¹ Le niakatsy baka Egypta Abrama sady nimba Negeva tao, ie, ty valiny, noho ty namany iaby. Niaraky tamindrozy avao i Lota. ² Sady Abrama le vatany mpagnarivo biby, bolafoty, sady volamena. ³ Nanohy ty liany baka Negeva tao ho mba Betela ie, ho amy ty toera ze nisy ty lainy taloha, tanenela i Betela noho Ay. ⁴ Nandeha tamy azy toera ze misy ty alitara ze namboariny taloha teo iny ie. Teo ro nikaihany ty anara Yaveh. ⁵ Sady Lota, ze nandeha niaraky tamy i Abrama, le nana aondry noho aosy, aomby, sady lay avao koa. ⁶ Tsy nahazaka ty iarahan-drozy mipetsaky ty tany, safe lako mare ty fananany rey, noho zay le tsy afaky niharo petsaky ndrozy. ⁷ Sady koa, nisy fialia tamy mpiemby aondry i Abrama noho mpiemby aondry i Lota rey. Nipetsaky tamy ty tany Kananita noho Perizita ao tamy fotoa zay. ⁸ Le hozao tiasa i Abrama tamy Lota: "Enganie tsy hisy fifamalia amiko noho aminao eo, sady amy ty mpiamby aondrinao rey noho ty mpiamby aondriko rey; sady mpilongo avao ko tsika. ⁹ Tsy alohanao eo iaby va ty tany? Mandina tsy ampisalasala sady misaraha amiko. Laha mandeha mbankavia iha, le handeha mbankavana zaho. Na lafa mandeha mbakavana iha,le handeha mbakavia zaho." ¹⁰ Le nagnety mihodidy Lota, le nahita fa ty lemak'i Jordana le voatondraky soa ndra mbaia ndra mbaia tamy ty lala iaby mba Zoara any, manahaky ty baibo Yaveh, manahaky ty tan'i Egypta. Zay le taloha ty nandrava Yaveh an'i Sodoma noho Gomora. ¹¹ Lafa zay le nitingy ty lemak'i Jordana iaby ho tiazy sady nandeha niantinana i Lota, le nisaraky ty mpilongo. ¹² Nipetraky ta amy tany Kanana tany i Abrama, sady Lota nipetraky tamy ty tana ty lemaky. namboatsy ty lainy ho lavitsy marikitsy an'i Sodoma ie. ¹³ Sady ty olo i Sodoma rey le vatany mpanota raty fanahhy manohitsy an'Yaveh. ¹⁴ Nivola tamy Abrama Yaveh tafara ty niala i lota taminy teo nanao hozao: "Magnete amy ty toera ze nitsangananao mbavaratsy, mbantimo, mbantinana,sady mbandrefa. ¹⁵ azy tany iaby ze nihitanao rey, le hameako anao noho ty tarikinao mandrakizay. ¹⁶ Hanoviko lako manahaky ty posiera ty tany tarihanao rey, fe lafa misy lahilahy raiky afaky manisaky ty posiera ty tany, le afaky hisafy avao koa ty posiera ty tany. ¹⁷ Miongaha le mandina manapatapaky ty halava noho ty saka ty tany, fa hameako anao zay." ¹⁸ Le nangoro ty lainy Abrama, sady niongaky le nipetraky tanila ty hazo terebinta i Mamre, ze a Hebrona any, sady nanamboatsy alitara ho tiahy Yaveh tany .