¹ Ka mialona ze raty rey, ndra maniry ty hiombona amin-drozy, ² safe mitetiky-raty hanao heriloha ty fon-drozy sady mivola fajalea ty sonin-drozy. ³ Amy ty fahendrea ro ampitsangana tsano sady amy ty fahazavan-tsay ro anamboara azy. ⁴ Amy ty fahaiza ro hanatseha hanana sarotsy noho soasoa iaby efitsano rey. ⁵ Mahery ty mpialy ty fahendrea, sady ty olo ty fahaiza ro mampitombo ty heriny; ⁶ fa amy ty torolala hendry ro afahanao mialy ty alinao sady amy mpanome-say lako rey ro misy fahendrea. ⁷ Abo maré ho ahy ty adala ty fahendrea; tsy mamoha-vava am-bavahady eo ie. ⁸ Misy olo mitetiky hanao raty--- kaihy ty olo hozao tompo ty tetiky ie. ⁹ Ty tetiky ty adala ro fahota sady ty olo le manao tsy misy dikany ty mpandratiraty. ¹⁰ Laha avy malemy ty tahotsy amy ty androm-pijalea iha, le kelikely ty herinao. ¹¹ Avoto ze nala hovonoe rey sady arovo ze mivembe amy ty famonoa eo rey. ¹² Laha mivola iha hozao: "Ingo, tsy nahay ndra ino ndra ino momba zay zahay", moa va azy raiky ze mandanja ty fo tsy hahatakatsy ze volaninao iny? Azy raiky ze miemby ty ainao, moa va ie tsy mahay zay? Moa va Njanahary tsy manome ty kirai-draiky iaby ze maeva azy? ¹³ Anako e, mihinana tantely safe soa zay, safe mamy ty tantely mitete amy ty papon-tantely laha andramana. ¹⁴ Manahaky zay ty fahendrea ho ahy ty fanahinao--- laha hitanao zay, le hisy hoavy sady ho rava ty fanantenanao. ¹⁵ Ka manotsiky manahaky ty olo raty fanahy ze manafiky ty tsano ty olo-marina. Ka mandrava ty tsanony? ¹⁶ Fa lavo impito ty olo-marina fa tafapetraky avao, fa lavo amy ty loza ty olo raty fanah. ¹⁷ Ka mifaly laha lavo ty fahavalonao sady engao tsy ho falifaly ty fonao laha meloky ie, ¹⁸ laha tsy zay le ho hita Yaveh sady tsy ho ankasitsahiny ka le halàny aminy ty helokiny. ¹⁹ Ka matahotsy noho mpanao raty rey, sady ka mialona ty raty fanahy, ²⁰ fa tsy mba mana hoavy ty olo raty sady ty jiro ty raty fanahy ro ho maty. ²¹ Matahora an'Yaveh, sady matahora ty mpanjaka, anako e, la miharo amy ze miharo amin-drozy rey, ²² fa ho avy tampoky ty loza ho androzy ka le ia ro mahay hoe zisiky aia ty faharava ze ho avy amindrozy roe? ²³ Reto avao koa fivolana ty hendry rey. Tsy soa fiangara amy ty fitsaran-draharaha amy ty lalà. ²⁴ Ndra ia ndra ia mivola amy ty raty fanahy hozao: "Olo-marina iha",le go azony olo lako rey sady hala firenea rey. ²⁵ Nefa ze manasazy ty raty fanahy rey ro hahazo sitsaky sady ho avy amin-drozy ty fanomeza-soa. ²⁶ Ty olo ze mamaly amin-kitsom-po ro manoraky amy ty sony eo. ²⁷ Omano ty asanao ambaliky any, sady anovo vonona ho ahy nao am-baibo any ty raha iaby; afara zay, le amboaro ty tsanonao. ²⁸ Ka mitsanga vavolombelo hanohitsy ty mpiara-belo aminao amy ty tsy antony sady ka mamitaky amy ty soninao. ²⁹ Ka mivola hozao: "Hanoviko aminy ze fa nanoviny tamiko; ho valeako aminy manahaky ze fa nanoviko." ³⁰ Nandalo tam-baibo ty olo kamo eny zaho, nisera tamy ty tanim-boloboky ty olo tsy misy say. ³¹ Nitiry teny iaby ty fatiky; atsiky ty hisasatsy ty tany, sady vato ty vala rey le rava. ³² Le hahita zaho ka le nisahy zay; nanenty zaho ka le nahazo anatsy. ³³ Hangalaky roro kelikely, havozaha kelikely, taho-tana kelikely mba hijanona--- ³⁴ le ho avy hanitsaky anao ty fijalea, sady filànao rey le hanahaky ty maramila milanja fialia.