¹ Sady Yaveh nivola tamy i Abrama hozao: "Mialà amy ty fireneanao, noho amy ty longonao, noho amy ty tokan-tsano ty babanao, nana amy ty tany ze hatoroko anao any. ² Hanoviko firenea bevata iha, sady ho tahiko iha, sady hanoviko bevata ty anaranao, sady ho fitahia iha. ³ Hitahy ze mitahy anao rey Zaho, fa ndra ia ndra ia mangala-baraka anao le hozoniko. Amy ty safanao ro hitahia ty firenea ty tany iaby rey." ⁴ Sady nandeha Abrama, araky ze nivolany i Yaveh hanoviny, sady nanoriky azy koa i Lota. Fitopolo limy amby tao i Abrama laha niala an'i Harana. ⁵ Abrama nanday an'i Saray, valiny, Lota, anaky ty rahalahiny, fanana iaby ze nihajarin-drozy rey, noho ty olo lako ze niazon-drozy ta Harana ao. Niala ho amy ty tany Kanàna any ndrozy, kale avy tamy ty tany Kanàna ao. ⁶ andalo ty tany lavitsy i Sekema i Abrama, zisiky amy ty hazo terebin-ta i More. Kananita rey ro nipetsaky tamy ty tany ao tamy andro zay. ⁷ Niseho tamy Abrama i Yaveh, la le nivola hozao: " Hoahy ty tarihanao ro hanomezako tany toy." Sady Abrama nanory alitara tany ho ahy i Yaveh, ze niseho taminy. ⁸ Nifidra nana amy ty vohitsy an-tinana i Betela any ie, ze namboarany ty lainy, Betela tany andrefa noho Ay tany an-tinanany. Teo ro namboarany ty alitara ho ahy i Yaveh noho ty nikaiha ty anara i Yaveh. ⁹ Bakeo nanohy ty liany Abrama, nandeha nana Negeva any. ¹⁰ Nisy mosary tamy ty tany, Ka le nijotso ta Egypta Abrama any mba hipetraky, fa nahery ty mosary tamy ty tany ao. ¹¹ Lafa rariny ty hilitsy ta Egypta any ie, le nivola tamy i Saray valiny hozao: "Ingo, haiko le teba ampela soa tarehy iha. ¹² Lafa hita Egyptiana rey iha le hivola ndrozy hozao: " Toy ty valiko,' sady le ho vonon-drozy zaho, fe iha ho hotandrahan-drozy ho velo. ¹³ Volano hoe anabaviko iha, mba tsy hampanino ahy noho iha, sady mba ho voatsitsy ty aiko noho iha." ¹⁴ Sady tamy ty fatoa nilira i Abrama ta Egypta ao, le hita Egyptiana rey fa ampela tena soa tarehy vatany Saray. ¹⁵ Hita tandapa i Farao ie le nanompo azy tamy ty i Farao any, sady le nalà ho an-tokatsano i Farao any ty ampela. ¹⁶ Sady nampiadany i Farao i Abrama noho ty amy nampela, ka le nanome azy aondry, aomby, ampondra lahilahy, mpiasa lahilahy, mpiasa ampela,ampondra ampela, sady rameva. ¹⁷ Bakeo Yaveh namango an'i Farao noho ty longony tamy ty loza bevata noho i Saray, valy i Abrama. Nampikaiky an'i Abrama i Farao, ka le nivola hozao: " ¹⁸ Ino ty raha vitanao tamiko? Nanino ro tsy nivolaninao tamiko fa valinao ie? ¹⁹ Nanino iha ro nivola hozao: 'Anabaviko ie,' mba hangalako azy ho valiko? sady andao zoro ty lalanao." ²⁰ Sady i Farao nanome beko ty lahilahiny nikasiky azy, sady nandefa azy lavitsy ndrozy, niaraky tamy ty valiny noho ze iaby nananany.