¹ Hoe ty Samoela tamity Israely iaby:" Le fa nidranjy ty zaka iaby rinehanareo tamiko raho, naho le fa nanendre mpanjaka teo aminareo. ² Amizao, ingo mindeha eo agnoloanareo ty mpanjaka; naho le fa antetre vaho foty volo raho, naho, reo anako le aminareo eo. Le fa nindeha teo agnoloanareo hatramity hakeleako ka zisikezao raho. ³ Toy raho, mitsangana vavolombelo handietre ahy eo agnoloa Yaveh vaho eo agnoloa ty voahosone. Agnombe nia ro le fa nalaeko? Ampondrania ro le fa nalaeko? Ia ro le fa vinerevereko? Ia ro le fa nampijaleko? Bakamity tagna nia ro le fa nandraesako kolikoly mba hanampe ty masoko? Mitsangana vavolombelo handietre ahy, fa hahereko aminareo zay." ⁴ Hoe iereo hoe:" Tsy namitake anay riha, tsy nampijale anay, na nangalake na ino ino bakeo antagna ty ndaty." ⁵ Le hoe re tamiereo ty hoe:" Yaveh ro vavolombelo aminareo, naho ty voahosone ro vavolombelo androany, fa tsy nahisake na ino ino teo antagnako nareo." Iereo namale ty hoe:" Yaveh ro vavolombelo." ⁶ Hoe Samoela tamireo vahoake hoe:" Yaveh ro nanendre Mosesy vaho Arona, naho ninday ty razambeinareo niakatre bakao, amity tane Egypta. ⁷ Ka amizao, atoloro ty vatagnareo, mba hahafahako mifandahatre aminareo eo agnoloa Yaveh mikasike reo asa mare Yaveh, ze nataone hoanareo vaho ty razambeinareo ⁸ Laha fa niavy tagne Egypta ty Jakoba, naho nitaray tamy Yaveh reo razambeinareo, le nandefa Mosesy vaho arona Yaveh, ze nitarike reo razambeinareo hiakatre Egypta naho nitoboke tamity toera toy iereo. ⁹ Fa iereo nagnaligno Yaveh Zagnaharene; ka nivarotre iereo teo antagna Sisera, mpitarike reo tafike Hazora re, teo antagna reo Filistina, naho teo antagna ty mpanjaka Moaba, iaby reo ro nialy tamity razambeinareo. ¹⁰ Nitaray tamy Yaveh iereo naho nanao ty hoe:' Le fa nanonta zahay, satria nahafoe Yaveh naho le fa nanompo reo Bala vaho reo Astarta. Fa amizao, magnafaha anay eo antagna reo fahavalonay, le hanompo anao zahay.' ¹¹ Laha zao le nagnirake Jerobala, Bedana, Jefta, naho Samoela ty Yaveh, naho nagnomea fandresea anareo teo amireo fahavalonareo iaby magnodidy anareo, ka nahafahanareo nivelo-ampilamina. ¹² Laha fa hisanareo fa avy handietre anareo ty Nahasa mpanjaka ty vahoake Amona, le hoe nareo tamiko hoe:' Aha! Fa kea, ho mpanjaka kea ro hanjaka eto aminay'__kanefa Yaveh Zagnaharenareo, ro mpanjakanareo. ¹³ Ingo amizao ty mpanjaka ze finily nareo, ze nangatahenareo, naho ze tinendre Yaveh ho mpanjaka aminareo eo androany. ¹⁴ Laha matahotre Yaveh nareo, le manompoa aze, enkeno ty feone, naho ko mavande handietre ty lily Yaveh, naho sambe ho mpagnorike Yaveh Zagnaharenareo nareo vaho ty mpanjaka ze manjaka aminareo eo. ¹⁵ Fa laha tsy magnenke ty feo Yaveh nareo, fa mavande mandietre reo lily Yaveh, le hagnisy anareo ty tagna Yaveh, manahake ty nagnisia reo razambeinareo. ¹⁶ Ka mitsangana amizao naho henteo ze zaka foloay ty hatao Yaveh eto amasonareo zao. ¹⁷ Feie vao tsy androm-pihaza vare tritrike zao? Hikaike Yaveh raho, mba handefasane hotrok'ora. Le ho hainareo vaho ho hisanareo fa bey ty haratiam-pagnahinareo, ze nataonareo teo amaso Yaveh, tamity alala ty fangatahanareo mpanjaka." ¹⁸ Ka le nikaike Yaveh ty Samoela; naho tamize andro zay avao le nandefa oram-baratre Yaveh. Naho le natahotre mafe Yaveh vaho Samoela ty vahoake iaby. ¹⁹ Le hoe reo vahoake iaby tamy Samoela hoe:" Mivavaha ho ahy reo mapanomponao amy Yaveh Zagnaharenao, mba tsy ho mate zahay. Satria le fa nagnampe ty hadisoanay iaby tamize zaka-raty zao tamity alala ty fangataha mpanjaka zahay." ²⁰ Le namale Samoela hoe:" Ko matahotre. Le fa nanao ze raty iaby zao nareo, kanefa ko miala amy Yaveh, fa manompoa Yaveh amity arofonareo iaby. ²¹ Ko mivio magnorike reo zaka-foa ze tsy mahasoa na mahavonje anareo, satria le tsy misy ipaia aze eo. ²² Fa noho ty agnarane bey, le tsy hilietse ty ndatine Yaveh, satria mahafale Yaveh ty hanao anareo ho vahoakene. ²³ Laha ty amiko, le sagnatriaveko ty hanonta amy Yaveh amity fijanogna ty hivavake ho anareo. Fa kea hagnanatre anareo ty lala ze soa vaho mare raho. ²⁴ Yaveh avao ro atahoro naho manompoa Aze amity fahitia amity arofonareo iaby. Hevero reo zaka-foloay ze le fa nataone taminareo. ²⁵ Fa laha mikiry ty hanao raty nareo, le sambe ho rava nareo vaho ty mpanjakanareo."