¹ Nipetraky tany amy ty tany azy tany nipetraha ty babany Jakoba, tamy tany Kananatao. ² Zao ty raha nahazo an'i Jakoba. Josefa, azy pamaraky folofito amby tao, le niamby tty aondry noho ty aosy rey niaraky tamy ty rahalahiny. Ie le niaraka tamy ty anakilahy Bila rey noho anakilahy Zilpa, azy valy ty babany. Nanao tatitsy raty mikasiky androzy tamy ty babany Josefa. ³ Le tea Israely mandilatsy ty anakilahiny hafa rey Josefa noho ie anakilahy ty fahanterany. Nitrebehany siky soa biby ie. ⁴ Hita ty rahalahiny fa tea ty babany mandilatsy ty rahalahiny iaby rey ie. Nalay azy ndrozy sady tsy nivola tam-pitiava taminy. ⁵ Niazo i Josefa nofy, sady nivolaniny tamy ty rahalahiny zay. Vo maiky ndrozy nalay azy. ⁶ Hoasany tamin-drozy: " Mba janjino lahy ty nofiko zay nanofisako zay. ⁷ Ingo, namehy fehim-bary tam-baibo tsika sady ingo, niarina ty fehim-bariko le nitsanga soa, le ingo, nilahitsy mihodidy ty ahy avao ko ty fehim-barinareo sady nandohaliky miatriky ty fehim-bariko.'' ⁸ Hoasa ty rahalahiny taminy: " Le hanjaka aminay vatany va iha? Handidy anay vatany va iha?" Vo maiky ndrozy nalay azy mikasiky nofiny noho safany rey. ⁹ Le mbo nanonofy hafa ndraiky ie le nivolaniny tamy ty rahalahiny. Hozao tiasany: " Mbo nahazo nofy raiky hafa ndraiky zaho: Nandohaliky tanatrehako ty masoandro noho ty volana folo raiky amby." ¹⁰ Novolaniny tamy ty babany zay manahaky nanovny tamy rahalahany, le novolany ty babany mare ie. Hozao ty asany aminy: " Ino va raha azonao nofy zao? Le nandohaliky tamy ty tany anatrehanao vatany va zaho noho ty reninao sady ty rahalahinao rey ?" ¹¹ Nialona azy rahalahiny rey, fa ty babany avao ro nahatiaro zay tan-tsainy tao. ¹² Nandeha niamby ty aondry amy ty aosy ty babany ta Sekema tany rahalahiny rey. ¹³ Hoasa Israely tamy Josefa hoe: "Vasa tsy niamby aondry amy ty aosy a Sekema any va ty rahalahinao? Avia, fa iharako amin-drozy iha." Hoasa i Josefa taminy: "Vonona zaho." ¹⁴ Hoasany taminy hoe: "Mandina, le henteo laha salama ty rahalahinao noho ty aondry amy ty aosy le tatero amiko atoy." Le nasesiny Jakoba mandilatsy ty baibo i Hebrona ie, le nandeha ta Sekema Josefa. ¹⁵ Le nisy lahilahy raiky nahita an'i Josefa. Ingo, Josefa nikariokaroka tan-baibo. Nanontania azy lahilahy iny hozao ie: ' Ino va ty raha ilanao?" ¹⁶ Hoasa i Josefa hoe: ''Mitalia ty rahalahiko zaho. Azafady mba volano amiko lahy , aia ndrozy ro miamby ty aondry noho ty aosy.'' ¹⁷ Hozao ty asa ty lahilahy iny: '' Fa niala tamy ty toera toy ndrozy, le reko ndrozy nivola hozao: 'Ndao tsika ho a Dotana.''' Nanoriky ty lia ty rahalahiny Josefa le nahita andozy ta Dotana. ¹⁸ Talakin-drozy baka lavitsy ie, sady taloha ty niaviany tanilan-drozy, le nanao hevitsy hamoana azy ndrozy. ¹⁹ Nifampiresaky rahalahiny rey hoe: "Henteo, ingo azy mpanonofy. ²⁰ Avia henany io, ndeha hovonoantsika ie le hatorakitsika amy ty raiky amy lavaky rey. Ho vonitsika hoe: 'natelinty bibily ie.' le ho hitantsika eo ze hiafara ty nofiny." ²¹ Nahare zay Robena le namonjy azy tam-pela tanan-drozy. Hozao tiasany: "Aleo tsy afahan-tsika ty ainy." ²² Hoasa i Robena tamin-drozy: "Ka mandatsaky lio. Atoraho any amy ty lavaky azy an'efitsy ie, fa ka mikasi-tana azy"--- mba hahaizany manaotsy azy an-tanan-drozy le handay azy mimpoly amy ty babany ²³ Lafa niavy tamy ty rahalahiny rey i Josefa le nendahan-drozy taminy azy siky soa biby iny. ²⁴ Nirambesin-drozy ie le natorakiny tanay ty lavaky tao. Tsy misy ino tanay ty lavaky sady tsy nisy rano tanainy tao. ²⁵ Nipetraky ndrozy mba hihina ty mofo. Nampiandra ty masony ndrozy le nanenty, ndrey, nisy Isamaelita niraky lia baka a Gileada, niaraky tamy ramevan-drozy ze nanday hanitsy, noho balsama sady miora. Nandeha ndrozy mba handay zay mba hijotso ho a Egypta any. ²⁶ Hoasa i Joda tamy ty rahalahany hoe: " Ino va ty tombotsoan-tsika laha mamono ty rahalahantsika noho maminy ty liony tsika? ²⁷ Ndao, sady engaho havarotsitsika amy ty Isamaelita rey ie sady engaho tsy hisy hikasi-tana azy tsika. Safe rahalahintsika ie, nofitsintsika ie." Nijanjy azy rahalahiny rey. ²⁸ Nandalo Midianita rey mpamarotsy mandeha. Nosintoniny rahalahiny rey baka an-daviky Josefa . Navarotsin-drozy farantsa volafoty roapolo tamy Ismaelita rey Josefa. Le nandesin-drozy Ismaelita ta Egypta i Josefa. ²⁹ Nimpoly tanila ty lavaky teo Robena, le, ingo, tsy tanay ty lavaky i Josefa. Notatahany ty sikiny. ³⁰ Nimpoly tamy ty rahalahany ie sady nivola hoe: " Tsy ao azy aja lahilahy! Aia va ty tany handinako?" ³¹ Namono aosy raiky ndrozy sady nangalaky ty siky Josefa le nanajoboky zay tamy lio tao. ³² Le nandesin-drozy tamy ty babany zay le hoasan-drozy hoe: "Hitanay toy. mba henteo laha siky ty anakinao toy ndra tsy ie." ³³ Hainy Jakoba zay le hozao tiasany: "Siky ty anako toy. Nately ty bibily ie. Le vatany nalahelo biby Josefa." ³⁴ Nanataky ty salotsiny Jakoba sady nisiky lamba fisaonana tam-balahany teo. Nisaona ty anany naharitsy ty fotoa lako ie. ³⁵ Nitsanga nampiono azy iaby ty anakilahany noho ty anak'ampelany iaby, fe tsy nety nampionona ie. Hozao tiasany:'' Hijotso ho amy ty fiaina tsy hita vatany zahi hisaona ty anakilahiko." Nitany azy ty babany. ³⁶ Navarotsy Midianita rey ta Egypta tamy Potifara ie, tandapa i Farao, azy be ty mpiamby.