¹ Henanezao, ry malala, manoratre ho anareo ty taratasy faharoe toy raho ho fampahatiarova ente handrisiha ty sainareo malio, ² mba hahatiarovanareo teo tsara nirehafe ty mpamisavisa masy tagne taloha vaho ty lily Tompo vaho Mpamonje antika ze nomea reo apostolinareo. ³ Haizo aloha, fa ty mpagnaraty le ho avy amity andro farane. Iereo le hagnafake naho handeha arake ty paie iereo arere. ⁴ Iereo le hanao ty hoe:" Aia ty fampagnategna ty amity fiheregnane? Fa zisikezay nolia ty razambey mandre, le tsy niova ty zaka iaby, eka fa zisikamity nanomboha zao iaby zao aza." ⁵ Iereo le milietre magnaligno fa ty lagnitse vaho ty tane le nisy bakamity rano naho tamity alala ty rano, andro ela, ⁶ naho ty lilin'Agnahare, naho tamity alala reo zaka reo, ro nandrava ty tontolo tamize andro zay, tamity rano-bey. ⁷ Fa henanezao ty lagnitse vaho ty tane le natoka hoahy ty afo amity alala io lily io avao. Iereo le voatoka ho amity andro ty fitsara vaho ty famoteha ty ndaty raty fagnahy. ⁸ Ao tsy ho halignonareo, ry malala, fa ty indraike andro amy Tompo le hoe ty arivo tao, naho ty arivo tao hoe ty indraike andro. ⁹ Ty Tompo le tsy ela tamity fanoa reo fampagnategnane, arake ze rehafe ty ilane ho haelane. Fa kea, Re le maharetre aminareo. Tsy teane hisy ho robake nareo, fa mba ho lasa amity fibebaha iaby. ¹⁰ Ndra zay aza, hoahy hoe ty mpangalatre ty andro Tompo: Ty lagnitse le hanjavo miarake amity feo mafe. Ty zaka iaby le ho may ty afo, naho ty tane vaho reo asa ao amine le hambara. (Fagnamarea:Reo dikan-drehake ilane le mivaky ty hoe:"Ty zaka iaby le ho may ty afo, naho ty tane vaho reo asa ao amine le ho oroa iaby.") ¹¹ Ka laha ho rava hoe zay zaka iaby zao, le tokone ho ndaty manao akorenareo? Tokone hivelo amity hamasigna vaho ty havelo arakean'Agnahare nareo. ¹² Tokone hagnategna naho hampalaky ty fahavia ty andron'Agnahare nareo. Amize andro zay, ty lagnitse le ho rava ty afo, naho ty zaka iaby le feno amity hafanam-bey. ¹³ Fa arake ty fampagnategna, le miambe ty lagnitse vaovao vaho tane vaovao tika, te hitoboha ty hamarea. ¹⁴ Laha zao, ry malala, satria magnategna ze zaka zay nareo, manova ty soa vatane bakagne aminareo mba tsy hisy raty vaho tsy hanan-tsiny eo agnoloane, ampiadagna. ¹⁵ Naho kea, dineho ty fahareta Tompontika amity famonjea, manahakety sinora Paoly rahalahy malalantika taminareo, arake ty hamarea ze namea aze. ¹⁶ Paoly le mirehake ze zaka zay ao amity taratasine iaby, ze misy zaka sarotre takare. Ndaty tsy misy fahaia naho tsy miore ro magnova rey zaka rey, manahake ty hanovane reo soratre masy hafa avao kea, ka mahavy harobaha hoahy ty vatane. ¹⁷ Laha zao, ry malala, satria hainareo ze zaka zay, le ambeno ty vatanareo mba tsy ho voafandrike ty fitake ty ndaty raty fagnahy ka ho robake ty hamareanareo. ¹⁸ Fa mitomboa amity hasoava vaho ty fahaia ty Tompontika vaho Jesosy Kirisity Mpamonje antika. Ho aze anie ty hasy henanezao naho zisikagne. Amena!