¹ Mpanjaka teo amy Israely iaby ty Solomona Mpanjaka. ² Toa reo manam-pahefa: Azaria ana i Zadoka ro mpisoro. ³ Elihorefa vaho Ahia ana i Sisa, ro mpitan-tsoratre. Josafata ana i Ahiloda ro mpitam-boke. ⁴ Benaia ana i Joiada ro nita ty tafike. Zadoka vaho Abiatara ro mpisoro. ⁵ Azaria ana i Natana ro nifehe reo manam-pahefa. Zaboda ana i Natana le mpisoro vaho nama ty mpanjaka. ⁶ Ahisara ro nifehe ty tokan-tragno. Adonirama ana i Abda teo amireo ndaty zay ro nifehe reo mpanao asa seresere. ⁷ Nana manam-pahefa roe amby folo ty Solomona magnera Israely iaby, ty niantoke ty sakafo ho ahy ty mpanjaka vaho ty fokone. Ty lahilahy kirai-kiraike aby le niantoke ty tahirin-kane zisike ty volane raike ao agnate ty tao. ⁸ Toa aby ty agnarane: ⁹ Beni-hora, bakagne antane tazoa Efraima; Beni-dakera tao Makaza, Salbima, Beti-semesy, vaho Elon-beti-hanana; ¹⁰ Beni-haseda, tao Arobota(Aze vaho Soko vaho ty tane iaby tao Hefera); ¹¹ Beni-Abinadaba, teo amity distrike Dora iaby( Tafata anak'ampela Solomona ro valine); ¹² Bana ana i Ahiloda, tao Tanaka vaho Megido, vaho Beti-sana iaby ty tagnila Zaretana ambane Jezirela, bakeo Beti-sana ka zisikagne Abela-mehola lavitse ty tioke i Jokneama; ¹³ Beni-gabera tao Ramota-gileada (Aze ty tana i Jaira ana i Manase, ty tao Gileada, naho ty faritre Argoba le aze, ty tagne Basana, tanam-bey enempolo misy rindry vaho hilim-baravara varahy); ¹⁴ Ahinadaba ana i Ido, tao Mahanaima; ¹⁵ Ahimaza, tao Naftaly (vinaline avao kea ty Basemata anak'ampela Solomona); ¹⁶ Bana ana i Hosay, tao Asera vaho Bealota; ¹⁷ Josafata ana i Paroa, tao Isakara; ¹⁸ Simey ana i Ela, tao Benjamina; ¹⁹ naho Gabera ana i Ory, agne amity tane i Gileada, tana i Sihona mpanjaka ty Amorita vaho Oga mpanjaka Basana, naho re raike ro manam-pahefa ty tao amity tane. ²⁰ Joda vaho Israely le maro manahake ty faseke amoron-driake. Nihina vaho nino iereo naho fale. ²¹ I Solomona le nandily ty fanjaka iaby zisikeo amity Rano ka zisikagne antane Filistina vaho ty sisin-tane Egypta. Ninday fagnomean-kasy vaho nanompo i Solomona iereo zisike ty androm-piaignane iaby. ²² Ty tahirin-tsakafo i Solomona agnate ty andro raike le koba soa lisa telopolo kora vaho sakafo enempolo kora, ²³ agnombe vondrake folo, agnombe tsy nihinam-bilo roapolo, naho agnondry zato, hafa ty serfa, gazela, kapreola, naho voro vinondrake. ²⁴ Satria nanam-pahefa tamity faritse iaby magnila ty rano igne re, bakeo Tifsa ka zisikagne Gaza, mohoatre reo mpanjaka iaby ze nagnila ty rano, le nana filamina tamity nagnodidy aze iaby re. ²⁵ Niay am-pitonia ty Joda vaho Israely, ty ndaty iaby le teo ambane ty vaolobone vaho ty aviavine, bakeo Dana zisikagne Beri-sheba, tamity andro i Solomona iaby. ²⁶ Nana tragnon-tsoavale efapolo ale re ho ahy ty kalesine, naho mpitiki-tsoavale roa arivo vaho ray ale. ²⁷ Reo manan-kasy reo le niantoke sakafo ho ahy Solomona mpanjaka vaho ahy reo iaby ze bakeo amity lataba Solomona, ty ndaty iaby tamity volane abike. Ka tsy nenga iereo ho tsy ampe ty zaka iaby. ²⁸ Ninday vare hordea vaho mololo ho ahy reo soavale mpitarike kalese vaho soavale fitikira iereo, sambe minday ze leone abike ty kirai-kiraike. ²⁹ Nomean'Agnahare fahendrea vaho hazavan-tsay bey ty Solomona, naho velaran-tsay manahake ty faseke egne amoron-driake. ³⁰ Ty hamarea Solomona le nihoatre ty hamarea reo ndaty iaby tagne antignana vaho ty hamarea Egypta. ³¹ Nanan-kamarea naho ty ndaty iaby re_naho i Etana Ezrahita, Hemana, Kalkola vaho Darda ana i Mahola_naho ty lazane le niavy tagne amity firene magnodidy iaby. ³² Nirehake Ohabola telo arivo re naho dime amby arivo ty hirane laha isahe. ³³ Namaritre ty zaka-mitiry re, bakamity sedara tane Libanona ka zisike amity hysopa ze magniry magnorike ty rindry. Nagnazava momba reo biby avao kea re, reo voro, reo zaka milaly, naho ty hazan-driake. ³⁴ Niavy iaby tamity firene iaby ty ndaty mba hidranjy ty hamarea i Solomona. Iereo le bakamireo mpanjaka iaby ty tane ze le fa naharey ty hamareane.