¹ Sady tamy fotoa zay le nanenga ty rahalahany rey i Joda le niharo petraky tamy Adomita, ze nikaiha hoe Hira. ² Tany ro nifanojoan-drozy tamy ty anaka vavy ty lahilahy Kananita ze nikaiha hoe Soa. Nanambaly azy ie sady niara-niroro taminy. ³ Nana anaky ie sady nahazo aja lahilahy, Era ro ikaiha azy. ⁴ Nana anaky ndraiky ie sady nahazo aja lahilahy. Nikaihy hoe Onana. ⁵ Sady mbo nahazo aja lahilahy ndraiky ie sady nikaihy hoe Sela. Ta Keziba any ro niterahany azy. ⁶ Joda nahita valy ho ahy i Era, anakilahiny velohany. Tamara ro anarany. ⁷ Era anakilahy i Joda velohany ro raty tamso i Yaveh eo. Nivono i Yaveh ie. ⁸ Hoasa Joda tamy i Onana hozao: "Miroroa miaraky amy ty valy ty rahalahinao. Anovo aminy ty didy amy ty maha-zokilahy iha, sady mampitsangana anaky ho ahy ty rahalahinao." ⁹ Sady hay i Orana fa ty aja ro tsy ho azy. Le isaky ty niaraky niroro tamy ty valy ty rahalahiny ie, le nararany tamy ty tany ty tavy ty ainy mba tsy hananany aja ho ahy ty rahalahiny. ¹⁰ Raty ty nanoviny tamaso i Yaveh eo. Nivono i Yaveh avao koa ie. ¹¹ Le hoasa Joda tamy i Tamara, vinantony ampela hoe: " Enganie hijano mpanday vata an-tsano babanao zisiky ty maha bevata an'i Sela iha, anakilahiko." Safe natahotsy ie hoe: " tsy noho maty nanahaky ty rahalahiny rey avao koa ie." Nandeha i Tamara sady nipetsaky tan-tsano babany ao. ¹² Fotoa lako tafara tatoy, le maty ty valy i Joda, anak'ampela i Soa. Fa nieny i Joda sady nandeha tamy ty mpihety ty aondry ty tany Timna, ie noho Hira azy Adolamita namany iny. ¹³ Nisy nivola tamy i Tamara hozao: "Ingo, ty rafozanao le mandeha ta Timna any hihety ty aondriny.'' ¹⁴ Nalany ty siky maham-panday vata azy le nirakofany ty voaliny sady nilombofany ty vatany. Nipetsaky tam-baravara i Enaima eo, ze tanila ty lala mana Timna eo any ie. Safe fa hitany fa bevata i Sela hondy tsy mba natahotsy ho valiny ie. ¹⁵ Lafa nahita azy i Joda le nidiniky fa mpamarotsy-vata ie safe nilombofany ty tarehiny. ¹⁶ Namonjy azy tan-dala eny ie sady nivola hoe: " Avia, aleo zaho mba hiaraky hiroro aminao" ---safe tsy hainy hoe vinantony ampela ie---sady hoy ie hozao: "Ino ro hameanao ahy le mahazo miroro amiko iha?" ¹⁷ Hoy ie hozao: "Hanaterako anak'aosy amy aondry noho aosy rey iha." Hoy ie hozao: ''Hanao fitana amiko va ih zisiky ty hanateranao zay?" ¹⁸ Hoy ie hozao: "Ino ro fitana tokony hameako anao?" ho zao ty namaliany azy: "Tampo noho ty folinao, sady kobay an-tananao eny iny.'' Nameany azy rey sady niaraky niroro taminy ie, le nibevoka taminy ie. ¹⁹ Nitsanga ie sady niala teo. Nalany ty voaliny sady nampiliriny ty siky maha mpandaitena azy. ²⁰ Nampaneteriny an'i Joda an'i azy Adolamita namany iny ty anak'aosy tamy aondry noho aosy rey mba hazahoany azy fitana tan-tanan'ampela eny iny, hondy tsy nahita azy ie. ²¹ Bakeo le nanonta lahilahy nipetsaky tan-toera teo rey ty Adolamita hozao: ''Aia azy mpamarotsy vata tamy ty lala i Enaima iny?" Hoasan-drozy hoe: "Tsy nisy mpamarotsy vata teto." ²² Le nimpoly tamy i Joda any ie sady hoasany hoe: "Tsy nahita azy zaho. Sady hoasa lahilahy tan-toera teo rey koa hoe: 'Tsy nisy mpamarotsy vata teto'' ²³ Hoasa i Joda hoe: "Aleo hotanjahiny any raha reny, mba tsy hangalabaraka antsika. Fa nampanesy anak'aosy vatany zaho, hondy iha tsy nahita azy." ²⁴ Sady lafa afaky telo vola eo le nisy nivola tamy i Joda manao hozao: "Namarotsy vata i Tamara vinantony ampela, sady fa bevoka laha zay vatany ie." Hoasa i Joda hoe: "Andeso atoy ie sady engao horoa." ²⁵ Sady lafa naboaky ie le nanesy hafatsy tamy rafozany ie hoe: "Baka amy ty lahilahy tompony reto ro nampibevoka ahy." Hoy ie hozao: "Mba hainao va lahy fa ahinia tampo noho foly sady kobay reto." ²⁶ Sady hainy i Joda raha reto le hoy ie hozao: "Marina mandilatsy ahy ie, safe ie ro tsy namea ho valy i Sela anako." Sady tsy nisrsky niroro taminy sasy ie. ²⁷ Tamy andro zay le teraky ie, ingo, hamba ro tan-tsarotsony ao. ²⁸ Sady laha tampiteraha teo le niboaky ty tanaky raiky tamy i aja rey, sady nangalaky foly mena azy mpihary iny le nanoviny voy tamy ty tanany sady hoy ie hozao: "Toy ro teraky velohany.'' ²⁹ Bakeo le nahemotsiny ty tanany, sady ingo, ty rahalahiny niboaky velohany. Hoasa ty mpihary hoe: ''Tamy ty fomba manao akory ro naha tafaboaky anao!" Ka le nikaihy hoe Fareza ie. ³⁰ Sady niboaky ndraiky azy rahalahony iny, ze nisy foly mena tamy ty tanany iny le nikaihy hoe Zera ie.