¹ Navory Davida reo manan-kasy ty Israely iaby tao Jerosalema: reo manan-kasy reo foko, reo manam-pahefa reo antoko ze nanompo ty mpanjaka tamity asa iereo voalahatre, reo mpifehe agnarivo vaho mpifehe anjato, reo mpita ty harea vaho fanagna ty mpanjaka vaho ty ahy reo anadahine iaby, naho reo manan-kasine vaho reo lahilahy mpialy, agnate zay ty mahay vatane amiereo. ² Le nitsanga Davida mpanjaka naho nanao hoe:" Dranjigno raho, ry rahalahiko vaho vahoakeko. Dineko ty hamboatre tempoly ho ahy ty tomabile ty fagnenkea Yaveh; fisin-tomboke ho an'Agnahare, naho le fa nanao fagnomana hagnoregna zay raho. ³ Nefa hoe ty Zagnahare tamiko hoe:' Tsy hamboatre tempoly ho ahy ty agnarako riha,satria lahilahin'aly riha naho le fa nampipo-dio.' ⁴ Naho Yaveh, ty Zagnahare Israely, le fa nifily ahy tamity fokon-draeko iaby ho mpanjaka eo amy Israely zisikagne. Le fa nifily ty foko Joda ho mpitarike Re. Nifily ahy ho mpanjaka eo amy Israely iaby tao amity foko Joda, naho tao amity fokon-draeko, bakamity anadahin-draeko iaby Re. ⁵ Bakamireo anadahy maro namea Yaveh ahy, ro nifiliane i Solomona, anadahiko, mba hitoboke eo amity sezan-droandria ty fanjaka Yaveh, eo amy Israely. ⁶ Hoe Re tamiko hoe:' Hamboatre ty tragnoko vaho reo kianjako ty Solomona anadahiko, satria le fa nifily aze ho anako raho, naho ho raene raho. ⁷ Hanao ty fanjakane zisikagne Raho, laha mitoboke manao reo liliko vaho lalako, manahake anao amizao re.' ⁸ Naho amizao, eo amaso Israely iaby, ty fiangona ho ahy Yaveh toy, vaho eo amity fiatrehan'Agnaharentika, le ambenonareo iaby naho tano reo lily Yaveh Zagnaharenareo iaby. Anovo zay mba hanagnanareo ze tane soa zay ka hanao zay ho lova reo anagnareo afara nareo zisikagne. ⁹ Naho ty aminao, ry Solomona anako, enkeno ty Zagnahare ty raenao, naho manompoa aze amity fonao iaby vaho fagnahy mazoto. Anovo zay satria Yaveh mipay ty arofo iaby naho mahatakatre ty zoto ty dinene ty ndaty iaby. Laha mipay Aze riha, le ho hisanao Re, nefa laha miala aze riha, le hagnary anao zisikagne re. ¹⁰ Haiko fa Yaveh le fa nifily anao mba hamboatre ze tempoly zay ho fitoboha ty masy. Mimafea ka anovo zay." ¹¹ Le namea Davida i Solomona anane ty sare ty filira ty tempoly, ty fangana ty tempoly, reo tragno famoria, reo efetre farane ambone, reo efetre agnatene, naho ty efetre misy ty tako fagnavota. ¹² Nameane iereo zaka nataone sare ho ahy reo kianja ty tragno Yaveh, reo efetre magnodidy iaby, reo tragno famoria iaby, reo tragno famoria ao antragnon'Agnahare, naho reo famorian-draketre ho ahy reo zaka ze ahy Yaveh. ¹³ Nagnomea aze reo fotsipeke ho ahy reo fizara reo mpisoro vaho reo Levita, ho ahy reo asa voatendre ho ahy ty fanompoa ao amity tragno Yaveh, naho ho ahy reo zaka iaby ho ahy ty fanompoa ao antragno Yaveh re. ¹⁴ Nameane aze ty lanja ty fanake volamena iaby ho ahy ty fanompoa isan-karazane iaby naho ty fanake volafoty iaby, ho ahy ty zaka iaby ho ahy ty karazam-panompoa iaby. ¹⁵ Reo ilane reo le namea tamity lanja, agnate zay ty ilane reo fanoan-jiro volamena vaho reo jiro volamena, ty ilane ty lanja ho ahy ty fanoan-jiro iaby, ho ahy reo Jiro, ho ahy reo fanoan-jiro volafoty, naho ty ilane ho ahy ty fiasa arere ty fanoan-jiro iaby. ¹⁶ Nameane ho ahy reo latabatre ty mofo ty fiatreha, ho ahy ty latabatre iaby ty lanja ty volamena, naho ty lanja ty volafoty ho ahy reo latabatre volafoty. ¹⁷ Nameane ho ahy reo sotro fihinanan-kena, reo koveta, naho reo kapoake ty lanja ty volamena tsy miharo. Nameane ty lanja ty finga volamena kirai-kiraike, naho ty lanja ty finga volafoty kirai-kiraike. ¹⁸ Nameane ho ahy ty alitara fagnoroa liten-ketae magnitre ty lanja ty volamena voalio, naho ty ahy ty volamena ho ahy ty sare ty Kerobima ze mamelatre reo elane ka manaro ty tomabile ty fagnenkea Yaveh. ¹⁹ Hoe Davida ty hoe:" Le fa nataoko antsoratre ze iaby zay arake ty nanoroa Yaveh ahy vaho nampahazoane ahy miomba ty sare." ²⁰ Hoe Davida tamy Solomona anane hoe:" Mimafea naho managna herem-po. Anovo ty asa. Ko matahotre na misalasala, fa Yaveh Zagnahare, Zagnahareko, le miomba anao. Tsy hagnenga anao Re na hiala anao mandram-pahavita ty asa iaby ho ahy ty fanompoa ao amity tempoly Yaveh. ²¹ Ingo, tao reo fizara reo mpisoro vaho reo Levita ho ahy ty fanompoa iaby ao antempolin'Agnahare. Hiarake aminao iereo, miarake amity lahilahy manam-pagniria vaho vatane mahay iaby, mba hagnampe anao amity asa vaho hanao ty fanompoa. Reo manan-kasy vaho ty vahoake iaby le vogno ty hagnorike reo baikonao."