¹ Le tsy nitanjaky Josefa ty fihetseham-pony taloha ty mpanompony teo ze nitsanga nanilany teo. Nivola mare hozao ie: "Tsy maintsy manenga ahy nareo iaby." Le tsy nisy mpanompo nitsanga taminy teo lafa namahafantatsy ty vatany tamy ty rahalahiny Josefa. ² Nitany mare ie, le re ty Egyptiana rey zay, sady ren-drozy tan-trano i Farao. ³ Hozao tisa i Josefa tamy ty rahalahiny reo: "Zaho ro Josefa. Mbo velo va ty babako?" Tsy nahavaly azy rahalahiny rey, safe nalahelo talohany teo ndrozy. ⁴ Bakeo Josefa nivola tamy ty rahalahiny rey hozao: "Mandina marikitsy ahy,azafady." Le nagnato marikitsy ndrozy. Hozao tiasan-drozy: "Zaho ro Josefa rahalahinareo, ze navaotsinareo ta Egypta. ⁵ Ka malahelo ndra meloky amy ty vatanareo amy ty namilianareo ahy tatoy, safe Njanahary ro nadefa ahy alohanareo mba hiarova ty ainareo. ⁶ Safe tamy ty tany toy eto ty mosary hatramizay roe tao zay, sady mbo hisy limy tao ze tsy hisy fiasa tany ndra fanapaha. ⁷ Njanahary ro naniraky ahy ho alohanareo mba hitahiry anareo ho sisa an-tany eto sady hitanjaky anareo ho velo amy ty fanafaha bevata. ⁸ Sady lafa zay tsy nareo ro nandefa ahy tatoy fa Njanahary, sady ie ro nanao ahy ho baba i Farao, tompo ty tranony iaby, noho mpanampaky ty tany iaby heniky ty Egypta. ⁹ Malaky sady miakara amy ty babako any le volano hozao: 'zao ty nambara i Josefa anakinao: " Nanovin-Janahary mpanampaky an'i Egypta iaby iaby zaho. Mijotsoa amiko atoy, le mangataky andro. ¹⁰ Hipetraky amy ty tana i gosena iha sady ho anilako iha noho anakinao rey, noho aondry noho ty aosy sady aomby rey, noho ty hananao iaby. ¹¹ Hanome anareo zaho, safe mbo haharitsy limy tao ty kere, le mba tsy ho avy aminareo ty fijalia, aminao, noho ty tokatranonao,sady zay ananao iaby.''' ¹² Ingo, hita ty masonareo, noho ty maso i Benjamina rahalahiko, fa ty vavako ro mivola aminareo. ¹³ Ho volaninareo amy ty babako ty mikasiky ty voninahitsiko a Egypta atoy noho ty raha iaby ze hita ty masonareo. Mandina malaky nareo sady andeso mijotso amiko atoy ty babako.'' ¹⁴ Nandrakotsy ty vozo i Benjamina rahalahiny ie le nitany, le i Benjamina niany tamy vozony teo. ¹⁵ Nanoroky ty rahalahiny iaby ie sady nitany tamin-drozy. Tafara zay le niresaky taminy teo rahalahiny rey. ¹⁶ Le nivolaniny tan-trano i Farao ty vaovao hoe: "Niavy rahalahy i Josefa rey." Le vatany nahafaly an'i Farao noho ty mpanompony zay. ¹⁷ Hozao tiasa i Farao tamy Josefa: " Volano amy ty rahalahinao rey hoe: 'Anovo hozao: Atikiro ty entanao handesy ty bibinareo sady mandina any amy tany Kanana any. ¹⁸ Andeso ty babanareo noho ty tokatranonareo sady mandina amiko atoy. Hameako anareo ty soa amy ty tany Egypta eto, sady hihina ty vondraky ty tany nareo.' ¹⁹ Sady amea Didy nareo hoe: 'Anovo zao, mangala kalesy amy ty tany Egypta ho ahy ty anakinareo noho ty valinareo. Andeso ty babanareo le mandina atoy. ²⁰ Ka misalasala ty amy hanananareo rey, fa ahinareo ze soa amy ty tany iaby heniky an' Egypta."' ²¹ Le nanovy ty anaky'Isaraely rey zay. Namea i Josefa kalesy ndrozy araky ty nandidia i Farao, sady nanome androzy vatia handesy an-dala. ²² Nameany siky ho soloa ndrozy iaby, fe Benjamina avao ro nameany sekely volafoty telon-jato noho siky hosoloa limy. ²³ Zao ro nalefany ho amy ty babany: boriky lahy folo nanday ty raha soa ahy Egypta; sady boriky vavy folo nanday vary noho mofo, sady vaty hafa ho ahy babany handesy an-dala eny. ²⁴ Le nampandinany rahalahiny rey le nandeha ndrozy. Hozao tiasany tamin-drozy: "Ka mifamaly an-dala eny nareo." ²⁵ Le niakatsy baka Egypta ndrozy le niavy tamy ty tany Kanana, ho amy Jakoba babany. ²⁶ Nivola taminy ndrozy hoe: "Mbo velo Josefa, sady mpanampaky ty tany Egypta iaby iaby ie."Nisento ty fony safe tsy nino ze novolani-drozy azy. ²⁷ Novolanin-drozy taminy ty safa iaby nivolan'i Josefa androzy. Lafa nihita i Jakoba ty sarety ze nalefa i Josefa mba handay azy, le velo ndraiky ty fanahy Jakoba baban-drozy. ²⁸ Hozao tiasa Israely: "Soa zay. Mbo velo Josefa anako. Handeha zaho sady hanenty azy alohy ty hahafaty ahy."