¹ Misaora an'Yaveh, fa soa Ie, sady mandrakizay ty fahatsorany. ² Enganie azy navota Yaveh rey hivola zay, le azy navotany tan-tana ty fahavalo. ³ Navoriny baka amy ty tany lako hafa ndrozy, le zay avy baka antinana noho baka andrefa, baka varatsy any noho baka antimo. ⁴ Nikarikarioky tanefitsy teny amy ty lala hay ndrozy sady tsy nahita tany hipetrara. ⁵ Safe mosare sady narandrano ndrozy, le heniky ty havozaha ndrozy. ⁶ le nikaiky mare an'Yaveh tamy ty andro fahoriany, le namonjy androzy tamy ty fijaliany Ie. ⁷ Nanday androzy tamy lala mahity Iemba hahaizandrozy mandeha amy ty tana ze ipetrahany. ⁸ Hanompo an'Yaveh lahy olo rey noho ty fahatsorany noho ty kila raha soa iaby nanoviny tamy ty olombelo! ⁹ Fa nanara-po tamy ty faniria azy marandrano rey ie, sady ty faniria ty mosare le nivintsina raha soa. ¹⁰ Ty ilany nipetraky tanay ty maiiky noho ty aloky ty fahafatesa, nogadram-pijalia noho ty ravaky vy. ¹¹ Nisy zay safe nialy nanohitsy ty safan-Dranahary ndrozy sady nanary tytorohevitsy ty Anabo Mare. ¹² Nanambany ty fondrozy tamy ty rah sarotsy Ie. Nalahelo ndrozy sady tsy nisy olo nanampy androzy hionjo. ¹³ Le nikaiky an'Yaveh tamy ty fijaliany ndrozy, le nandesy Yaveh hiala baka amy ty fijaliany. ¹⁴ Nanday androzy hiboaky ty haiiky noho ty fara faha maiiky Ie sady novahany ty fatotsindrozy. ¹⁵ Hanompo an'Yaveh lahy olo reynoho ty fahatsorany noho ty raha mahatseriky nanoviny hoahy ty olombelo! ¹⁶ Fa nandrava ty vavahady saba Ie sady nanapaky ty hiliny vy. ¹⁷ Gegy ndrozy tamy ty aly nanoviny sady nijaly noho ty fahadisoany. ¹⁸ Trobo iaby ty faniriany hihina ty hany,sady niha nariniky ty vavahady ty fahafatesa ndrozy. ¹⁹ Le nikaiky mare an'Yaveh ndrozy tamy ty fijaliany le nanday androzy hiboaky amy ty fijaliany Ie. ²⁰ Nandefa ty safany Ie le nahajanga androzy, le novonjea tamy ty fandravany ndrozy. ²¹ Hanompo an'Yaveh lahy ty olo noho ty fandeferany noho ty rah mahatseriky nanoviny tamy ty olombelo! ²² Engaho ndrozy hanesy ty fanday fisaora le hanambara ty asany bevata amy ty fihira. ²³ Zay miondra andriaky noho manao raharaham-barotsy ampita ty riaky any. ²⁴ Rey le mahita ty asa Yaveh noho ty hatsereha tan-driaky teny. ²⁵ Fa Ie ro mibaiko ty tsioky ze mampiakatsy ty riaky. ²⁶ Nanakatsy ty lanitsy rey; sady nijojo tan-daliky tany. Kivy ty fijalia ty fiainandrozy. ²⁷ Fany sady nivembena manahaky ty mamo rey ndrozy le nanjary kivy ²⁸ Le nikaiky an'Yaveh tamy ty fijalia ndrozy, le nandesiny niboaky tamy ty fijalea ndrozy. ²⁹ Nampiegny ty tsioky mare Ie, sady nampiegny ty onja ty riaky. ³⁰ Le falifaly ndrozy safe nilamy ty riaky, sady nanday androzy ho anila nitean-drozy Ie. ³¹ Ty olo lahy hanompo an'Yaveh noho ty fandeferany noho amy ty raha mahatseriky nanoviny tamy ty olom-belo! ³² Engaho ndrozy hanondrotsy Azy amy ty fiangona ty olo sady hanompo Azyamy ty filan-kevitsy ty mpitariky. ³³ Avaliky ho efitsy ony rey, loharano hanjary tany maiky, ³⁴ sady tany mamokatsy hanjary tany maiky noho ty faharatia ty olony. ³⁵ Mamaliky ty efitsy hanjary rano be Ie sady ty tany maiky hanjary loharano lako. ³⁶ Engany any ze mosare, sady hanamboatsy tana hiperandrozy. ³⁷ hanamboatsy tana hisy baibo ndrozy, hanovy tany voaloboky, sady hamokatsy lako. ³⁸ Hitahy rey Ie le ho lako tsy hay hisahy zay. Tys enga ho kely ty biby fihariny. ³⁹ Fa nihakely noho ambany ndrozy noho ty fijalea le vatany maharary. ⁴⁰ Mandraraky fanamavoa amy ty mpitariky rey Ie sady mampikarikarioky androzy anefitsy any, ze tsy misy lala. ⁴¹ Fa miaro ty mijaly noho ty fijalia avao koa Ie sady miaro ty longony manahaky ty vondro ty aondriny. ⁴² Mahita zay ty olo mahity le ho faly, sady ty raty fanahy iaby manakobam-bava. ⁴³ Ze hendry le tokony handramby an-tsoratsy raha zay sady hieritseritsy ty asa fandefera Yaveh rey.