¹ Niavy tagne amy Saoly tagne Gibea reo Zifita naho nanao ty hoe:" Tsy mihaja agne amity baibo Hakila, ze mifagnatreke amy Jesimona vao ty Davida?" ² Le nindeha ty Saoly ka nizotro nimbaeo amity efetre Zifa, ninday lahilahy Israely voamare telo arivo niarake tamine, mba hipay i Davida agne antane efetre Zifa. ³ Nitobe teo amity tazoa Hakila ty Saoly, ze nagnatreke Jesimona, teo amoron-dala. Fa nitoboke tagne agnefetre ty Davida, naho hisane fa te hipay aze tagne agnefetre Saoly. ⁴ Ka nagnirake mpijilo ty Davida ka nahay fa tena avy vatane ty Saoly. ⁵ Nitsanga ty Davida naho nindeha tagne amity toera ze nitobea Saoly; hisane ty toera nandrea Saoly, vaho Abnera ana Nera, ty jeneraly ty tafine; nandre tao antobe ty Saoly, naho nitobe nagnodidy aze reo ndaty, sambe azon-droro iaby. ⁶ Le hoe ty Davida tamy Ahimeleka Hitita, vaho tamy Abisay ana i Zeroia, rahalahy Joaba ty hoe:" Ia ro hindeha hizotro ho agne amy Saoly ao antobe miarake amiko?" Hoe Abisay ty hoe:" Zaho! Hombaeo miarake aminao raho." ⁷ Ka nimbaeo amity tafike ty Davida vaho Abisay ty haleke. Niroro tao antobe niarake tamity lefone nitsatoke tamity tane teo agnila ty lohane ty Saoly. Nandre nagnodidy aze ty Abnera vaho reo miaramilane. ⁸ Le hoe Abisay tamy Davida ty hoe:" Natobon'Agnahare ho eo antagnanao ty fahavalonao androany. Engao rie raho amizao hitsoboke aze ho amity tane indraike avao amity lefo. Tsy hagnisy aze fagnindroene kea raho." ⁹ Hoe Davida tamy Abisay ty hoe:" Ko mamono aze; fa ia ro afake mamototre ty tagnane hagnisy ty voahoso Yaveh ka tsy ho meloke?" ¹⁰ Hoe ty Davida hoe:" Laha mboe velo kea Yaveh, le Yaveh ro hamono aze, na hoavy ty andro hifatezane, na hindeha hialy re ka ho mate. ¹¹ Ho rara Yaveh anie ty hamotorako ty tagnako hagnisy ty voahosone; fa amizao, mangatake aminao raho, raeso ty lefo ze eo andohane vaho ty sinin-drano, naho andao hindeha." ¹² Ka le nalae Davida bakeo andoha Saoly ty lefo vaho ty sinin-drano, le niala iereo. Tsy nisy nahisake iereo na nahay miomba zay, na nisy ndaty nifoha, fa azon-droro iaby iereo, satria nipoke tamiereo ty roro laleke bakamy Yaveh. ¹³ Le nindeha tegne andafe ty Davida naho nitsanga teo ambone ty vohitse lavitre tegne; nisy halaviram-bey nagnelagnela iereo. ¹⁴ Nitaba-taba mafe tamireo vahoake vaho Abnera ana i Nera ty Davida; hoe re ty hoe:" Tsy mamale vao riha, ry Abnera?" Le namale Abnera ka nanao ty hoe:" Ia riha ty mikai-kaike ty mpanjaka zao?" ¹⁵ Hoe ty Davida tamy Abnera ty hoe:" Tsy riha vao ty lahilahy bey herem-po? Ia ro manahake anao eto Israely? Nagnino are riha ro tsy niambe ty mpanjaka tomponao? Fa nisy ndaty nilitre hamono ty mpanjaka tomponao. ¹⁶ Tsy soa ze zaka nataonao zao. Laha mboe velo kea Yaveh, le soa ty ho mate riha satria tsy niambe ty tomponao, le ty voahoso Yaveh. Amizao le henteo ze misy ty lefo ty mpanjaka vaho ty sinin-drano teo agnila ty lohane!" ¹⁷ Nahatiaro ty feo Davida ty Saoly ka nanao ty hoe:" Feonao vao zay, ry Davida anadahiko?" Hoe ty Davida ty hoe:" Feoko zay, ry mpanjaka, tompoko." ¹⁸ Hoe re ty hoe:" Nagnino ro maneseke ty mpanomponao ty tompoko? Ino rie ro nataoko? Ino ro raty eo antagnako? ¹⁹ Amizao are, mangatake aminao raho, ao ty tompoko mpanjaka hidranjy ty reha ty mpanompone. Laha Yaveh ro nanao anao handietre ahy, ao Re hagnenke fagnatetre raike; fa laha ndaty zay, le ho voaozo eo amaso Yaveh anie re, fa nandroake ahy iereo androany, mba tsy hipitehako amity lova Yaveh; hoe iereo tamiko ty hoe:' Mindehana manompo zagnaharen-kafa.' ²⁰ Amizao are, ko enga ho robake eo amity tane lavitre ty fiatreha Yaveh ty lioko; fa le fa niakatre hipay ty pia kele raike manahake ty hihaza ty ndaty tsipoy raike agne amireo vohitse ty mpanjaka Israely." ²¹ Le hoe Saoly ty hoe:" Nanonta raho. Miheregna, ry Davida, anadahiko; fa tsy hagnisy raty anao sase raho, satria lafo-vily teo amaso ty arofoko androany. Ingo, nigege-gege raho naho nanao hadisoa raty vatane." ²² Namale ty Davida ka nanao ty hoe:" Ingo, toy ty lefonao, ry mpanjaka! Ao hisy raike amireo ajalahy hitsake naho hangalake zay ka hinday zay agne aminao. ²³ Yaveh anie hamale ty ndaty kirai-kiraike noho ty hamareane vaho ty fatokiane iaby; satria nametrake anao teo antagnako Yaveh androany, feie tsy nagnisy ty voahosone raho. ²⁴ Ingo, hoe ty naha-lafo vily ty arofonao teo amasoko androany, le enga anie ka hamean-kasy eo amaso Yaveh manahake zay ty arofoko, naho hagnavotre ahy amity fijalea iaby anie Re." ²⁵ Le hoe ty Saoly tamy Davida:" Ho tahie anie riha, ry Davida anako! Hanao zaka foloay vatane riha naho hambine amizane." Ka nimbaeo tamity lalane ty Davida, naho nihere tagne amity toerane ty Saoly.