¹ Ndreto ro mbo ohabola i Solomona avao, ze nadika i lahilahy i Hezekia, mpanjaka i Joda. ² Voninahitsy Njanahary ty mamonin-draha, fa ty mila zay ro voninahitsy ty mpanjaka. ³ Manahaky ty maha-ahy ty abo ty lanitsy nohobty maha-ahy ty laliky ty tany, ro maha-tsy takatsy ty say ty fo mpanjaka rey. ⁴ Alao amy ty volafoty ty taim-bolafoty ka le afaky hampiasa ty volafoty amy ty asa tanany ty mpanao asa amy ty vy. ⁵ Le manahaky zay koa, alao amy ty famonjea ty mpanjaka eo ty olo raty fanahy ro ho apetsaky amy ty fananova ze marina ty seza fipetrahany. ⁶ Ka manome voninahitsy ty vatanao amy ty famonjea ty mpanjaka eo sady ka mitsanga amy ty toera voatondro ho ahy ty olo anabo. ⁷ Soa vatany laha mivola aminao ie hozao: "miakara eto," noho ty hangalany baraka anao anila ty olo-manan-kaja raiky eo. ⁸ Ka andesy malaky amy ty fitsara any, ze nivonje ty masonao. Safe ino ro anovinareo lafa manao ze ahamenatsy anao ty mpiaraky mipetsaky aminao amy ty farany? ⁹ Hilio hevitsy aminao eo noho ty mpiaraky mipetsaky aminao avao ty raharahanao sady ka mampiboaky ty tsiambaratelo ty hafa, ¹⁰ laha tsy zay le handay fahamenara aminao noho tatitsy raty mikasiky anao azy naharé anao iny ka le tsy ho laitsy milamy. ¹¹ Ty poma volamena amy ty fipetsaha volafoty eo ro safa nivolany tamy ty fotoa mety. ¹² Ty peratsy volamena ndra ravaky nanovy tamy ty volamena soa bibike ro anatsy hendry ho ahy ty sofy mijanjy. ¹³ Ty raiky mahatoky ro manahaky ty nintsy ty havandra amy ty fotoam-pambolea ho ahy ze maniraky azy; mampimpoly ty ay tompony rey ie. ¹⁴ Raho noho ty tsioky tsy misy ora ze mirengirengy amy ty fanomeza ze tsy nameany. ¹⁵ Amy fahareta ro afaha mandresy lahatsy ty mpanapaky shady ty lela malemy ro mety hanapaky taola. ¹⁶ Laha mahita tantely iha, le ze ampy hohany avao--- laha tsy zay, le hampandoa anao, ty fihinana lako maré zay. ¹⁷ Ka ampiliry an-tsano ty namanao ao san'andro san'andro ty tombokinao, mety ho laginy anao ie ka le halay anao, ¹⁸ Ty olo zecmitsanga vavolombelo tsy marina mikasiky ty namany le manahaky ty langilangy, ndra meso bey, ndra anaky-kititsy maranitsy ampiasa amy ty aly. ¹⁹ Ty olo tsy matoky ze itokisanao amy ty fotoa ty fijalea ro manahaky ty hý raty ndra tomboky mibolatitsy. ²⁰ Manahaky ty olo raiky ze mangalaky ty salotsiny amy ty andro manitsy, ndra manahaky ty vinegira naroraky tambany ty sirahazo ze mihira hira ho ahy ty fo mavesatsy eo. ²¹ Laha mosare ty fahavalo, le ameo hany hohany ie, sady laha mangetaheta ie le ameo rano hinomy, ²² fa hampiharo vain'afo amy ty lohany eo iha sady hamaly soa anao Yaveh. ²³ Manahaky ty handaisa ty tsioky avaratsy ora vatany, le hamaliky ty endriky ho meloky ty lela ze mivola tsiambaratelo. ²⁴ Soa vatany ty mipetsaky amy ty zoro ty tafo-tsano eo ty amy ty tsano ze hiaroa amy ty valy mpialy lava ao. ²⁵ Manahaky ty rano manitsy ho ahy ze mangetaheta, ty vaovao mahafaly baka amy ty firenea lavitsy any. ²⁶ Manahaky ty loharano voahozongozo noho fantsaka rava ty olo-marina miharo anila ty olo raty fanahy eo. ²⁷ Tsy soa ty mihina tantely lako maré; manahaky ty hoe mila voninahitsy miampy voninahitsy zay. ²⁸ Ty olo tsy mana haborin-dresaky ro tsy manahaky ty tanà rava noho tsy misy vala.