¹ Naho tamireo andro reo ty Filistina le nampivondro reo tafine hialy amity Israely. Hoe ty Akisy tamy Davida:" Haizo soa fa hiakatre hiarake amiko ho agne antobe, riha vaho reo lahilahinao." ² Hoe ty Davida tamy Akisy:" Ho hainao ze afake hataonao ty mpanomponao." Hoe ty Akisy tamy Davida hoe:" Ka hataoko mpiambe ahy avao riha." ³ Naho mate ty Samoela, naho ty Israely iaby nandala aze ka nandeve aze tao Rama, tao amity tanane. Rinava Saoly tsy ho eo amity tane avao kea reo ze nirehake tamity mate na tamireo fagnahy. ⁴ Naho nivory niarake reo Filistina naho niavy vaho nitobe tao Sonema; naho Saoly nampiharo reo Israely iaby, ka nitobe tao Gilboa iereo. ⁵ Laha fa nahisake ty tafike reo Filistina ty Saoly, le natahotre re, naho nihorohoro mafe ty arofone. ⁶ Nangatake fagnampea tamy Yaveh ty Saoly, kanefa tsy namale aze ty Yaveh__na tamity nofy, na tamy Orima, na tamireo mpaminane. ⁷ Naho hoe ty Saoly tamireo mpanompone:" Ipaio ampela mirehake amity mate raho, mba hahafahako mbaeo amine naho mipay hevetre amine." Hoe reo mpanompone tamine:" Ingo, misy ampela agne Andora ze mirehake amity mate." ⁸ Nagnova vata ty Saoly, nanao akanjo hafa, naho nindeha, re vaho reo lahilahy roe niarake tamine; nimbaeo amity ampela iereo ty hale. Hoe re:" Mangatake aminao raho, manova fikaiha ty mate hoahy, miarake amity fagnahy, naho ento miakatre ze agnara rehafeko aminao." ⁹ Hoe ty ampela tamine:" Ingo, hainao ze natao Saoly, ty nandravane ze mirehake amity mate na amireo fagnahy tsy ho eo amity tane. Ka nagnino riha ro mametrake fandrike ho ahy ty arofoko, mba hamono ahy?" ¹⁰ Nifanta tamine tamity alala Yaveh ty Saoly ka nanao ty hoe:" Laha mboe velo kea Yaveh, le tsy hisy fagnaliloa hahazo anao noho ze zaka zao." ¹¹ Naho hoe ty ampela:" Ia ro tokone ho enteko miakatre aminao eto?" Hoe Saoly:" Ento miakatre ho ahy ty Samoela." ¹² Laha nahisake Samoela ty ampela, le nikorake mafe re naho nirehake tamy Saoly nanao ty hoe:" Nagnino riha ro namitake ahy? Fa Saoly riha." ¹³ Hoe ty mpanjaka tamine:" Ko matahotre. Ino ro hisanao?" Hoe ty ampela tamy Saoly:" Mahisake zagnahare miakatre bakao amity tane raho." ¹⁴ Hoe re tamine:" Manahake ty ino ty toerane?" Hoe re:" Lahilahy antetre ro baka niakatre; manao akanjo lava re." Hay Saoly fa i Samoela zay, ka nagnohoke ty tarehene tamity tane re naho nanoro fagnaja. ¹⁵ Hoe Samoela tamy Saoly:" Nagnino riha ro nagnoronta ahy ka ninday ahy niboake?" Saoly namale ty hoe:" Ore loatre raho, satria reo Filistina le mipay aly handietre ahy, naho ty zagnahare niala ahy naho tsy namale ahy sase, na tamireo mpaminane, na tamireo nofy. Laha zao le nikaike anao raho, mba hahafahanao mampahay ahy ze tokone hataoko." ¹⁶ Hoe ty Samoela:" Ino are ro agnontaneanao ahy, satria niala anao Yaveh, naho lasa fahavalonao re? 17Natao Yaveh taminao ze le fa nirehafene hataone. Le fa nagnafake ty fanjaka tsy ho eo antagnanao re naho nagnomea zay ho ahy ty ndaty hafa__ho ahy Davida. ¹⁸ Satria riha tsy nagnenke ty feo Yaveh naho tsy ninday ty fireheta ty helone tamity Amalekita, le nataone taminao zay androany. ¹⁹ Hafa zay, Yaveh le hanolotre anao vaho ty Israely ho eo antagna reo Filistina. Hamaray riha vaho reo anagnao lahy le hiarake amiko. Hatolo Yaveh ho eo antagna reo Filistina avao kea ty tafike Israely." ²⁰ Avio le lavo niampatre tamity tane ty Saoly naho tena natahotre re noho reo reha Samoela. Tsy nisy here tao agnatene, satria tsy nihinan-kane re zisike ty andro iaby, na tamity hale iaby. ²¹ Nimbaeo amy Saoly ty ampela naho nahisake fa tena nikorontan-tsay re, hoe re tamine:" Ingo, ty mpanompo vavenao le fa nidranjy ty feonao; le fa natoboko teo antagnako ty arofoko naho le fa nidranjy reo rehanao ze natalilinao tamiko. ²² Ka amizao, mangatake aminao raho, dranjigno avao kea ty feo ty mpanompo vavenao, naho engao raho hametrake sakafo kele eo agnoloanao. Mihinana mba hahazoanao here laha fa hindeha amity lalanao riha." ²³ Fa Saoly nilietre naho nanao ty hoe:" Tsy hihina raho." Fa reo mpanompone, niarake tamity ampela, nanere aze, ka le nidranjy ty feo iereo re. Ka nitsanga bakeo amity tane re naho nitoboke teo ampandrea. ²⁴ Nana anak'agnombe nifehe tao antragnone ty ampela; nindeha malaky re naho namono zay; nangalake koba re, nangaro zay, naho nagnende ty mofo tsy misy lalivay niarake tamizay. ²⁵ Nientene teo agnoloa Saoly vaho reo mpanompone zay, naho nihina iereo. Naho nitsanga iereo ka lasa ty hale igne.