¹ Ty safa i Agora anaky i Jake---fanatera: nitory tamy i Itiela lahilahy io, tamy i Itiela noho Okala: ² Manahaky ty biby vatany zaho mandilatsy ty olo sady tsy mana ty fahazavan-tsay ty olombelo zaho. ³ Tsy nianatsy fahendrea zaho, ndra mana ty fahaiza azy Raiky Masy iny. ⁴ Ia ro niakatsy noho nijotso tan-danitsy any? Ia ro namory ty tsioky tan-tanany eny? Ia ro nahavoavory ty rano tamy ty sikiny eo? Ia ro namboatsy ty fara ty tany iaby? Ia ro anarany, safy is ro anaran'anakiny? Haiko vatany zay! ⁵ Vita henty toetsy iaby ty safa Njanahary; fiaro ho ahy ze mialoky aminy Ie. ⁶ Ka manampy amy ty safany, tsy noho saziny iha, sady ho voaporofo fa mpavandy. ⁷ Raha roe ro angatahiko aminao, sady ka mitandraky aloha ty hahafatesako rey: ⁸ Halaviro ahy ty raha-tsy misy noho ty vandy. Ka amea ahy ndra ty fijalea ndra ty hanana, fa amea ahy avao ty hany ze ilako. ⁹ Fa laha mana bey maré zaho, le mety handà anao ka le hivola hozao: "Ia moa Yaveh?" Ndra laha nanjary mijaly zaho, le mety hangalatsy ka le handoto ty anara ty Njanahariko. ¹⁰ ka manendriky ty andevo anila ty tompony eo, soa hanozo anao ie sady ho voatandraky ho meloky iha. ¹¹ Misy tariha manozo ty babany sady tsy misaotsy ty reniny. ¹² Misy tariha malio amasony eo avao, hondy tsy voasasa tamy velohany aza. ¹³ Misy tariha manondrotsy ty masony, sady henteo ty fisondrota ty holi-masony! ¹⁴ Misy tariha ze meso ty hiny, sady ty valanorany manahaky ty meso, mba handrapahany ty mijaly hiala amy ty tany sady ty malahelo tsy ho amy ty anak'olombelo eo. ¹⁵ Ty linta mana-anak'ampela roe: "Ameo, Ameo" hoy ty fihoakoakiny. Misy raha telo ze tsy mety afa-po, efatsy ze tsy mba mivola mihintsy hozao: "Ampy zay": ¹⁶ le ty Fiainan-tsy hita; ty sarotso tsy miteraky; ty tany tsy dobon-drano; sady ty afo ro tsy mba mivola mihintsy hozao: "Ampy zay!" ¹⁷ Ty maso ze mandratiraty ty raiky sady mpandrebireby ty fankatoava ty reniny, ho tsikofy ty goaky am-baibo any ty maso zay, sady ho lany ty volotoro ie. ¹⁸ Misy raha telo ze mahatseriky maré ho ahy, eka efatsy ze tsy takatsiko: ¹⁹ ty lala ty voromahery an-danitsy eny; ty lala ty bibilava amy ty lafiam-bato eny; ty lala ty sambo anivo ty riaky eny; sady ty lala ty lahilahy miaraky amy ty somondrara ²⁰ Zao ro fomba ty ampela maheriloha: mihina ie ka le mamafa ty vavany sady mivola hozao: "Tsy nanao raty zaho. ²¹ Mihozo ambany ty raha telo eo ty tany, sady ambany ty raha efatsy ro tsy anany: ²² le ty andevo laha nanjary mpanjaka, ty adala laha vintsy hany; ²³ ty ampela hala laha ampiakary; sady ty mpiasa ampela laha mangalaky ty pilasy ty tompo amelany. ²⁴ Raha efatsy an-tany eto ro kelikely nefa hendry vatany: ²⁵ ty vitiky ro voahary tsy matanjaky, nefa manoma ty haniny amy ty faharava ndrozy; ²⁶ ty hyraky ty vato ro tsy voahary mahery, nefa manao ty fipetsahany anay lafiam-bato ao. ²⁷ Ty galala ro tsy mana mpanjaka, nefa mitovy milahatsy soa ty liany. ²⁸ Sady ty amy ty meso, le azonao tamdraha amy ty tananao roe zay, nefa le hita amy lapa ty mpanjaka any. ²⁹ Misy raha telo ze soa famaloza sady efatsy ze soa fomba fandehany: ³⁰ ty liona, ze mahery bibiky amy biby-li rey---tsy mivory amy ty ino ndra ino zay; ³¹ ty akoholahy mpialy; ty aosilahy; sady ty mpanjaka ze anilany ty maramilany eo. ³² Laha adala iha, mampiaka-bata, ndra laha namisavisa raty---le anovy am-bavanao eo ty tananao. ³³ Ty fanontsankotsana ty ronono ro mahavy ronono mandry sady manahaky ty fiboahan-dio amy ty oro ty olo laha aodikodiky zay, le manahaky zay koa ty asa anovy amin-keloky le miteraky aly.