka nitalily aze, nanao ty hoe:" Ino ze ataonao zao? Fa Ndaty Romana lahilahy io." ²⁷ Namonje ty bey ty kapitene naho nirehake tamine hoe:" Rehafo amiko, vahoake Romana vao riha?" Paoly namale hoe:" Eka." ²⁸ Naho namale ty bey ty kapitene hoe:" Tamity vola bey avao ro nahazoako zom-pirene eo. Fa Paoly nanao ty hoe:" Naterake ho Ndaty Romana raho." ²⁹ Naho nienga aze teo naho eo ty lahilahy ze nagnontane aze. Natahotre avao kea ty bey ty kapitene, laha fa haine fa ndaty Romana ty Paoly, satria re namehe aze. ³⁰ Ty hamaray, te hahay ty mare miomba reo seresere reo Jiosy nandietre Paoly ty bey ty kapitne. Ka vinahane reo fehea naho nandily reo mpisorom-bey vaho reo ao iaby mba hivory re. Naho nanday Paoly nizotro re naho nanao aze teo agnivo iereo.