¹ Naho namory reo tafine iaby tao Afeka reo Filistina; ² nitobe teo agnila ty loharano ze tagne Jezirela reo Israelita. Zinara reo roandria ty Filistina anjatone vaho agnarivone ty miaramila; Davida vaho reo ndatine nindeha bakeo amity mpiambe ty lala niarake tamy Akisy. ³ Naho hoe reo roandria ty Filistina:" Ino ro atao reo Hebreo reo atoy?" Hoe Akisy tamireo roandrian-dahy Filistina hafa:" Fa tsy Davida vao io, ty mpanompo Saoly, mpanjaka Israely, ze le fa niarake tamiko tamireigne andro reigne, na tamireigne tao reigne kea aza, naho tsy nahisake hadisoa tamine raho hatramize niarahane tamiko ka zisikezao?" ⁴ Nefa reo roandria ty Filistina le meloke tamine; hoe iereo tamine:" Alefaso mindeha agne ze lahilahy zay, ao re hihere agne amity toerane ze nameanao aze; ko enga mindeha miarake amintika ho agne amity aly re, mba tsy ho lasa fahavalontika amity aly re. Fa ino ro hahafaha io nama ao hilongo amy tompone? Feie vao tsy amity alala reo loha ty ndatintika? ⁵ Feie vao tsy io Davida ty nifampiantsa iereo tamim-pandihia, nanao hoe:' Namono agnarivone ty Saoly, naho Davida namono agnalene'?" ⁶ Naho Akisy nikaike Davida ka nanao tamine hoe:" Laha mboe velo kea Yaveh, le soa riha, naho teako ty miarake-miakatre vaho miarake aminao ao amity tafike; fa tsy mboe nahisake hadisoa taminao raho hatramity andro niavianao tatoy amiko ka hatramizao. Na le zay aza, le tsy tea reo roandria riha. ⁷ Ka amizao miheregna naho mindehana ampilamina, mba tsy hampimeloke reo roandria ty Filistina riha." ⁸ Hoe ty Davida tamy Akisy:" Fa ino ro nataoko? Ino ro hisanao tamity mpanomponao zisikamize naha-teo agnoloanao ahy ka zisikezao, ro le tsy afake mindeha mialy handietre reo fahavalo ty tompoko mpanjaka raho?" ⁹ Namale ty Akisy ka nanao tamy Davida hoe:" Haiko fa tsy manan-tsiny manahake ty anjelen'Agnahare eo amasoko riha; na le zay aza, reo roandria ty Filistina le fa nanao ty hoe:' Tsy mahazo miakatre miarake amintika ho agne amity aly re.' ¹⁰ Ka amizao mifohaza magneno akoho miarake amireo mpanompo ty tomponao ze niavy niarake taminao, vatane vaho mifoha riha ty magneno akoho naho mazava ty andro, le mindehana." ¹¹ Naho Davida nifoha magneno akoho, re vaho reo ndatine, mba hiala maray, mba hihere agne amity tane ty Filistina. Nefa reo Filistina niakatre tagne Jezirela.