¹ Toa ty lisite ty foko reo mpitarike Israelita, reo mpifehe ty arivo vaho ty zato, amireo manankasy ty tafike ze nanompo ty mpanjaka tamity fomba sambehafa. Ty antoko miaramila kirai-kiraike le nanompo isam-bola zisike ty tao. Ty antoko kirai-kiraike le nisy lahilahy efatre arivo vaho reo ale iaby. ² Ty loha ty antoko tamity vola voalohane le i Jasobeama anadahy Zabdiela. Nisy lahilahy efatre arivo vaho roe ale tao amity antokone. ³ Agnate reo foko i Fareza re naho nita reo manan-kasy ty tafike iaby zisike ty vola voalohane. ⁴ Dodo ro loha ty antoko tamity vola faharoe, ze bakamity foko Ahoa. Miklota ro teo amity lahara faharoe. Nisy lahilahy efatre arivo vaho reo ale tao amity antokone. ⁵ Ty mpifehe ty tafike tamity vola fahatelo le i Benaia anadahy Joiada, mpisoro vaho mpitarike. Nisy lahilahy efatre arivo vaho reo ale tao amity antokone. ⁶ Io ty Benaia ze mpitarike reo telo-polo, vaho loha reo telo-polo. Tao amity antokone ty Amizabada anadahine. ⁷ Asahela rahalahy Joaba ro mpifehe tamity vola fahaefatre. Zebadia anadahine ro lasa mpifehe nisolo aze. Nisy lahilahy efatre arivo vaho roe ale tao amity antokone. ⁸ Samihota ro mpifehe tamity vola fahalime, ty foko Jizarita. Nisy lahilahy efatre arivo vaho reo ale tao amity antokone. ⁹ Ira anadahy Ikesy, bakagne Tekoa ro mpifehe tamity vola fahaene. Nisy lahilahy efatre arivo vaho roe ale tao amity antokone. ¹⁰ Hezela Pelonita, bakamireo vahoake Efraima ro mpifehe tamity vola fahafito. Nisy lahilahy efatre arivo vaho roe ale tao amity antokone. ¹¹ Sibekay ty Hosatita, bakamity foko Zera ro mpifehe tamity vola fahavalo. Nisy lahilahy efatre arivo vaho roe ale tao amity antokone. ¹² Abizera ty Anatotita, bakamity foko i Benjamina ro mpifehe tamity vola fahasive. Nisy lahilahy efatre arivo vaho roe ale tao amity antokone. ¹³ Maharay bakagne amity tana i Netofata, bakamity foko Zera ro mpifehe tamity vola fahafolo. Nisy lahilahy efatre arivo vaho roe ale tao amity antokone. ¹⁴ Benaia bakagne amity tana i Piratona, bakamity foko i Efraima ro mpifehe tamity vola faha-raike amby folo. Nisy lahilahy efatre arivo vaho reo ale tao amity antokone. ¹⁵ Helday bakao amity tana Netofata, bakamity foko Otniela ro mpifehe tamity vola faharoe amby folo. Nisy lahilahy efatre arivo vaho roe ale tao amity antokone. ¹⁶ Toa iaby reo mpitarike ty foko Israely: Ho ahy ty foko Robena, le Eliezera anadahy Zikry ro mpitarike. Ho ahy ty foko Simeona, le Sefaita anadahy Maka ro mpitarike. ¹⁷ Ho ahy ty foko Levy, le Hasabia anadahy Kemoela ro mpitarike, naho Zadoka ro nitarike reo foko Arona. ¹⁸ Ho ahy ty foko Joda, le Eliho, raike amireo rahalahy Davida ro mpitarike. Ho ahy ty foko Isakara, le Omry anadahy Mikaela ro mpitarike. ¹⁹ Ho ahy ty foko Zebolona, le Jismala anadahy Obadia ro mpitarike. Ho ahy ty foko Naftaly, le Jerimota anadahy Azriela ro mpitarike. ²⁰ Ho ahy ty foko Efraima, le Hosea anadahy Azazia ro mpitarike. Ho ahy ty vaky ty foko Manase, le Joela anadahy Pedaia ro mpitarike. ²¹ Ho ahy ty vaky ty foko Manase tao Gileada, le Ido anadahy Zakaria ro mpitarike. Ho ahy ty foko Benjamina, le Jasiela anadahy Abniera ro mpitarike. ²² Ho ahy ty foko Dana, le Azarela anadahy Jehorama ro mpitarike. Reo ro mpitarike ty foko Israely. ²³ Tsy nagnisake reo roa-polo tao na ambane zay ty Davida, satria nampagnantegna ty hagnamaro Israely manahake reo kinta ty lagnitre Yaveh. ²⁴ Nanomboke nagnisake reo ndaty ty Joaba, feie tsy nahavita. Laha zao le nitonta teo amy Israely ty havignira. Tsy voasoratre ao amity Tantara i Davida Mpanjaka o isakeo. ²⁵ Azmaveta anadahy Adiela ro nita ty rake ty mpanjaka. Jonatana anadahy Ozia ro nita ty famoria tagne ambaibo, tagne amireo tanam-bey, vaho tagne amireo ana-bohine, naho tagne amireo tilikambo voaaro. ²⁶ Ezry anadahy Keloba ro nita reo tambanevolo, reo ze niasa ty tane. ²⁷ Simey bakagne Rama ro nita reo tanem-boaloboke, naho Zebdy bakagne Sifama ro nita reo voaloboke vaho ty lakale famorian-divay. ²⁸ Bala-hanana bakagne Gadera ro nita reo hetae oliva vaho reo hetaen'amonta tagne amireo tane gebo, naho Joasy ro nita reo tragno famoria-menake. ²⁹ Sitray bakagne Sarana ro nita reo biby hare ze nihinam-bilo tagne Sarana, naho Safata anadahy Adlay ro nita reo biby hare ze tagne amireo baibo. ³⁰ Obila ty Ismaelita ro nita reo rameva, naho Jedda bakagne Meronota ro nita reo borike vave. Jaziza Hagarita ro nita reo agnondry aman'ose. ³¹ Roe iaby reo le mpita ty fanagna Davida Mpanjaka iaby. ³² Mpagnomea hevetre i Jonatana, rahalahin-drae Davida, satria mare ro vaho mpanora-dala re. Jehiela anadahy Hakmony ro nidineke reo ana ty mpanjaka. ³³ Ahitofela ro mpagnomea hevetre ty mpanjaka, naho Hosay bakamireo vahoake Arkita ro mpagnomea hevetre ty mpanjaka. ³⁴ Rinae Joiada anadahy Benaia, vaho Abiatara ty toera Ahitofela. Joaba ro mpifehe ty tafike ty mpanjaka.