¹ Petera, apositoly Jesosy Kirisity, hoahy reo ana ampielea, reo ze voafily, magnera Ponto, Galatia, Kapadokia, Asia, naho Bitynia. ² Zay le arake ty haina'Agnahare Rae aloha, voatoka ty Fagnahy ho fagnenkea vaho ho fagniligna ty lio Jesosy Kirisity. Ho aminareo anie ty hasoava, naho hitombo anie ty fiadagnanareo. ³ Ho tahie anie Zagnahare vaho Rae Jesosy Kirisity Tompontika. Tamity fandeferane, ro nagnomezane antika hateraha vaovao hoahy ty fatokisa ty lova. Ze lova zay le tamity alala ty fitsangana Jesosy tamity mate. ⁴ Zay lo hoahy ty lova ze tsy ho mate, tsy ho simba, naho tsy ho rava. Zay le voatoka ho anareo agne andagnitse. ⁵ Nareo le arova ty heren'Agnahare amity alala ty finoa, hoahy ty famonjea ze le fa vogno ho atalily amity andro farane. ⁶ Vatane falefale miomba zay nareo, ndra le paienareo aza ty hahatiaro malahelo amity ndaty maro sambe hafa henanezao. ⁷ Zay le hoahy ty fagnamarea ty finoanareo, te lafovily kea naho ty volamena ze simba, ndra le nanoe tamity afo aza. Miseho zay mba ho hita ty voka ty finoanareo amity fiantsa, hasy, naho haja amity hisehoa Jesosy Kirisity. ⁸ Tsy nahita Aze nareo, nefa tea Aze. Tsy mahita aze nareo henanezao, kanefa mino Aze naho vatane fale amity hafalea tsy hay rehafe, mahafale. ⁹ Raesnareo henanezao ty voka ty finoanareo, le ty famonjea ty fagnahinareo. ¹⁰ Reo mpamisavisa le nikaroke vaho nagnotane soa ty miomba ze famonjea zay, ty miomba ty hasoava ze ho anareo. ¹¹ Iereo le nipay ty hahay ty miomba ty hoe ia vaho mbia ty Fagnahy Kirisity ao amiereo ro nirehake tamiereo. Zay le niseho hoe ty nirehafene amiereo aloha miomba reo fijalea Kirisity vaho ty hasy magnarake zay. ¹² Natalily tamiereo zay mba tsy hanompo ty vatane iereo, fa nareo, laha fa nirehake reo zaka ze voatalily taminreo henanezao iereo tamity alala reo ze nitalily ty zaka soa taminreo tamity alala ty Fagnahy Masy nalefa bakagne andagnitse te tea reo anjele ho hay. ¹³ Laha zao vognono ty sainareo. Mionognam-bata. Mametraha fatokia amity hasoava ze ho ente aminareo eo amity hisehoa Jesosy Kirisity. ¹⁴ Amity maha anake mpagnenke, ko mpampifagnorike ty vatanareo amireo fagniria ze norihenareo tamity mboe tsy nahay nareo. ¹⁵ Fa manahake ty raike ze nikaike anareo ty hoe masy, nareo, avao kea, ao ho masy amity entam-batanareo iaby. ¹⁶ Fa voasoratre ty hoe:" Ao ho masy, satria masy Raho." ¹⁷ Ka laha mikaike ty raike ze mitsara tsy misy fagnefera arake ty asa ty ndaty kirai-kiraike iaby ty hoe:"Rae" nareo, le handany ty andronareo amity fanoroa fagnaja. ¹⁸ Hainareo fa tsy bakamity volafoty ndra volamena mete rava ro nagnavota anareo tamity entam-bata gege ty nianaranareo tamireo razanareo. ¹⁹ Fa kea, navota tamity lio lavovily kirisity nareo, te heo ty anak'agnondry tsy misy havoa ndra tsiny. ²⁰ Voafily taloha ty nanangana zao iaby zao Kirisity, fa henanezao le tamireo andro farane ro nagnambara Aze tamireo. ²¹ Amity alalane ro hinoanareo an'Agnahare, ze nananga aze tamity mate vaho tamireo nameane hasy mba ho ao amin'Agnahare ty finoa vaho fatokianareo. ²² Nagnalio ty fagnahinareo tamity fagnenkea ty hamarea nareo. Zay le hoahy ty hatea ara-pirahalahia malio; laha zao mifankateava mafe amity arofo.[Fagnamare:Reo dikan-drehake ilane le mivaky ty hoe:"Nagnalio ty fagnahinareo tamity fagnenkea ty hamarea tamity alala ty Fagnahy nareo"] ²³ Naterake ndraike nareo, tsy bakamity voa mete mate, fa bakamity voa tsy mete mate, amity alala ty tsaran'Agnahare velo vaho mitoetre ²⁴ Fa"ty nofo iaby le hoe ty akata, naho ty hasine iaby le hoe ty folera ty akata. Maike ty akata, naho malazo ty folera, ²⁵ fa ty tsara Tompo le mitoboke zisikagne." Zay ty vaovao mahafale te natalily taminareo.