¹ Nanao dina tamy Farao mpanjaka ty Egypta tamity alala ty fanambalia ty Solomona. Nangalake ty anak'ampela Farao re naho ninday aze tao amity tana Davida zisike ty hivita nagnore ty tragnone arere, ty tragno Yaveh, naho ty manda magnodidy i Jerosalema. ² Tegne amireo toera abo ro nagnanova reo ndaty soro, satria mboe tsy nisy tragno niore ho ahy ty agnara Yaveh. ³ Nanoro ty hateane Yaveh ty Solomona tamity fandehana arake ty lily Davida raene, laha tsy ze nagnanovane soro vaho nagnoro liten-ketae magnitse tegne amireo toera abo re. ⁴ Nimbaeo Gibeona ty mpanjaka mba hanao soro tegne, satria toera abo bey zay. Nanolotre fagnatetre oroa arivo teo ambone zay alitara zay ty Solomona. ⁵ Tao Gibeona le niseho tamity nofy tamy Solomona Yaveh laha ty hale; hoe re hoe:" Angataho! Ino ro tokone homeako anao?" ⁶ Ka hoe ty Solomona hoe:" Riha le fa nanoro tsy fivaliham-pagnenkea bey tamity mpanomponao, le i Davida raeko, Satria nindeha teo agnoloanao tamity famarea-mpitokisa, tamity hamarea, naho tamity fahitim-po re. Nitananao ho aze ty tsy fivaliham-pagnenkea bey toy naho nomeanao anadahy hitoboke eo amity sezan-droandriane re amizao. ⁷ Amizao ty Yaveh Zagnaharenao, le fa nanao ty mpanomponao ho mpanjaka teo amity toera Davida raeko Riha, na le mboe kolo avao raho. Ka tsy haiko hoe ino ro fomba hiakara na hilira. ⁸ Ty mpanomponao le eo agnivo reo nadty ze finilinao, vahoake bey, maro tsy hay isafe na tsy voaisake. ⁹ Ka ameo ty mpanomponao ty hazavam-po hitsara ty ndatinao , mba hahafahako magnavake ty soa vaho ty raty. Fa ia moa ro mahay mitsara ze vahoake marobey zao?" ¹⁰ Nahafale ty Tompo ze fangataha Solomona zay. ¹¹ Le hoe Zagnahare tamine hoe:" Satria le fa nangatake za zaka zay riha naho tsy nangatake ho ahy ty vatanao mba ho lava andro hiveloma na harea na ty fiay reo fahavalonao, fa nangatake fazavan-tsay ho ahy ty vatanao mba hamantara ty rarene. ¹² Ingo, amizao hataoko iaby ze nangatahenao tamiko laha nomeanao ahy ty fangatahanao. Ameko fo hendre vaho mahay riha, mba tsy hisy hanahake anao teo alohanao, naho tsy hisy manahake anao hitsanga ao afaranao ¹³ Le fa nameako anao avao kea ze tsy nangatahenao, le ty harea vaho ty vonenahetre, mba tsy hisy hanahake anao eo amireo mpanjaka amity andronao iaby. ¹⁴ Laha hindeha arake ty lalako riha ka hiambe reo lalanako vaho reo liliko, manahake ty nindehana ty raenao, le hagnalava ty andronao raho." ¹⁵ Le nifoha ty Solomona, naho ingo, nofy zay. Niavy tao Jerosalema re naho nitsanga nagnoloa ty tomabile ty fagnenkea Tompo. Nanese fagnatetre oroa vaho fagnatem-pilongoa re, naho nanao kibory ho ahy reo mpanompone iaby. ¹⁶ Le nisy ampela roe ze mpivaro-bata niavy teo amity mpanjaka naho nitsanga teo agnoloane. ¹⁷ Hoe ty ampela raike ty hoe:"O, ry tompoko, izaho vaho ty ampela toy le miharo tragno, naho nietrake kolo tao amity tragno niarahako tamine raho. ¹⁸ Naho tamity andro fahatelo tafara ty niterahako le niterake kea ty ampela toy. Niraike zahay. Tsy nisy ndaty hafa niarake taminay tao antragno, fa zahay ro avao. ¹⁹ Bakeo mate ty anadahy ty ampela toy naho niahale, satria voatindrine re. ²⁰ Ka nitsanga re ty haleke naho nangalake ty anadahiko bakeo agnilako, laha mboe niroro ty mpanomponao, naho nametrake aze teo antratrane, vaho nametrake ty anadahine teo antratrako. ²¹ Laha fa nifoha hampinono ty anako raho ty maray, le fa mate re. Fa laha fa nanente aze soa raho ty maray, le tsy anako, ze naterako re." ²² Fa ty ampela raike nanao hoe:" Aha, ty raike velo ro anako, naho ty raike mate ro ananao." Ty ampela voalohane nanao hoe:" Aha, ty mate ro ananao, naho ty raike velo ro anako." Zay ty fomba nirehafa iereo teo agnoloa ty mpanjaka." ²³ Le hoe ty mpanjaka hoe:" Ty raike taminareo manao hoe:'Ty velo toy ro anako, naho ty mate ro ananao,' naho ty raike manao hoe:' Aha, ty mate ro ananao, naho ty raike velo ro anako."' ²⁴ Hoe ty mpanjaka hoe:" Andaiso meso raho." Ka niente iereo teo agnoloa ty mpanjaka ty meso. ²⁵ Naho hoe ty mpanjaka hoe:" Zarao roe ty kolo velo, naho ameo ty ampela toy ty antsasane naho ameo ty raike ty antsasane." ²⁶ Naho ty ampela ze velon-janake nirehake tamity mpanjaka, fa feno fiferenaigna ho ahy ty anane ty arofone, naho hoe re hoe:" O, ry tompoko, ameo aze ty kolo velo, naho tsy midika zay hoe mamono aze." Fa hoe ty ampela raike:" tsy ho ahy na ho anao kea re. Zarao re." ²⁷ Bakeo namale ty mpanjaka ka nanao hoe:" Ameo ty ampela voalohane ty kolo velo, naho tsy midika zay hoe namono aze. Fa re ro renene." ²⁸ Laha fa rey Israely iaby ty fitsara ze natao ty mpanjaka, le natahotre ty mpanjaka iereo, satria hisa iereo fa tao amine ty fahendrean'Agnahare ho entene mitsara.