¹ Sady tafara raha zay tao, le nisy nivola tamy i Josefa hozao: "Ingo, marary babanao." Ka le nandesiny niaraky taminy ty anany mirahalahy, Manase noho Efraima. ² Lafa nivolana Jakoba hozao: "Ingo, Josefa anakilahinao avy mba hanenty anao," ka le nanory hery Israely ka niary petsaky tam-pandrea eo. ³ Hozao ty asa i Jakoba tamy i Josefa: "Njanahary Tsitoha fa niseho tamiko ta tany Lozy any amy ty tany Kanana. Nitsipi-rano ahy Ie ⁴ ka le nanao tamiko hozao: 'Ingo, hampamokatsy, noho hahalako anao Zaho. Hahavy firenea lako baka aminao Zaho. Le hameako ty tarihanao tany toy ho fanana zisiky farany.' ⁵ Sady anakinao mirahalahy, ze teraky ho anao ta Egypta eto taloha ty namonjeako anao ho Egypta eto, le anahy. Efraima noho Manase le ho anahy, nanahaky ty maha anahy an'i Robena noho Simeona. ⁶ Ty aja teraky afaran-drozy ro ho ahinao; ho tanisan-drozy ty anara rahalahiny rey nanahaky ty lovan-drozy. ⁷ Sady zaho, le mbo zaho baka Padana-Arama any, le maty tanilako teo tan-dala eny tamy ty tany Kanana any i Rahely, lana kelikely sisa ro tsy niaviany ta Efrata ao. Naleviko tan-dala eny ho Efrata any ie" (ze anovy hozao, Betlehema). ⁸ Lafa hitan'i Isaraely anak'i Josefa rey, le hoy tiasany: "Ahinia moa retoa?" ⁹ Le hoasa i Josefa tamy babany: "Anako retoa, ze namean-Janahary ahy tatoy." Le hoy tiasa i Isaraly: "Andeso amiko atoy ndrozy, mba hitsipazako rano azy." ¹⁰ Sady fa nanjavo ty maso Israely noho ty fahanterany, le tsy afaky nahitaky ie. Lafa zay le nampanantony Josefa azy ndrozy, le nanoroky noho nandrakoky androzy ie. ¹¹ Hoasa Israely tamy Josefa: "Tsy nitama hahitaky ty vatanao ndraiky zaho, fe nengan-Janahary ho hitako ndra ty anakinao aza." ¹² Le nala i Josefa tanivo ty pokopokon'Isaraely ndrozy, sady nandohaliky tamy ty tany ie. ¹³ Le nalan'i Josefa ndrozy mirahalahy, Efraima tan-kavanany teo ho an-tanakavian'Israely, le i Manase tan-tanankaviany miatriky ty tanan-kavana an'Israely, le nanday androzy mba hariniky azy. ¹⁴ Le naampatsy Israely ty tanany ankavana le napetrany tanabo ty lohan'i Efraima, azy zainy iny, sady ty tanany ankavia tanabo ty lohan'i Manase teo. Nampifamalihany ty tanany, safe i Menase ty talanolo. ¹⁵ Le nitsipy rano an'i Josefa i Israely, le nanao hozao: " Enganie Azy njanahary ze nandeha talohan'i Abrahama noho Isaka teo, azy Njanahary ze nitahy ahy zisiky henanikio, ¹⁶ azy anjely ze niamby ahy tamy ty raty iaby, hitahy ty aja lahilahy retoa. Ho toniny amindrozy lahy tyanarako, sady ty anara i Abrahama noho Isaka razako. Ho lako an-tany eto lahy ndrozy.'' ¹⁷ Lafa nihitan'i Josefa fa napetraky babany tanabo ty lohan'i Efaraima teo ty tanany an-kavana, le tsy nankasitraky zay ie. Le nalany tsy andohan'i Efraima ty tana ty babany le nafalony tanabo lohan'i Manase. ¹⁸ Le hoasa i Josefa tamy ty babany: "Tsy ie zao, lahy babako; fa toy ty talanolo. Engaho anabo ty lohany ty tananao an-kavana." ¹⁹ Le tsy nanenky ty babany le nnao hozao: "Haiko, lahy anako, haiko. Hanjary firenena , noho ho avy bevata avao koa ie. Sady ty zainy avao koa le ho be mandilatsy azy, sady hanjary firenena lako ty tarihany." ²⁰ Safa zao ro nitsipazan'i Israely rano androzy tamy andro zay: "Amy ty anaranareo ro hanonona ty olon'i Israely fitahia hanao hozao: 'Enganie Njanahary ro hahavy anareo manahaky an' i Efraima noho Manase.''' Zay ty fomba, nametrahan'Israely an'i Efraima ho aloha i Manase. ²¹ Hoasa Israely tamy Josefa: "Ingo, fa ho maty zaho, fe Njanahary ro hitahy anao, sady handay anao himpoly amy ty tany ty razanao. ²² Hoahinao, ze anabo mandilatsy ty rahalahinao rey, le ameako anao ty fizra ty tany ze nalako tamy Amorita tamy ty mesobeko noho ty kititsiko.''