¹ Ty mpamisavisa sandoke le niavy teo amity ndaty, naho ty mpampianatre sandoke avao kea le hoavy eo aminareo. Handay ambalike sain-diso mamoteke iereo, naho hilietre ty Tompo ze nivily iereo. Iereo le manday hapoteha malaky amiereo. ² Maro ro hagnorike ty falemea iereo, naho amity alala rey ro hirehafan-draty ty lily ty hamarea. ³ Amity fivaza ro hagnararaotane anareo miarake amity rehake mamitake. Tsy hoe lea ty fagnameloha ie rey; tsy miroro ty hapoteha ie rey. ⁴ Fa Zagnahare tsy nandefetre reo anjele ze nanota. Fa kea natolone ho amity velagne tane iereo mba ho voata amity gadra ty faieke mandram-pahavy ty fitsara. 9Fagnanarea:Ty dikan-drehake taloha ilane le mivaky ty hoe:"Mba ho fehe ao amity lavake ty faieke mandram-pahavy ty fitsara.") ⁵ Naho kea, tsy namototre zeo iaby zao taloha Re. Fa kea, namonje Noah, ty mpitalily ty hamarea, miarake amity fito hafa, laha fa nanday ty safo-drano tamity fagnahy teto amizao iaby zao re. ⁶ Zagnahare avao kea le nanao reo tana Sodoma vaho Gomora ho lavenoke naho nagnameloke iereo ho amity hapoteha, ho hoe ty ohatre amize hiseho amity raty fagnahy. ⁷ Fa i Lota mare, te nampijale tamity etam-bata reo ndaty tsy ara-dily tamity halemea, le vinonjen'Agnahare. ⁸ Fa ze lahilahy zay, te nivelo niarake tamiereo isan'andro, le mahaferegnay tamity fagnahy ty hamareane naho zay hitane vaho reine. ⁹ Hay Tompo ty fomba hamonjea reo ndaty soa fagnahy amireo fitsapa, vaho ty fomba hitana reo ndaty tsy mare ho amity fagnaliloa amity andro ty fitsara. ¹⁰ Mare vatane zay hoahy reo ze manohy amity fagnirian-draty ty nofo vaho manao tsinontsino ty fahefa. Mahasaky vaho manompo rehake mafe iereo. Iereo le tsy matahotre hirehake raty reo bey hasy. ¹¹ Reo anjele le mana here vaho fahefa bey, fa iereo le tsy manday fitsara magnaraty mandietre iereo amy Tompo. ¹² Fa reo biby tsy manan-tsay reo le nato ho tsepahe vaho potehe. Tsy hay iereo fandratia iereo. Ho poteke iereo. ¹³ Handrae ty valesoa ty zaka raty nataone iereo. Midineke iereo fa ty tsy fihafea zisike ty andro le hafalea. Iereo le bey menomeno vaho tsiny. Tea iereo ty asa famitaha iereo laha fa mihina miarake aminareo.(Fagnamarea:"Reo dikan-drehake ilane le mivaky hoe zao:" Tea iereo ty asa iereo laha fa mihina miarake aminareo amity sakafom-pifankateava.") ¹⁴ Tolognen'ampela mitsangatsanga iereo; tsy afa-po amity hadisoa vatane iereo. Mitarike fagnahy tsy mete mate ho amity fanoan-draty iereo, naho mana arofo voanatre amity fagniria iereo. Ana ty ozo ie rey! ¹⁵ Niala tamity lala-mahity iereo.Lasa niotake iereo, naho nagnorike ty lala Balama ana i Beora, te tea ty karama ty tsy hamarea. (Fagnamarea:Reo dikan-drehake ilane le mivaky ty hoe:"Balama, ana i Bosora.") ¹⁶ Fa nahazo rehake mafe re naho ty fandikan-diline arere. Nisy borike moa nirehake tamity feo ty ndaty nagnajano ty gaga ty mpamisavisa. ¹⁷ Reo ndaty reo le manahake ty loha-tao tsy misy ora. Hoe ty raho ente ty tafiotre iereo. Natoka hoahy iereo ty ieke mateve. ¹⁸ Mirehake tsy ampandineha iereo. Mitao ty ndaty amity alala ty paie ty nofo iereo. Iereo le mitao ty ndaty te miezake milay reo ze velo amity hadisoa. ¹⁹ Iereo le mpagnategna fahafaha hoahy iereo, kanefa re vatane naho le ndevo ty halotoa. Fa ty ndaty le ndevo iaby ze maherese aze. ²⁰ Ndra ia ia afake amireo halotoa zao iaby zao amity alala ty Tompo vaho Jesosy Mpamonje, naho bakeo mihere amireo halotoa ndraike, le hanjare raty naho ty toeran-jaka voalohane ty toeran-jaka farane. ²¹ Soa kea hoahy reo ty tsy mahay ty lala ty hamarea naho ty mahay zay le hivalike amity lily masy natolotre iereo. ²² Mare hoahy iereo ty ohabola ty hoe:"Ty amboa ro mihere amity loane. Ty koso le fa nisasa mihere mihosem-potake.