¹ Ho ahy ty mpipaiky hira. Salamo nanovy anakilahy i Kora rey. Maskila. Renay tamy ty sofinay, Njanahary ô, nivolany razanay taminay ty asa nanovinao tamy ty andron-drozy rey, tamy ty andro taloha. ² Niroahanao tamy ty tananao firenea rey, fa nampipetsahanao ty olo lakony; Nampijaly olo rey Iha, fa naparitakinao tan-tany any ty olo lakonay. ³ Fa tsy azon-drozy mba ho fananany tamy ty alala ty meso bevatan-drozy avao ty tany, na ty sandrin-drozy manoka sady tsy nahasarombaky androzy; nefa ty tanan-kavananao, ty sandrinao, sady ty fahazava ty tarehinao, safe soa tamin-drozy Iha. ⁴ Njanahary, Iha ro mpanjakako; bekó ty fandresea ho ahy Jakoba. ⁵ Amy ty alalanao ro hitindrianay mpifania aminay rey; amy ty alala ty anaranao zahay ro hikosokosoky androzy, ze mitsanga hanohitsy anay rey. ⁶ Fa tsy hatoky amy ty kititsiko zahi, na ty meso bevatako hanavotsy ahy. ⁷ Fa nanavotsy anay tamy mpifania aminay ray Iha, sady nampamenatsy ty tsy tea anay rey. ⁸ Amin-Janahary ao ro nananovanay ty firengerengeanay amy ty andro lava iaby, sady hanome fisaora ho ahy ty Anaranao zisiky farany zahay. Sela ⁹ Fa amy zao fa nanary anay Iha ka le nanday anay tamy ty fanalam-baraka, sady tsy niboaky tamy ty tarikinay Iha. ¹⁰ Nampihemotsy anay tamy mpifania rey Iha; sady ze tsy tea anay rey nandramby ty hanana ho androzy. ¹¹ Nanovinao manahaky ty aondry voalahatsy ho hany zahay sady naparitanao tamy firenea rey. ¹² Mamarotsy ty olo lakonao amy ty tsy dikany Iha; tsy nampitombo ty hanananao Iha tamy ty fananova zay. ¹³ Manao anay ho fivolana maré ho an'i namanay rey Iha, nikizaky noho nisomonga anay tamy manodidy anay rey. ¹⁴ Manao anay ho fandratia amy firenea eo Iha, ho loham-pangitikitoiky amy olo eo rey. ¹⁵ Miha mariny ahy andro lava iaby ty fanalam-baraka, sady henatsy ty tarehiko ro misafotsy ahy ¹⁶ noho ty feony ze mivola maré noho mandratiraty ahy, noho ty fahavalo noho ty mpamaly faty. ¹⁷ Avy aminay iaby iaby zay; nefa Iha tsy halinonay na tsy nanenky ty fanenkeam-pilongoanao. ¹⁸ Tsy nitsobo lala ty fonay; tsy niala tamy ty lalanao ty lianay. ¹⁹ Nefa nanapaky maré anay tamy ty toera ty gamboa ly eo Iha sady nisafotsy anay tamy ty aloky ty fahafatesa. ²⁰ Laha nanalino ty Anaran'Janahary zahay na namelatsy ty tananay tamin-Janahary hafa, ²¹ Ka le tsy hila zay va Njanahary? Fa mahalala ty tsiambaratelo ty fo Ie. ²² Eka vatany, noho ty Aminao ro hamonoa anay amy ty andro lava iaby; diniho hanahaky ty aondry ho amy ty famonoa zahay ²³ Mifohaza, nanino ro mandrimandry iha, Tompo ô? Mitsangàna, mba ka manary ela anay. ²⁴ Nanino ro le mamony ty tarehinao Iha sady manalino ty fijaleanay noho ty fampijalea anay? ²⁵ Fa nilentiky anay lemboky zahay; ndreto ty vatanay mipitiky amy ty tany. ²⁶ Mitsangana ho famonjea sady fanavota anay noho ty amy ty fanenkeanao mahatoky.