¹ Ty olo raiky ze nandramby anatsy lako nefa mampahery ty hihitsiny le ho rava anay ty fotoa tsy ampy tsy misy fanafaha ao. ² Lafa mitombo ty olo-marina, le mifaly ty olo, fa lafa ty olo raty fanahy ro manapaky, le miay ty olo. ³ Ndra ia ndra ia tea ty fahendrea ro mahafaly ty babany, fa ze miaraky amy ty mpaheriloha le manimba ty hananany. ⁴ Mampipetsaky ty tany amy ty rariny ty mpanjaka, fa ze mangataky tsolotsy koa ro manimba zay. ⁵ Ty olo ze mandiky ty namany le mamelatsy harato ho ahy ty tombony. ⁶ Amy ty fahota ty raty fanahy ao ty fandriky, fa ty olo-marina koa ro mihira sady mifaly. ⁷ Ty olo-marina ro mihevitsy ty aly ty olo mijaly; ty olo raty fanahy le tsy mahatakatsy fahaiza manahaky zay. ⁸ Mampirehitsy ty tanà ty mpandratiraty, fa ze hendry rey koa ro mampivio heloky. ⁹ Lafa mialy hevitsy amy ty adala ty olo-hendry raiky, le romotsy ie sady mihehy, sady tsy hisy fijanona. ¹⁰ Ty lian-dio ro malay ze tsy manan-tsiny sady mifofo ty ay ty marina. ¹¹ Ty adala ro mampitoro ty helokiny iaby, fa ty olo-hendry koa ro mitandraky zay sady mampieny ty vatany. ¹² Lafa mijanjy vandy ty mpanapaky, le ho raty fanahy iaby manam-pahefany iaby rey. ¹³ Ty olo mijaly noho ty mampijaly le mitovitovy, fa Yaveh ro manome hazava ho ahy ty mason-drozy roe rey. ¹⁴ Laha mitsara ty mijaly amy ty fahamarina ty mpanjaka raiky, le hipetsaky zisiky farany ty seza fipetrahany. ¹⁵ Ty ratsan-kazo noho ty anatsy le manome fahendrea, fa ty anaky afaky tamy ty fitsipiky le mahamenatsy ty reniny. ¹⁶ Lafa amy ty fahefa ty olo raty fanahy eo, le mitombo ty fandikan-dalà, fa ty olo-marina koa le hahita ty fiongaha ty olo raty fanahy. ¹⁷ Fehezo ty anakinao le hanome fijanona anao ie; handay hamamia amy ty fiainanao ie. ¹⁸ Amy ze tsy misy fahita ty olo to-resaky ro mihabiby ty olo, fa tahie ze miemby ty lalà. ¹⁹ Tsy ho voahity amy ty safa ty andevo, fa ndra le mahatakatsy ie; le tsy hisy valiny. ²⁰ Henteo lahy ty olo ze mivola-malaky? Misy fanantena bevata maré ho ahy ty adala noho ty aminy. ²¹ Ze mampiseho ty andevony zisiky amy ty fahatanorany, le hana olo amy ty fara zay any. ²² Ty olo meloky manetsiky fifamale sady ty tompo ty halaginy hanao fahota lako. ²³ Ty avonavo ty olo raiky mampijotso azy, fa ie mana fanahy malemy koa le hameam-boninahitsy. ²⁴ Ze mizara amy ty mpangalatsy le malay ty ainy avao; maharé ty ozo ie fa tsy mivola ndra ino ndra ino. ²⁵ Ty tahotsy ty olo ro mahavy fandriky, fa ze matoky an'Yaveh ro ho voaaro. ²⁶ Maro ze mila ty tarehy ty mpanapaky rey, nefa baka amy Yaveh ty rariny ho ahy ty olo raiky. ²⁷ Ty olo tsy marina ro fahativativa ho ahy ty olo-marina, fa ze mahity lala koa ro mampangoritsy ty olo raty fanahy.