¹ Misaora an'Yaveh, fa soa Ie, fa maharitsy mandrakizay ty fandeferany. ² Ia ro afaky hanisa ty sa bevata ze nanovy Yaveh rey ndra hitanisa iaby asa maeva hiderany? ³ Hotahia lahy ze manao ty to, noho ze manao asa to saky sanandro. ⁴ Tiarovo zaho, lahy Yaveh, lafa mampiseho sitraky amy ty olo Iha; ampio zaho lafa mamonjy androzy Iha. ⁵ Sady le nahita ty fiarova ty notingininao rey zaho, ho falialy amy ty fifalia ty firenenao noho hanome voninahitsy amy ty lovanao. ⁶ Nanota manahaky ty razanay zahay, nanao tsy nety zahay, sady nahavita raty. ⁷ Tsy nenkea ty razanay rey asa soa nao ta Egypta rey; tsy nahoany ty halakoa ty fandeferanao ndrozy; le nialy tan-driaky eny tamy riaky mena teny. ⁸ Ndra zay aza, novonjeny ndrozy noho ty anarany mba hahaizany manoro ty heriny. ⁹ Nivolaniny mare ty riaky Mena, le ritsy zay. Le nitao androzy nanapaky ty laliky Ie, manahaky ty nanapahany ty efitsy. ¹⁰ Namonjy androzy tamy ty tana ze nalay androzy rey Ie, sady nanavotsy androzy tamy ty tana ty fahavalo. ¹¹ Fa nalentiky ty rano ty vahavalondrozy; tsy nisy ndra raiky tamindrozy rey ro avaky. ¹² Le nino ty safany ndrozy, le nihira fanompoa Azy. ¹³ Fe tsy elaa nihalinondrozy ty raha nanoviny; tsy niamby ty hevitsiny. ¹⁴ Nazoto nila tanefitsy tany le nanjary handilatsy an-Dranahary tanefitsy tany. ¹⁵ Le nameeany ty fangatahany, fe nandefa arety handany ty vatandrozy Ie. ¹⁶ Tan-toby tany le nialo an'i Mosesy noho i Arona, mpisoro masy tiahy Yaveh, ndrozy. ¹⁷ Nivoha ty tany le nitely an'i Datana sady nandomboky mpanoriky an'i Abirama rey. Nirehisy tamindrozy ty afo; ¹⁸ le nandrava ty raty fanahy. ¹⁹ Le namboatsy anak'aomby lahy ta Horeba tao ndrozy le nanompo ty sari-ndraha vy. ²⁰ Nasolondrozy sary aomby lahy namboary ze mihina akata maintso ty voninahitsy Ndranahary. ²¹ Nihalinondrozy ty Ndranahary Mpamonjy androzy, azy nanao asa bevata ta Egypta tany. ²² Nanao raha soa mahatandre tan-tana i Hama noho raha mahery tamy riaky Mena Ie. ²³ sady nandidy ty fandrava androzy rey Ie, laha tsy Mosesy, azy nitingininy, ty vata-tena tamy ty fanapaha mba hampiova ty helokiny amy ty fandrava androzy. ²⁴ Le tsy mampisiandrozy dikanay ty tany mahavokatsy; tsy natoky ty fampitamaniny ndrozy; ²⁵ fa nimenomeno tan-daindrozy, sady ty nanoriky an'Yaveh. ²⁶ Lafa zay le nampitsanga ty tanany ie sady nifanta tamindrozy fa henenga androzy ho maty anefitsy any, ²⁷ hampiritaky ty tarihandrozy rey heniky ty firenena rey sady hampiparitaky androzy amy ty tany hafa. ²⁸ Nanompo an'i Bla Poera ndrozy sady nihina ty soro nasesy hoahy ty maty. ²⁹ Nila Azy ho meloky tamy ty fihetisky ndrozy, le nahazo androzy ty arety mamono. ³⁰ Le vta-tenany Fineasa ro nitsanga, le nieny rty arety mamono. ³¹ Anay ty asa to ho tiazy mandrakizay zay zisiky amy ty tariha fifanolo. ³² Nahameloky an'Yaveh avao koa ndrozy tamy rano ahy Meriba teny, le nijaly i Mosesy noho ndrozy. ³³ Nampijaly an'i Mosesy ndrozy, le nivola mare ie. ³⁴ Tsy nandrava ty firenena araky ty nandidian'Yevah ndrozy, ³⁵ fe ndrozy niharo tamy ty firenena rey sady nianatsy ty fombany ³⁶ le nanompo ty sampiny, ze nanjary fandriky ho tiazy. ³⁷ Nanao soro anakilahiny rey noho ty anakampelany rey hoahy ty piroke rey ndrozy. ³⁸ Nandatsaky ty lio tsy manatsiny ndrozy, ty lio ty anakilahiny noho ty anakampelany ze nanovandrozy soro hoahy ty sampy ty Kanana; le tsy nampisy dikany ty tany tamy ty lio. ³⁹ Nolotoa tamy ty asany; manahaky ty mpandranto ndrozy amy ty raha nanoviny. ⁴⁰ Le nimeloky tamy ty olony Yaveh, sady tsy nampisiany dikany ty olony. ⁴¹ Nasesiny ho an-tana ty firenena ndrozy, sady azy nanaboka androzy rey ro nandidy taminy teo. ⁴² Nampijaly androzy ty fahavalony, sady nandesy hanenky ty fahefany ndrozy. ⁴³ Matetiky avy nanampy androzy Ie, fa ndrozy le tsy nieny nialy avao sady naepotsy ty fahotany avao koa. ⁴⁴ Ndra zay aza le nanenty ty fiajaliandrozy Ie lafa nahare androzy nitany hovonjea. ⁴⁵ Nampahatiaro ty fanenkeany tamindrozy Ie le naneny amy ty fitiavany tsy miova. Le ⁴⁶ ty mpandrava iaby le nanoviny hiferinay androzy. ⁴⁷ Vonjeo zahay lahy, Yaveh, Ndranaharinay. Sady avorio baka amy firenena rey, mba hisaoranay ty Anaranao Masy noho hanomezanay voninahitsy amy ty fanompoa Anao. ⁴⁸ Ho tompoa lahy Yaveh, Ndranahary ahy Israely, baka amizay le ho mandrakizay. Sady nivola manao hozao iaby ty olo: "Amena". manompoa an'Yaveh. Boky faha limy