¹ Telopolo tao ty Saoly ro nanomboke nanjaka; laha fa nanjaka efapolo tao teo amy Israely re, ² le nagnisy lahilahy telo arivo teo amy Israely. Roe arivo ro niraike tamine tagne Mikmasy vaho tagne amity tazoa ty tana Betela, laha ty arivo kea niarake tamy Jonatana tagne Gibea Benjamina. Reo miaramila sisa tavela le nalefane noly, ty lahilahy kirai-kiraike sambe ho agne antragnone iaby. ³ Naharese ty tobe miaramila Filistina ty Jonatana ze tagne Geba naho naharey zay reo Filistina. Le nitioke trompetra nagnera ty tane iaby ty Saoly, nanao ty hoe:" Ao haharey reo Hebreo." ⁴ Rey ty Israely iaby fa Saoly le naharese ty miaramila ty Filistina, naho ty Israely avao kea le lasa fofo lo ho ahy reo Filistina. Naho reo miaramila le nampikaihe hiharo hagnorike Saoly agne Gilgala. ⁵ Niara-nivory reo Filistina mba hialy handietse ty Israely: Kalese telo arivo, lahilahy enegnarivo hinday reo kalese, naho vondro maro agnisa hoe ty faseke egne amoron-driake. Niakatre iereo naho nitobe tagne Mikmasy, antignana Betavena. ⁶ Laha fa hisa reo lahilahy Israely fa nisavoritake iereo__fa ore ty vahoake, le nihaja tao amireo zahy, tao amity ala, tao amireo haram-bato, tao amity famorian-drano, naho tao agnate lavake ty vahoake. Ty ilane tamireo Hebreo nitsake tagne Jordana ho agne amity tane Gada vaho Gileada. Fa Saoly kea mboe tagne Gilgala, naho ty vahoake iaby nagnorike aze tamin-tahotse. ⁸ Niambe zisike ty fito andro re, ty andro ze namea Samoela. Fa Samoela tsy niavy tagne Gilgala, naho ty vahoake le nizara niala teo amy Saoly. ⁹ Hoe ty Saoly:" Ento amiko atoy ty fagnatetre oroa vaho ty fagnate-pilongoa." Le natolone ty fagnatetre oroa. ¹⁰ Vatane vaho natolone ty fagnatetre oroa le niavy ty Samoela. Niakatre nanalaka vaho nanalama aze ty Saoly. ¹¹ Naho hoe ty Samoela:" Ino ty nataonao?" Namale ty Saoly hoe :" Laha fa hisako fa niala tamiko ty vahoake, naho tsy niavy tamiko eto tamity andro namea riha, naho reo Filistina le fa nivory tagne Mikmasy, ¹² le hoe raho ty hoe:' Amizao reo Filistina le hizotro handietre ahy ao Gilgala, naho zaho tsy nipay ty fagnenkea Yaveh.' Ka nanere ty vatako hanolotre ty fagnatetre oroa raho." ¹³ Naho hoe Samoela tamy Saoly:" Nanao hagegea riha. Tsy niambe ty lily Yaveh Zagnaharenao ty nameane anao riha. Fa tamizay ro nametraha Yaveh ty fandilianao eo amy Israely zisikezay. ¹⁴ Fa amizao le tsy hitohy ty fandilianao. Nipay lahilahy raike arake ty arofone avao ty Yaveh, naho Yaveh nanendre aze ho roandria eo amity vahoakene, satria tsy nagnenke ze nandiliane anao riha." ¹⁵ Bakeo le nindeha ty Samoela ka niakatre bakagne Gilgala ho agne Gibea ty Benjamina. Naho Saoly nagnisake ty vahoake ze niavy niarake tamine eo, teo amity enen-jato lahy teo. ¹⁶ Saoly, Jonatana anadahine, naho ty vahoake ze niavy niarake tamiereo, le nitoboke tao Gibea Benjamina. Fa reo Filistina kea nitobe tagne Mikmasy. ¹⁷ Niakatre bakao amity tobe reo Filistina tamity vondro telo reo mpanafike. Ty vondro raike nimbaeo Ofra, agne amity tane Soala. ¹⁸ Ty vondro raike hafa nimbaeo amity sisin-tane ahisaha ty Baibo Zeboima magnoloa ty tane efetre. ¹⁹ Tsy nahisaha mpanefe nagnera ty Israely iaby, satria hoe reo Filistina:" Laha tsy zay reo Hebreo le nagnamboatre meso na lefo ho ahy iereo." ²⁰ Fa reo lahilahy Israely iaby le fa zatre nizotro nimbaeo amireo Filistina, ty kirai-kiraike mba handrangitre ty fangaline, ty fihalian-tanene, ty famakine, naho ty mesom-bilone. ²¹ Ty viline le roe ampahatelo ty Sekele ty fangaly, vaho ty fihalian-tane, naho raike ampahatelo ty sekele ty fandragnita ty famaky vaho ty fagnitia ty fitsoboha. ²² Ka tamity andro ty aly, le nahisaha meso na lefo teo antagna reo miaramila ze niarake tamy Saoly vaho Jonatana; Saoly vaho Jonatana anane avao ro nana zay. ²³ Reo miaramila ty Filistina le niakatre nimbaeo amity lala Mikmasy.