¹ Naho nimate ty Samoela. Niarake-nivory ty Israely iaby naho nandala aze, le nienga iereo tagne antragnone tagne Rama re. Le nindeha ty Davida naho nimbaeo agnefetre Parana. ² Nisy lahilahy raike tagne Maona, ty tagne Karmela ty fanagnane. Tena nanan-karea lahilahio. Nana agnondry telo arivo vaho ose arivo re. ³ Nagnitrike ty agnondrine tagne Karmela re. Nabala ro agnara ty lahilahy, naho ty agnara ty valine le Abigaila. Nahihitse ampela ao naho soa tarehe. Fa ty lahilahy kea masiake vaho raty tamity fiaignane . Foko ty longo i Kaleba re. ⁴ Rey Davida tagne agnefetre fa nagnitrike ty agnondrine ty Nabala. ⁵ Ka le nandefa ajalahy folo re. Le hoe Davida tamireo lahilahy:" Mindeha agne Karmela, mindehana agne amy Nabala, naho manalama aze amity agnarako. ⁶ Ambarao nareo amine ty hoe:' Mivelogna agnate fagnambina. Filamina anie ho anao naho fiadagna anie ho ahy ty fokonao, naho fiadagna anie ho ahy iaby ze hanagnanao. ⁷ Reiko fa mana mpagnitrike maro riha. Le fa niarake taminay reo mpiarake agnondrinao, naho tsy mba nagnisy raty iereo zahay, naho tsy nisy na ino ino tsy ampe tamiereo tamy mboe tagne Karmela. ⁸ Agnontaneo ty ajalahinao, le ho rehafe iereo aminao. Naho engao reo ajalahiko hahisake saotre eo amasonao, fa tsy maintsy avy zahay amity andro fete. Mba ameo rie na ino ino hanagnanao eo antagnanao ho ahy reo mpanomponao naho ho ahy Davida anadahinao."' ⁹ Laha fa niavy ty ajalahy Davida, le nirehafe iereo tamy Nabala ho ahy Davida iaby zay iaby zay, bakeo le nandy iereo. ¹⁰ Namale reo mpanompo Davida ty Nabala nanao ty hoe:" Ia ze Davida zao, naho ia ze anadahy Jese zao? Nisy mpanompo maro ze nisara-dala tamity tompo iereo tamize andro zay. ¹¹ Tokone hangalake ty mofoko vaho ty ranoko naho ty henako ze le fa vinonoko ho ahy ty mpagnitriko vao raho, naho hagnomea zay ho ahy ty ndaty ze tsy haiko kea hoe bakaia?" ¹² Ka le nihere naho nindeha noly ty ajalahy Davida, naho nirehake iaby ze voatalily tamine. ¹³ Le hoe Davida tamireo ndatine:" Apetaho ty meso ty ndaty kiarai-kiraike." Ka le nametake ty mesone ty ndaty kirai-kiraike. Le nametake ty mesone avao kea ty Davida. Lahilahy teo amity efajato teo ro nagnorike Davida, naho roanjato ro nijano teo agnila ty enta. ¹⁴ Fa nirehake tamy Abigaila, valy Nabala, ty raike tamireo ndaty, nanao hoe:" Nandefa irake maro bakagne agnefetre mba hanalama ty tomponay tyDavida, naho rinati-raty iereo. ¹⁵ Kanefa tena soa taminay vatane ty ndaty. Fa tsy nisy raty nahazo anay naho tsy nisy tsy ampe taminay laha mboe nindeha niarake tamiereo kea zahay tamy mboe tagne amireo baibo. ¹⁶ Manda ho anay iereo na andro na hale, zisike ty niarahanay tamiereo niarake agnondry. ¹⁷ Laha zao haio zay naho dineho ze hataonareo, fa misy raty dinehe hatao amity tomponay, vaho ty fokone. Le ny raty fagnahy vatane re kay ka tsy misy raike afake mirehake aze." ¹⁸ Bakeo Abigaila nangalake mofo roanjato malaky, divay roe tavoangy, agnondry voa voatre dime, fatran-dango maike dime, mofo voaloboke zato, vaho ampempan'aviavy roanjato, naho natobone teo ambone reo borike reo. ¹⁹ Le hoe re tamity ajalahine:" Mindehana eo alohako, le hagnorike anao raho bakeo." Feie tsy nirehake tamy Nabala valine re. ²⁰ Laha fa nitikitre ty borikene re le nimbaeo agnila ty tazoa, Davida vaho reo ndatine nimbaeo amine, naho nifankahisake tamiereo re. ²¹ Naho nirehake Davida hoe:" Tena zaka-foa ro niambenako iaby ze fanagna lahilahy io tagne agnefetre, fa tsy nisy na ino ino robake iaby iaby zay, le vinalene raty ty soa nataoko aze. ²² Hanao hoe zay amiko anie ty Zagnahare, ry Davida, naho mihoatre aza, laha mamototre na le lahilahy raike amireo ze aze raho zisike-maray." ²³ Laha fa nahisake i Abigaila ty Davida, le nimbaeo malaky bakeo amity borikene naho nandohaleke vaho niondreke naho nagnohoke ty vatane teo amity tane teo agnoloa Davida. ²⁴ Nandohaleke teo amity tombone re naho nanao ty hoe:" Ho amiko arere avao, ry tompoko, ty hamelofa. Engao rie ty mpanomponao mba hirehake aminao, naho midranjigna reo reha ty mpanomponao. ²⁵ Ao tsy hagnente io Nabala, lahilahy raty fagnahy io ty tompoko, fa arake ty agnarane, le hoe zay avao re. Nabala ro agnarane, naho miarake amine ty hagegea. Fa zaho mpanomponao le tsy nahisake reo ajalahy ty tompoko, ze nalefanao. ²⁶ Amizao are, ry tompoko, laha mboe velo kea Yaveh, naho laha mboe velo kea riha, satria rinava Yaveh tamity fampipohan-dio, vaho tamity famalea ty vatanao tamity tagnanao avao riha, le ao reo fahavalonao, vaho reo ze mipay hanao raty amity tompoko, hanahake i Nabala. ²⁷ Naho ao ty fomey ze le fa niente ty mpanomponao tamity tompoko toy mba hatolotre ho ahy reo ajalahy ze magnorike ty tompoko. ²⁸ Mba engao rie ty hadisoa ty mpanomponao, fa hananga toera azo antoke ho ahy ty tompoko vatane Yaveh, satria mialy ty aly Yaveh ty tompoko; naho ty raty tsy ho hisake egne aminao laha mboe velo kea riha. ²⁹ Na le mitsanga hagnia mba hagnafake ty arofonao aza reo lahilahy, le fa ho fehe Yaveh Zagnaharenao amity fehea ty velo ty arofo ty tompoko; naho hatorane ty arofo reo fahavalonao, eo amity foe ty pilatse. ³⁰ Le hatao Yaveh amity tompoko reo iaby nampagnantegnane anao, arake ty nanendreane anao ho mpinday eo amity Israely. ³¹ Tsy ho enta-mavesatre ho anao__ty nampipohanao lio tsy mana-tsiny, na noho ty nagnandrama ty tompoko hagnavotre ty vatane. Fa laha fa hanao soa ho ahy ty tompoko Yaveh, le tiarovo ty mpanomponao." ³² Le hoe Davida tamy Abigaila:" Isaora anie Yaveh, Zagnahare Israely, Re ty nandefa anao hifankahisake amiko androany. ³³ Ho tahie ty hamareanao, naho ho tahie riha, satria le fa narovanao tamity fampipohan-dio vaho famalea fate ty vatako tamity tagnako avao raho! ³⁴ Fa laha ty mare, laha mboe velo kea Yaveh, Zagnahare Israely, Re ty niaro ahy tsy hamere anao, laha tsy nindeha malaky hifankahisake amiko riha, le tsy ho nisy nienga ho ahy Nabala laha-tsy kolo lahy kele raike ty maray." ³⁵ Ka le nandrae ze nientene ho aze bakamity tagna Davida; hoe re tamine:" Mindehana ampilamina agne amity fokonao; ingo, le fa nidranjy ty feonao raho, naho le fa nagnenke anao." ³⁶ Le nihere tagne amy Nabala ty Abigaila; ingo, nanao fagnafara tao antragnone re, hoe ty fagnafara ty mpanjaka; naho ty arofo ty mpanjaka fale tao agnatene, satria mamo vatane re. Ka tsy nirehake na ino ino re zisike-maraindray. ³⁷ Tamy ty maray, laha fa nisava ty divay Nabala, le nirehafe valine tamine reo zaka reo; le nilofike tao agnatene ty arofone, naho nanjare hoe ty vato re. ³⁸ Naho folo andro tafara atoy le nagnisy i Nabala Yaveh ka mate re. ³⁹ Laha fa rey Davida fa nimate ty Nabala, le hoe re:" Isaora anie Yaveh, ty nahay ty fandratia ahy bakamity tana Nabala, vaho niaro ty mpanompone tamity raty. Nampoly ty raty natao Nabala teo amity lohane avao re." Bakeo Davida nagnirake naho nirehake tamy Abigaila, mba hangalake aze ho valy. ⁴⁰ Laha fa niavy tagne amy Abigaila tagne Karmela reo mpanompo Davida, le nirehake tamine iereo naho nanao ty hoe:" Nandefa anay ho atoy aminao ty Davida mba hangalake anao ho valine." ⁴¹ Le nitsanga re, nagnohoke ty tarehene tamity tane, naho nanao hoe:" Ingo, ty mpanompo vavenao le mpanompo hanasa ty tombo ty mpanompo ty tompoko." ⁴² Le nitsanga malaky ty Abigaila, naho nitikitre ty borike niarake tamireo mpanompo vavene dime ze nagnorike aze; naho nagnorike reo irake Davida re ka lasa valine. ⁴³ Le nalae Davida ho valine avao kea Ahinoama Jezirela; le sambe lasa valine iereo roe. ⁴⁴ Naho kea, Saoly nanolotre i Mikala anakampelane, valy Davida, ho ahy Palty anadahy Laisa, ty bakagne Galima.